ផ្គររន្ទះ បាញ់សម្លាប់បុរសម្នាក់បន្សល់ទុកកូនតូចពីរនាក់កំព្រា

បុរសម្នាក់ត្រូវរន្ទះបាញ់ស្លាប់នៅវាលស្រែក្បែរភូមិ ខណៈដើរទៅមើលស្រូវពេលមេឃកំពុងភ្លៀងរលឹម។ សូមបង្កើនការប្រុងប្រយ័ត្នឲ្យបានខ្ពស់ចំពោះគ្រោះថ្នាក់ធម្មជាតិ ពេលមានផ្គរភ្លៀងរលឹមខ្សល់កន្ត្រាក់ ចៀសវាងកើតមានគ្រោះថ្នាក់មកលើខ្លួនជាយថាហេតុ។

ជាក់ស្ដែងនៅរសៀលថ្ងៃទី០១ ខែឧសភា ឆ្នាំ២០២២ មានករណីរន្ទះបាញ់បុរសម្នាក់ឈ្មោះ រស់ រ៉ុង អាយុ៣៤ឆ្នាំ រស់នៅភូមិសេដ្ឋី ឃុំបានកាម ស្រុកព្រៃកប្បាស ខេត្តតាកែវ បណ្តាលឲ្យស្លាប់បាត់បង់ជីវិតនៅវាលស្រែក្បែរភូមិ ដោយបន្សល់ទុកកូនតូចៗ២នាក់រស់នៅក្នុងបន្ទុកម្តាយ។

តាមសាច់ញាតិបញ្ជាក់ថា ពេលមេឃកំពុងភ្លៀងរលឹម ជនរងគ្រោះបានដើរទៅមើលស្រូវស្រែដែលនៅក្បែរផ្ទះ ហើយក៏ត្រូវរន្ទះបាញ់ស្លាប់តែម្តងទៅ។

ក្រោយកើតហេតុសមត្ថកិច្ចនៃអធិការដ្ឋាននគរបាលស្រុកព្រៃកប្បាស បានចុះធ្វើកំណត់ហេតុ និងពិនិត្យឃើញថា ជនរងគ្រោះពិតស្លាប់ដោយសារគ្រោះធម្មជាតិរន្ទះបាញ់ប្រាកដមែន និងបានប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី៕

អត្ថបទ៖ វីរៈ