រដ្ឋបាលក្រុងច្បារមន បំពាក់កាមេរ៉ាចាប់សកម្មភាពអ្នកបោះសំរាម នៅគល់ស្ពានបារាំងចាស់

អាជ្ញាធរក្រុងច្បរមន បានបំពាក់កាមេរ៉ាសុវត្ថិភាព នៅគល់ស្ពានបារាំង ដើម្បីចាប់យករូបភាពប្រជាពលរដ្ឋអាណាធិតេយ្យដែលយកសំរាមមកបោះចោលនៅគល់ស្ពាននេះធ្វើការអប់រំណែនាំ និងអនុវត្តវិធានការច្បាប់ក្នុងករណីមិនរៀងចាល។

មន្ត្រីសាលាក្រុងច្បារមន បានប្រាប់ កម្ពុជាថ្មី ឲ្យដឹងថា រដ្ឋបាលក្រុង ក៏ដូចជាគណៈកម្មការផ្សារកំពង់ស្ពឺ ចេញចេញសេចក្តីណែនាំដល់ប្រជាពលរដ្ឋ អាជីវករទាំងអស់ បញ្ឈប់ការយកសំរាមទៅបោះចោលនៅលើចិញ្ចើមផ្លូវសាធារណៈ ត្រង់ចំណុចគល់ស្ពានចាស់ពីសម័យបារាំង ខាងកើតផ្សារកំពង់ស្ពឺបន្តទៀត ព្រោះវាធ្វើឲ្យមានក្លិនស្អុយរលួយ នៃសំរាមប៉ះពាល់សុខុមាលភាព បរិស្ថាន និងសោភ័ណភាពយ៉ាងខ្លាំង។

ប្រភពបន្តទៀតថា ទោះបីជាអាជ្ញាធរខិតខំណែនាំយ៉ាងណាក្តីនៅតែបន្តមានជនអនាធិបតេយ្យយកសំរាមទៅបោះ​ចោល​នៅពេលយប់ៗដដែល ទើបរដ្ឋបាលក្រុងច្បារមនរៀបចំបំពាក់កាមេរ៉ាសុវត្ថិភាពដើម្បីចាប់រូបភាពក្រុមអ្នកបោះសំរាមចោលគ្មានសណ្តាប់ធ្នាប់ទាំងនេះតែម្តង។

មន្រ្តីដដែលបានបន្ថែមថា លោក ហុក ម៉ារ៉ាឌី អភិបាលក្រុងច្បារមន នៅថ្ងៃទី ២០ ខែឧសភា ឆ្នាំ ២០២២ កន្លងមកនេះ បានឲ្យមន្ត្រីជំនាញរៀបចំបំពាក់កាមេរ៉ាសុវត្ថិភាពចាប់រូបភាពអ្នកល្មើសនឹងបំរាមរបស់រដ្ឋបាលក្រុងច្បារមន ដែលយកសំរាមចោលត្រង់ចំណុចគល់ស្ពានបារាំង ផ្សារកំពង់ស្ពឺនេះ ដើម្បីអនុវត្តរដ្ឋបាល។ ក្រោយពីបំពាក់កាមេរ៉ារួចរាល់ កាមេរ៉ាសុវត្ថិភាពចាប់បានរូបភាពម៉ូតូ រ៉ឺម៉កម៉ូតូ និងមុខអ្នកដែលបានចោលសំរាមនៅគល់ស្ពានបារាំង និងតាមទីធ្លាសាធារណៈនានាបានជាច្រើននាក់។ ចំពោះអ្នកល្មើសនឹងបម្រាមបោះចោលសំរាមអណាធិបតេយ្យ រដ្ឋបាលក្រុងបានអញ្ជើញចូលខ្លួនមកសាលាក្រុងច្បារមន ដើម្បីដោះស្រាយធ្វើកិច្ចសន្យាដោយរយៈពេល ៧ ថ្ងៃក្រោយពេលខ្លួនបោះសំរាមចោល។ បើមិនដូចឆ្នោះទេ គណៈបញ្ជាការឯកភាពក្រុង នឹងចាត់វិធានការតាមផ្លូវច្បាប់ស្តីពីបរិស្ថាន។

សូមបញ្ជាក់ថា បន្ទាប់ពីមានវិធានការក្តៅបែបនេះ ឃើញមានម្ចាស់ម៉ូតូ រ៉ឺម៉កម៉ូតូដែលដឹកសំរាមចោលចោលនៅទីតាំងនេះ និងទីតាំងហាមឃាត់ផ្សេងៗ កំពុងតែបានចូលខ្លួនមកដោះស្រាយ និងធ្វើកិច្ចសន្យាបណ្តើរៗ និងខ្លះទៀតមិនទាន់ចូលខ្លួនឡើយទេ៕

អត្ថបទ ៖ ភួង រដ្ឋា