មជ្ឈមណ្ឌលជាតិពិសោធន៍សុខាភិបាល បង្ហាញលទ្ធផលវិភាគសំណាកស្រាសដែលសង្ស័យពុលកម្មករក្នុងចម្ការចេក ឡុង ស្រេង បឹង កេត

បន្ទាប់ពីមានករណីកម្មករស្លាប់ក្នុងចម្ការចេក ឡុង ស្រេង បឹងកេត ស្ថិតក្នុងភូមិ៣៥ ឃុំព្រែកកក់ ស្រុកស្ទឹងត្រង់ និងសង្គ្រោះបន្ទាន់ជាច្រើននាក់មក មជ្ឈមណ្ឌលជាតិពិសោធន៍សុខាភិបាល បានបង្ហាញពីលទ្ធផលវិភាគសំណាកលើស្រាសដែលលទ្ធផលវិភាគបញ្ចាក់ថា មានសារធាតុពុលមេតាណុលកម្រិតគ្រោះថ្នាក់ខ្លាំង។

របាយការណ៍លទ្ធផលវិភាគបានបង្ហាញជាសរុបថា សំណាកស្រាសដែលបានប្រមូលនៅកន្លែងកើតហេតុ និងស្រាស​១​សំណាកដែលប្រមូលពីទីតាំង​ផលិតពាក់ព័ន្ធ​មានសារធាតុពុលមេតាណុល​កម្រិតគ្រោះថ្នាក់ខ្លាំង ហួសកម្រិតផឹកបាន (>0.1%)។

សូមបញ្ជាក់ថា កាលពីថ្ងៃទី២៨ ខែតុលា ឆ្នាំ២០២២ នៅវេលាម៉ោង២និង៤៥នាទី នៅក្នុងចម្ការចេក ឡុង ស្រេង បឹង កេត ស្ថិតក្នុងភូមិ៣៥ ឃុំព្រែកកក់ ស្រុកស្ទឹងត្រង់ មានករណីពុលបណ្ដាលឲ្យកម្មករចំនួន៥នាក់បានស្លាប់ និងបញ្ជូនទៅសង្គ្រោះនៅមន្ទីរពេទ្យខេត្តកំពង់ចាម ជាច្រើននាក់។

បើតាមការបញ្ជាក់ពីលោក ឯម វឌ្ឍនា អធិការស្រុកស្ទឹងត្រង់ បានឲ្យដឹងថា មានកម្មករប្រុសចំនួនបីនាក់បានស្លាប់ពេលបញ្ជូនទៅកាន់មន្ទីរពេទ្យខេត្តកំពង់ចាម ខណៈបាញ់ថ្នាំពុល និងបោចស្មៅក្នុងចម្ការចេក បន្ទាប់មកមានអាការៈថប់ៗ ពិបាកដកដង្ហើម និងចុកទ្រូង។

បើតាមសម្តីជនរងគ្រោះដែលធ្វើការនៅចម្ការចេក ឡុង ស្រេង បឹងកេត នោះបានបញ្ជាក់ប្រាប់ថា ក្រោយពីពួកគេយកថ្នាំបាញ់ស្មៅ ក្នុងចម្ការដូចសព្វដង រួចស្រាប់តែកម្មករជាច្រើននាក់ចាប់ផ្តើមមានអាការៈ ថប់ៗ ពិបាកដកដង្ហើម និងចុកទ្រូង ហើយប្រសិនបើមិនបានបញ្ជូលមកកាន់មន្ទីរពេទ្យទាន់ពេលទេនោះអាចបង្កឲ្យស្លាប់ភ្លាមៗ៕

អត្ថបទ៖ សុខុម