នគរបាលខណ្ឌច្បារអំពៅនៅព្រឹកថ្ងៃទី ២៣ ខែវិច្ឆិកា ឆ្នាំ២០២២នេះ បានបញ្ជូនស្ត្រីម្ចាស់បំណុលឡើងតុលាការពាក់ព័ន្ធនិងអំពើហិង្សាយកដុំថ្មគប់កញ្ចក់រថយន្ដកូនបំណុលបណ្ដាលឲ្យរងការខូចខាតពីរគ្រឿង។

ស្ត្រីដែលសមត្ថកិច្ចបញ្ជូនមកតុលាការនេះឈ្មោះ ហុង សុកដ្ឋា អាយុ២៥ឆ្នាំ មុខរបរលក់ដូរ ស្នាក់នៅភូមិវាលស្បូវ សង្កាត់វាលស្បូវ ខណ្ឌច្បារអំពៅ។

សំណុំរឿងហិង្សាបំផ្លិចបំផ្លាញទ្រព្យសម្បត្តិអ្នកដទៃនេះ គឺស្ថិតនៅក្នុងចំណាត់ការរបស់លោក លឹម ប៊ុនហុង ព្រះរាជអាជ្ញារងអមសាលាដំបូងរាជធានីភ្នំពេញជាអ្នកសាកសួរ។

នគរបាលបានឲ្យដឹងថា កាលពីរសៀលថ្ងៃទី២០ ខែវិច្ឆិកា ឆ្នាំ២០២២ ចំណុចមុខផ្ទះលេខ១៨៦ ផ្លូវ២F ស្ថិតក្នុងភូមិវាលស្បូវ សង្កាត់វាលស្បូវ ខណ្ឌច្បារអំពៅ ម្ចាស់បំណុលឈ្មោះ ហុង សុកដ្ឋា បានទៅទារលុយពីកូនបំណុល ឈ្មោះ ដួង អក្ខរា ភេទប្រុស អាយុ៤១ឆ្នាំ មុខរបរអាជីវករ ស្នាក់នៅផ្ទះកើតហេតុ ដែលជំពាក់ប្រាក់ហើយមិនទាន់សងតាមថ្ងៃកំណត់ក៏កើតជាជម្លោះផ្ទុះជាហិង្សាតែម្ដង។

ប្រភពព័ត៌មានបានបញ្ជាក់ថា មុនពេលកើតហេតុកូនបំណុលឈ្មោះ ដួង អក្ខរា បានចងការប្រាក់ពីស្រ្តីម្ចាស់លុយចំនួន ១,៥០០ ដុល្លារ ដើម្បីយកទៅរកស៊ី ដោយសន្យាសងជនសង្ស័យទាំងដើមទាំងការសរុប ២,១០០ ដុល្លារវិញ តែកូនបំណុលពុំបានសងប្រាក់ទៅវិញទេតាមការកំណត់។

លុះដល់ថ្ងៃទី២០ ខែវិច្ឆិកា ឆ្នាំ២០២២ ម្ចាស់លុយបានទៅដល់ផ្ទះកូនបំណុល (ចំណុចកើតហេតុ) ដើម្បីទារប្រាក់ដែលជំពាក់ ពេលនោះក៏ទាស់ពាក្យសម្តីគ្នា រួចម្ចាស់លុយយកដុំគប់ទៅលើរថយន្តម៉ាក Toyota LanCruiser ពណ៌ខ្មៅ គ្មានផ្លាកលេខបែកកញ្ចក់ខាងក្រោយ, កំពិតទ្វារក្រោយខាងឆ្វេង ហើយគប់រថយន្ត១គ្រឿងទៀត ម៉ាក Toyota Pruis ពណ៌ទឹកមាស ផ្លាកលេខភ្នំពេញ2AJ-5584 បណ្តាលឲ្យកំពិតទ្វារមុខ-ក្រាយខាងស្តាំ។

ពេលនោះម្ចាស់រថយន្ដ ក៏ទូរស័ព្ទប្រាប់សមត្ថកិច្ចហើយសមត្ថកិច្ចចុះទៅដល់បានសួរនាំម្ចាស់បំណុល និងបានទទួលស្គាល់ថា ខ្លួនពិតជាបានយកដុំថ្មគប់ទៅលើរថយន្ត២គ្រឿងខូចខាតមែនដោយមូលហេតុខឹងពេក។

សមត្ថកិច្ចបានឃាត់ខ្លួនម្ចាស់ និងវត្ថុតាងបញ្ជូនទៅអធិការដ្ឋាននគរបាលខណ្ឌច្បារអំពៅកសាងសំណុំរឿងបញ្ជូនមកតុលាការតែម្ថង៕

អត្ថបទ៖ មករា