ស្នងការ​នគរបាល​ខេត្ត​កណ្ដាល​កំពុង​ដុតដៃដុតជើង​វែង​មុខ​ជន​ដៃ​ដល់ ​ករណី​ខ្មាន់​កាំភ្លើង​បាញ់​ក្មេងស្រី​អាយុ៤ឆ្នាំ​រងរបួសធ្ងន់

កណ្ដាល ៖ ស្នងការ​នគរបាល​ខេត្ត​កណ្ដាល​កំពុង​ដុតដៃដុតជើង​នៅ​ក្នុង​ករណី​ជន​ដៃ​ដល់​មួយ​រូប ដែល​ជា​ខ្មាន់​កាំភ្លើង​បាន​បាញ់​ទៅ​លើ​ក្មេងស្រី​អាយុ៤ឆ្នាំម្នាក់​ធ្លាយពោះរងរបួសធ្ងន់ កាលពីថ្ងៃទី៣១ ខែធ្នូ ឆ្នាំ២០២២។

លោក​ឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល​ បាន​និយាយ​នៅក្នុងបណ្ដាញសង្គមតេឡេក្រាម​ថា «ខ្ញុំបានទទួលករណីនេះហើយ​, ជំនាញកំពុងធ្វើការ, រង់ចាំលទ្ធផលចេញពីមន្ទីរពេទ្យគន្ធបុប្ផា ដើម្បីបញ្ជាក់ថា ជាគ្រាប់អ្វី?»។

បើ​យោងតាម​ការបង្ហោះ​លើបណ្ដាញសង្គមហ្វេសបុកឈ្មោះ ម៉ាប់ ពិសាល​បាន​សរសេររៀបរាប់តាមបណ្ដាញសង្គមឲ្យដឹងយ៉ាងដូច្នេះថា «ថ្ងៃទី៣១ ម៉ោង៨ ខ្ញុំបានទទួលដំណឹង១ដែលរន្ធត់! ដំណឹងនោះគឺ ( អាឡូ! កូនយ៉ាត្រូវគេបាញ់ធ្លាយពោះហើយ) ខ្ញុំឮដំណឹងនេះហើយខ្ញុំទទួលយកមិនបានទេ កូនខ្ញុំទើបតែអាយុ មិនទាន់៤ឆ្នាំស្រួលបួលផង ហេតុអ្វីត្រូវជួបរឿងបែបនេះ? ខ្ញុំបានសួរពួកគាត់ថា! នរណាជាអ្នកបាញ់? គ្រប់គ្នាគេមិនដឹង ពីព្រោះពួកគេឮតែសំលេងកាំភ្លើង តែមិនឃើញមនុស្ស ខ្ញុំពិតជាមិនយល់តើហេតុអ្វីរឿងនោះមិនធ្លាក់មកលើខ្ញុំ? ចាំបាច់ធ្លាក់ទៅលើក្មេងដែលគ្នាមិនអ្វីបែបនេះ? គ្នាឈឺចាប់ណាស់តើអ្នកដឹងទេ? រយៈពេល ៣ថ្ងៃហើយដែលពេទ្យមិនទាន់បានធ្វើការវះកាត់យកគ្រាប់ចេញ ពីព្រោះពេទ្យថា វាប៉ះពាល់ធ្ងន់ធ្ងរ សួរថាឈឺចាប់ទេ? តើជនល្មើសនៅទីណា? តើខ្ញុំសង្ឃឹមអ្នកណាដែលអាចជួយខ្ញុំបាន? ឬ ក៏យុត្តិធម៌គ្នាទេសម្រាប់ពួកខ្ញុំ? រឿងនេះកើតហេតុនៅ៖ ខេត្តកណ្តាល ស្រុកស្អាង ឃុំ ស្វាយប្រទាល ភូមិពោធិ៍តាប៉ាង (ទឹងអាង) ខ្ញុំសង្ឃឹមយ៉ាងមុតមាំថាយុត្តិធម៌នឹងមានសម្រាប់ក្រុមគ្រួសារខ្ញុំ»៕

កែសម្រួលដោយ ៖ នាគព័ន្ធ​