សមត្ថកិច្ចប្រើពេល៥ម៉ោង ចាប់ខ្មាន់កាំភ្លើង បាញ់ស្រ្តីម្នាក់ នៅក្បែរអគារ The Peak

នគរបាលព្រហ្មទណ្ឌកម្រិតស្រាលរាជធានីភ្នំពេញ សហការជាមួយកម្លាំងនគរបាលខេត្តព្រះសីហនុ បង្រ្កាបជនសង្ស័យជនជាតិចិន០១នាក់ ដែលគេចខ្លួនទៅដល់ខេត្តព្រះសីហនុ ក្រោយដកកាំភ្លើងខ្លីបាញ់ ទៅលើស្រ្តី០១នាក់រងរបួសធ្ងន់ នៅខណ្ឌចំការមន។

ការចាប់ខ្លួននេះដែរបានធ្វើឡើងកាលពីវេលាម៉ោង ១រំលងអាធ្រាតឈានចូលថ្ងៃទី ១១ ខែកុម្ភៈ ឆ្នាំ២០២៦ នៅចំណុចសណ្ឋាគារDV ផ្លូវ២ធ្នូ ភូមិ៤ សង្កាត់លេខ៣ ក្រុងព្រះសីហនុ ខេត្តព្រះសីហនុ។

លោកវរសេនីយ៍ឯក ម៉ម សាវ៉ន ប្រធានការិយាល័យនគរបាលព្រហ្មទណ្ឌកម្រិតស្រាល បានអោយដឹងថា ដោយទទួលបានព័ត៍មានរាយការណ៍មានករណីបាញ់ស្រ្តីម្នាក់ នៅក្នុងមូលដ្ឋានខណ្ឌចំការមន ភ្លាមៗ លោកបានចុះដឹកនាំដោយផ្ទាល់ ស្រាវជ្រាវជុំវិញទីតាំងកើតហេតុ រហូតដល់រកឃើញថា មុខសញ្ញាបានរត់គេចខ្លួន ទៅកាន់ក្រុងព្រះសីហនុបន្ទាប់ពីសកម្មភាពរួច។

លោកបានបន្តថា រហូតមកដល់វេលាម៉ោង១ រំលងអាធ្រាតថ្ងៃទី ១១ ខែកុម្ភៈ ឆ្នាំ២០២៦ នគរបាលព្រហ្មទណ្ឌកម្រិតស្រាល បានសហការ ជាមួយកម្លាំងជំនាញនៃស្នងការដ្ឋាននគរបាលខេត្តព្រះសីហនុ បានឃាត់ជនសង្ស័យចំនួន  ០១នាក់ នៅចំណុចសណ្ឋាគារDV ផ្លូវ២ធ្នូ ភូមិ៤ សង្កាត់លេខ៣ ក្រុងព្រះសីហនុ ខេត្តព្រះសីហនុ ។

ជនសង្ស័យឈ្មោះ ZHOU HAO RAN ភេទប្រុស អាយុ25ឆ្នាំ ជនជាតិចិន មុខរបរមិនពិតប្រាកដ  និង គ្មានលិខិតឆ្លងដែនហើយធ្វើតេស្តមានសារធាតុញៀន។

សមត្ថកិច្ចបានអោយដឹងថា វត្ថុតាងចាប់យកអាវុធខ្លី ម៉ាកK59 ចំនួន០១ដើម , ទូរស័ព្ទម៉ាក់ IPHONE ចំនួន 03 គ្រឿង និងកាតបន្ទប់ស្នាក់នៅចំនួន 01 សន្លឹក។ ចំពោះអាវុធខ្លីម៉ាកK59 ជនសង្ស័យបានយកទៅភ្លុងចោលនៅក្នុងកន្ត្រកដាក់សំរាម នៅក្នុងហាងបាយចិនមួយកន្លែងក្បែរកន្លែងកើតហេតុ  បន្ទាប់មក សមត្ថកិច្ចបានទៅរកឃើញ និងបានធ្វើកំណត់ហេតុចាប់យកដើម្បីចាត់ការតាមនីតិវិធី។

គួររំលឹកផងដែរថា កាលពី​វេលា​ម៉ោង​៨យប់​ ថ្ងៃទី​១០​ ខែ​កុម្ភៈ​ ឆ្នាំ​២០២៦ ​​ជនជាតិ​បរទេស​បានរត់​ចូលក្នុង​រថយន្ដ​តាក់ស៊ី​ជាមួយ​គូរ​ស្នេហ៍​មួយ​គូរ ​រួច​ដក​កាំភ្លើង​បាញ់​មួ​យគ្រាប់​បណ្ដាល​ឲ្យ​ត្រូវ​នារី​ស្រស់​ស្អាត​ម្នាក់​រងរបួស​ធ្ងន់​នៅមុខ​អគារ​ The Peak ស្ថិតក្នុងសង្កាត់​ទន្លេ​បាសាក់​ ខណ្ឌ​ចំការមន​ រាជធានី​ភ្នំពេញ​។

បច្ចុប្បន្នជនសង្ស័យខាងលើរួមនិងវត្ថុតាងបញ្ជូនមកការិយាល័យជំនាញព្រហ្មទណ្ឌនៃស្នងការដ្ឋាននគរបាលរាជធានីភ្នំពេញ ដើម្បីចាត់ការតាមនីតិវិធី៕ អត្ថបទ ៖ រដ្ឋា