សន្តិសុខសង្គម

អាជ្ញាធរខេត្តកោះកុង ចាត់កម្លាំងឃ្លាំមើលការចូលទន្ទ្រានដីរដ្ឋធ្វើជាកម្មសិទ្ធិ ពីសំណាក់ជនខិលខូច

បានផុស

៤ សប្តាហ៍ មុន

នៅ

ថ្ងៃពុធ ៨ កុម្ភៈ ២០២៣

ដោយ

ក្រោយការចុះអនុវត្តវិធានការច្បាប់ទៅលើខ្ទមអនាធិបតេយ្យសង់លើដីបម្រុងរបស់រដ្ឋ និងក្រុមហ៊ុនឯកជន អាជ្ញាធរខេត្តកោះកុង បានចាត់កម្លាំងជំនាញចុះឃ្លាំមើល និងបង្ក្រាបរាល់សកម្មភាពរបស់ក្រុមជនខិលខូចដែលទន្ទ្រានគ្មានការអនុញ្ញាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ម្សិលមិញនេះ តំណាងអយ្យការអមសាលាដំបូងខេត្ត អាជ្ញាធរ មន្ទីរជំនាញ និងអាជ្ញាធរពាក់ព័ន្ធផ្សេងទៀត បានចូលរុះរើខ្ទមដែលសង់បែបអនាធិបតេយ្យលើដីបម្រុងទុករបស់រដ្ឋ និងលើដីក្រុមហ៊ុនឯកជន ស្ថិតនៅឃុំជ្រោយប្រស់ ស្រុកកោះកុង។ ក្រោយការជូនដំណឹងដល់ម្ចាស់ខ្ទមទាំង ៧៥ នោះស្ម័គ្រចិត្តរុះរើដោយខ្លួនឯង ប៉ុន្តែពួកគាត់មិនសហការ។

លោក សុខ សុទ្ធី អភិបាលរងខេត្តកោះកុង ដែលជាអ្នកដឹកនាំអនុវត្តវិធានការច្បាប់នេះ បានឲ្យដឹងកាលពីល្ងាចថ្ងៃទី ៧ ខែកុម្ភៈ ឆ្នាំ ២០២៣ យ៉ាងដូច្នេះថា ការចូលលួចតាំងទីលំនៅជាខ្ទមតូច ធ្វើឡើងតាមការបំផុសបំផុលរបស់ក្រុមដែលតែងកេងផលប្រយោជន៍ពលរដ្ឋទៅប្រព្រឹត្តខុសច្បាប់ ក្រោមហេតុដីនឹងកាត់ឆ្វៀលបែងចែកជូន។

លោកអភិបាលរងខេត្ត គូសបញ្ជាក់ថា អាជ្ញាធរនឹងបង្កើនការការពារពង្រឹងល្បាតឃ្លាំមើលរាល់សកម្មភាពក្រុមជនខិលខូចដែលនៅតែបំណងចង់បានដីរបស់រដ្ឋធ្វើជាកម្មសិទ្ធិ។ ដោយឡែកក្រុមហ៊ុនឯកជនដែលទទួលសិទ្ធិសម្បទានវិនិយោគពីរាជរដ្ឋាភិបាល ក៏ត្រូវធ្វើទីស្នាក់នៅ និងមានបុគ្គលិកប្រចាំការការពារដីរបស់ខ្លួនផងដែរ។

គួរកត់សម្គាល់ថា ទាំងដីបម្រុងរដ្ឋស្ថិតនៅក្នុងឃុំជ្រោយប្រស់ និងដីសម្បទានសេដ្ឋកិច្ចរបស់ក្រុមហ៊ុន Greenrich Group មានផ្ទៃដីសរុបជាង ១០ ម៉ឺនហិកតា កន្លងទៅមានពលរដ្ឋក្នុងមូលដ្ឋាន និងក្រៅមូលដ្ឋាន បាននាំគ្នាចូលធ្វើខ្ទមលើដីដោយគ្មានការអនុញ្ញាត ក្រោមហេតុគ្មានដីធ្លីអាស្រ័យ។

ត្រង់បញ្ហានេះ ត្រូវបានអាជ្ញាធរខេត្តកោះកុង អះអាងថា ពួកគាត់មានដីធ្លីអាស្រ័យត្រឹមត្រូវ តែដោយជឿតាមការញុះញង់របស់ក្រុមដែលកេងផលចំណេញបំផុសបំផុលឲ្យធ្វើទង្វើខុសច្បាប់ រួចចែងប្រយោជន៍គ្នា (អ្នកឈ្នះបានដី អ្នកចាញ់បានលុយ)។ ករណីពលរដ្ឋទាំងនោះគ្មានដីពិតប្រាកដ អាជ្ញាធរនឹងស្រាវជ្រាវលម្អិត ដើម្បីស្វែងរកដំណោះស្រាយជូន។

តាមច្បាប់ស្ដីពីការគ្រប់គ្រង ការប្រើប្រាស់ និងការចាត់ចែងលើទ្រព្យសម្បត្តិរដ្ឋ ត្រង់មាត្រា ៨១ ចែងថា ៖ រាល់អំពើរំលោភកាន់កាប់ទ្រព្យសម្បត្តិរដ្ឋ ជាអចលនទ្រព្យដោយខុសច្បាប់ដូចមានចែងក្នុងមាត្រា ៧១ ត្រូវផ្ដន្ទាទោសដាក់ពន្ធនាគារពី ២ (ពីរ)ឆ្នាំ ដល់ ៥ (ប្រាំ)ឆ្នាំ និងពិន័យជាប្រាក់ពី ៤ ០០០ ០០០ (បួនលាន) រៀល ដល់ ១០ ០០០ ០០០ (ដប់លាន) រៀល៕

អត្ថបទ ៖ សិរីវឌ្ឍនៈ