អគ្គិភ័យឆេះអាគារកាស៊ីណូ ប៉ារីសបូព៌ា នៅក្រុងបាវិត

ការដឹកនាំបញ្ជាផ្ទាល់ពីសំណាក់ឯកឧត្តម ម៉ែន វិបុល អភិបាលខេត្តស្វាយរៀងបានអន្តរាគមន៍បាញ់ពន្លត់ អគ្គិភ័យ ករណីឆេះអាគារ ជាន់ទី ០៦ នៃ កាស៊ីណូ ប៉ារីសបូព៌ា ស្ថិតនៅក្រុងបាវិត ខេត្តស្វាយរៀង កាលពីវេលាម៉ោង ៦ នាទីល្ងាច ថ្ងៃទី ០២ ខែមីនា ឆ្នាំ ២០២៣ រហូតដល់វេលាម៉ោង ១១ យប់ ទើបរលត់ទាំងស្រុង ខណៈសមត្ថកិច្ចបានជម្លៀសមនុស្សចេញអស់ មិនបណ្តាលឱ្យមានមនុស្សរងគ្រោះនោះទេ។

កិច្ចអន្តរាគមន៍ជួយសង្គ្រោះ និងពន្លត់អគ្គីភ័យខាងលើ គឺកិច្ចសហការល្អ និងទាន់ពេលវេលា ពីកងកម្លាំងនគរបាល កម្លាំងកងរាជអាវុធហត្ថ អាជ្ញាធរសមត្ថកិច្ចពាក់ព័ន្ធ ប្រជាការពារ និងកម្លាំងអន្តរាគមន៍ពន្លត់អគ្គិភ័យរបស់មន្ទីរនគរបាលស្រុក​បេនកូវ ខេត្តតៃនិញ ប្រទេសវៀតណាម ទើបអាចគ្រប់គ្រងបាននៅវេលាម៉ោងប្រមាណ ៨ នាទីយប់ និង រលត់ទាំងស្រុង នៅវេលាម៉ោង ១១៖ ៣០ នាទីយប់ ប្រើប្រាស់កម្លាំងសរុបចំនួន ១៩២នាក់ ក្នុងនោះកម្លាំងនគរបាលចំនួន ១៣២ នាក់, កម្លាំងកងរាជអាវុធហត្ថ ៥២ នាក់ កម្លាំងអន្តរាគមន៍ពន្លត់អគ្គិភ័យរបស់មន្ទីរនគរបាលស្រុកបេនកូវ ខេត្តតៃនិញ ប្រទេសវៀតណាម ០៨ នាក់ និងកម្លាំងពាក់ព័ន្ធជាច្រើនទៀត។

ដោយក្នុងប្រតិបត្តិការនោះ ដោយប្រើប្រាស់រថយន្តស្ទូច ០២គ្រឿង រថយន្តពន្លត់អគ្គិភ័យ ១៨គ្រឿង និងរថយន្តដឹកទឹកជំនួយ ០១គ្រឿង៕

អត្ថបទ៖ ភក្ដី