ជ្រូកប្រមាណជិត៤០ក្បាល បានងាប់រដូករណែលពេញដី បន្ទាប់ពីមានអគ្គិភ័យមួយបានឆាបឆេះទៅលើកសិដ្ឋាន ដែលចិញ្ចឹមជ្រូកទាំងនោះទាំងព្រលឹម។

ហេតុការណ៍នេះបានកើតឡើងនៅថ្ងៃទី១៥ ខែមីនា ឆ្នាំ២០២៣ វេលាម៉ោង៥ព្រឹក នៅចំណុចក្រុម១៧  ឃុំសំរោងក្នុង ស្រុកឯកភ្នំ ខេត្តបាត់ដំបង ដោយមានករណីគ្រោះអគ្គីភ័យមួយបានកើតឡើងបណ្តាលអោយឆេះរោងកសិដ្ឋានចិញ្ចឹមជ្រូក ដែលមានបណ្តោយ៤០ម៉ែត្រ និងទទឹង២០ម៉ែត្រ។

តាមការរៀបរាប់ពីម្ចាស់កសិដ្ឋានឈ្មោះ អៀង អេង ភេទប្រុស អាយុ៧០ឆ្នាំ រស់នៅភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង បានបញ្ជាក់ថា នៅក្នុងរោងកសិដ្ឋានទាំងមូលនោះមានជ្រូកទាំងអស់៧០ក្បាល សុទ្ធសឹងជាជ្រូកសាច់ទាំងអស់ ហើយក៏មានទម្ងន់ធំៗគ្រាន់បើដែរហើយ។

ម្ចាស់បានបន្តទៀតថា នៅពេលទៀបភ្លឺក៏ស្រាប់តែមានអណ្តាតភ្លើងបានឆាបឆេះរោងទាំងមូលតែម្តង ដោយមិនអាចទប់ស្កាត់បានឡើយ រហូតធ្វើអោយរោងកសិដ្ឋានរបស់លោកឆេះខ្ទេចដល់ដី និងធ្វើអោយជ្រូកងាប់សរុប៣៨ក្បាល ដែលមូលហេតុឆេះ បើតាមការសន្និដ្ឋានគឺបណ្តាលមកពីទុស្សេខ្សែភ្លើង ទើបបង្កទៅជាអគ្គិភ័យបែបនេះ៕

អត្ថបទ៖ សោ និយមរ័ត្ន