ចាប់ខ្លួនឧត្តមសេនីយ៍ផ្កាយពីរម្នាក់ពីបទឆបោកប្រាក់ជាង៥ម៉ឺនដុល្លារ

កម្លាំងនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ នៅព្រឹកថ្ងៃទី១៨ ខែមីនា ឆ្នាំ២០២៤នេះ បានចាប់ខ្លួនលោកឧត្តមសេនីយ៍ទោ អេង សាវឿន អនុប្រធាននាយកដ្ឋាន ទទួលបន្ទុកការិយាល័យបច្ចេកទេស និងបង្ការអគ្គិភ័យ (ក២) ពីបទឆបោកប្រាក់ជាង៥ម៉ឺនដុល្លារអាមេរិក រឿងរត់ការចូលក្របខណ្ឌនគរបាលជាតិ។

ការចាប់ខ្លួនលោកឧត្តមសេនីយ៍ទោ អេង សាវឿន នេះបានធ្វើឡើងតាមដីកាឲ្យនាំខ្លួនរបស់លោក ហម ម៉េងសែ ចៅក្រមស៊ើបសួរសាលាដំបូងរាជធានីភ្នំពេញ។ នេះបើតាមលោកវរសេនីយ៍ឯក សំ វិច្ឆិកា អ្នកនាំពាក្យនៃស្នងការដ្ឋាននគរបាលរាជធានីភ្នំពេញ ប្រាប់ កម្ពុជាថ្មី នៅមុននេះ។

លោកវរសេនីយ៍ឯក សំ វិច្ឆិកា ថា ការចាប់ខ្លួនលោកឧត្តមសេនីយ៍ទោ អេង សាវឿន មានអាយុ៥៤ឆ្នាំ ជាមន្ត្រីនគរបាលពាក់ព័ន្ធករណីឆបោក ខណៈកម្លាំងជំនាញបាននិងកំពុងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធីច្បាប់៕

អត្ថបទ៖ សុខុម