ក្មេងទំនើងកាប់គ្នា៖ អ្នកចាញ់ជួបពេទ្យ អ្នកឈ្នះជួបប៉ូលិស

ក្មេងទំនើងពីរក្រុមបង្កបានដេញកាប់គ្នាប្រសាចដូចនៅក្នុងរឿងចិនហុងកុង បណ្តាលឲ្យភាគីម្ខាងជាអ្នកចាញ់បានរងរបួសធ្ងន់ រីឯអ្នកឈ្នះបានរត់គេចខ្លួនមួយយប់ ព្រឹកឡើងត្រូវបានសមត្ថកិច្ចចាប់វាយខ្នោះ។

ហេតុការណ៍បង្កហឹង្សានេះបានកើតឡើង នៅវេលាម៉ោង២០និង២០នាទីយប់ ថ្ងៃទី១៦ ខែមេសា ឆ្នាំ២០២៤ នៅកែងវត្តភូមិហ្វាំង ស្ថិតនៅក្នុងភូមិហ្វាំង ឃុំប៉ុង ស្រុកវើនសៃ។

សមត្ថកិច្ចបានឲ្យដឹងថា បក្សទី១ មានគ្នាចំនួន២នាក់ គឺទី១ មានឈ្មោះ ខុំ សម្បត្តិ ភេទប្រុស អាយុ២៩ឆ្នាំ ជនជាតិខ្មែរ មុខរបរមិនពិតប្រាកដត្រូវបក្សទី២ កាប់បណ្ដាលឱ្យរងរបួសធ្ងន់ ឯទី២ ឈ្មោះ ស៊ុក គុននី ជាសហចារី ភេទប្រុស អាយុ១៧ឆ្នាំ ជាជនជាតិឡាវមុខរបរកសិករ។អ្នកទាំងពីរនាក់ មានទីលំនៅបច្ចុប្បន្ន ភូមិភ្នំកុកឡាវ ឃុំភ្នំកុក ស្រុកវើនសៃ ខេត្តរតនគិរី។

ចំណែកឯបក្សទី២  បក្សជនដៃដល់ គឺមានគ្នាចំនួន២នាក់ គឺទី១ មានឈ្មោះ នីន តាំងលី ភេទប្រុស អាយុ២៣ឆ្នាំជនជាតិខ្មែរ មុខរបរកម្មករ បូមខ្សាច់ ជាអ្នកកាប់ផ្ទាល់លើបក្សទី១  និងដៃគូរជាសហចារី ឈ្មោះ សឿន រៀប ភេទប្រុស អាយុ២១ឆ្នាំ ជនជាតិខ្មែរ មុខរបរកម្មករ បូមខ្សាច់។ ជនទាំង២នេះ  មានទីលំនៅបច្ចុប្បន្នភូមិបានហ្វាំង ឃុំប៉ង ស្រុកវើនសៃ ខេត្តរតនគិរី។

តាមការឱ្យដឹងរបស់សមត្ថកិច្ច គឺនៅយប់ថ្ងៃកើតហេតុ ក្រោយពីបង្កហិង្សារួច ក្មេងទំនើងទាំងពីរបក្សនេះ បាននាំគ្នារត់គេចខ្លួនបាត់ស្រមោល។  បន្ទាប់មកនៅវេលាម៉ោង៨ព្រឹក ថ្ងៃទី១៧ ខែមេសា ឆ្នាំ២០២៤ សមត្ថកិច្ចជំនាញបានចុះស្រាវជ្រាវឃាត់ខ្លួនក្រុមក្មេងទំនើងពីរបក្សជាបន្តបន្ទាប់ និងបញ្ជូនមកកាន់ការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្ត ដើម្បីចាត់ការបន្តទៅតាមនីតិវិធីច្បាប់៕

ដោយ៖  វុទ្ធឦសាន