ភ្លៀងធំយប់មិញ ខណ្ឌចំនួន៣ក្នុងរាជធានីភ្នំពេញ​រងការជន់លិច

ក្រោយភ្លៀងធ្លាក់មួយមេដ៏ធំកាលពីយប់មិញ មន្រ្តីជំនាញនៃមន្ទីរសាធារណៈការ និងដឹកជញ្ជូន រាជធានីភ្នំពេញ បានបញ្ជាក់ថា មូលដ្ឋានខណ្ឌមួយចំនួនក្នុងភូមិសាស្ត្ររាជធានីភ្នំពេញ មានការជន់លិចមិនទាន់ស្រកអស់នៅឡើយ។

លោក សាំ ពិសិដ្ឋ ប្រធានមន្ទីរសាធារណៈការ និងដឹកជញ្ជូន រាជធានីភ្នំពេញ បានបញ្ជាក់នៅរសៀលថ្ងៃទី៩ ខែសីហា ឆ្នាំ២០២៤នេះថា ដោយសារឥទ្ធិពលព្យុះយប់មិញ ភ្លៀងធ្លាក់ខ្លាំងរហូតដល់កំពស់ ១៤០ មម ធ្វើអោយតំបន់ខណ្ឌសែនសុខ ខណ្ឌឫស្សីកែវ និងខណ្ឌទួលគោក រងការជនលិចទឹក។ ដំណើរការបូមទឹកនៅស្ថានីយ៍កប់ស្រូវឃើញថា នីវ៉ូទឹកបាននិងកំពុងធ្លាក់មកត្រឹម +6.60 m ដែលនឹងស្រកចុះជាបន្តបន្ទាប់នៅល្ងាចនេះបើគ្មានភ្លៀងបន្ថែម។

ក្នុងពេលនេះ ស្ថានីយ៍បូមទឹក គីឡូម៉ែត្រ ៩ ស្វាយប៉ាក បានសាងសង់សម្រេចបាន ៩៥% ដែលនឹងដាក់អោយដំណើរការនៅពេលខាងមុខដែលមានសមត្ថភាពបូមទឹក ៨ ម៉ែត្រគូបក្នុង១វិនាទី បន្ថែមលើសមត្ថភាពបូមទឹកកប់ស្រូវ ១៥ ម៉ែត្រគូបក្នុង១វិនាទី ។ ស្ថានភាពទឹកលិចនេះ បណ្តាលមកកម្រឹតទឹកភ្លៀងមានបរិមាណទឹកច្រើនហួសពីការបូមទឹកបញ្ចេញក្រៅទំនប់៕

អត្ថបទ៖ សុភា