មន្ទីរសុខាភិបាលរាជធានីឲ្យម្ចាស់សេវាឯកជនរាយការណ៍បើមានអ្នកតាំងខ្លួនជាមន្ត្រីសុខាភិបាលចុះពិនិត្យទីតាំងដោយមិនមានលិខិតឧទ្ទេសនាម

មន្ទីរសុខាភិបាលរាជធានីភ្នំពេញ នៅព្រឹកថ្ងៃទី១១ ខែកញ្ញា ឆ្នាំ២០២៤នេះ បានអំពាវនាវដល់ម្ចាស់ ឬអ្នកគ្រប់គ្រង មន្ទីរពហុព្យាបាល មន្ទីរសម្រាកព្យាបាល និងមូលដ្ឋានសេវាសុខាភិបាលឯកជនទាំងអស់ ត្រូវរាយការណ៍មកសមត្ថកិច្ចបើមានបុគ្គណាតាំងខ្លួនជាមន្ត្រីសុខាភិបាលចុះពិនិត្យទីតាំងដោយមិនមានលិខិតឧទ្ទេសនាម។ ការអំពាវនាវនេះ ធ្វើឡើងបន្ទាប់ពីមានបុគ្គលម្នាក់ ឬពីរនាក់បានតាំងខ្លួនជាមន្ត្រីសុខាភិបាលមកពីក្រសួងសុខាភិបាល​ធ្វើសកម្មភាពចុះពិនិត្យទីតាំងមន្ទីរពហុព្យាបាល មន្ទីរសម្រាកព្យាបាល និងមូលដ្ឋានសេវាសុខាភិបាលឯកជននៅក្នុងមូលដ្ឋានរាជធានីភ្នំពេញ ហើយបានសុំថវិកាជាថ្នូរនឹងការមិនចុះពិនិត្យ។

យោងតាមលិខិតចូនដំណឹងរបស់មន្ទីរសុខាភិបាលរាជធានីភ្នំពេញ បានឲ្យដឹងថា ក្នុងសប្តាហ៍កន្លងមកនេះ មានបុគ្គលម្នាក់ ឬពីរនាក់ បានតាំងខ្លួនជាមន្ត្រីសុខាភិបាលមកពីក្រសួងសុខាភិបាល ធ្វើសកម្មភាព ដោយចុះមកពិនិត្យទីតាំងមន្ទីរពហុព្យាបាល មន្ទីរសម្រាកព្យាបាល និងមូលដ្ឋានសេវាសុខាភិបាលឯកជននៅក្នុងមូលដ្ឋានរាជធានីភ្នំពេញ ហើយបានសុំថវិកាជាថ្នូរនឹងការមិនចុះពិនិត្យ។

តាមរយៈលិខិតជួនដំណឹង ប្រសិនបើម្ចាស់ ឬអ្នកគ្រប់គ្រង មន្ទីរពហុព្យាបាល មន្ទីរសម្រាកព្យាបាល និងមូលដ្ឋានសេវាសុខាភិបាលឯកជន បានជួបករណីនេះ សូមសួរនាំរកលិខិតឧទ្ទេសនាមឱ្យចុះមកបំពេញការងារ។ បើគ្មានលិខិតឧទ្ទេសនាមទេ ម្ចាស់ ឬអ្នកគ្រប់គ្រង មន្ទីរពហុព្យាបាល មន្ទីរសម្រាកព្យាបាល និងមូលដ្ឋានសេវាសុខាភិបាលឯកជន ត្រូវឃាត់ខ្លួនបុគ្គលនោះ រួចជូនដំណឹងមកមន្ត្រីមានសមត្ថកិច្ចដូចជា ប៉ូលីសប៉ុស្តិ៍ ឬអាជ្ញាធរសង្កាត់ ឬមកមន្ទីរសុខាភិបាលនៃរដ្ឋបាលរាជធានីភ្នំពេញ (លេខទូរស័ព្ទទំនាក់ទំនង៖ 012 913 041 ឬ 012 938 087)។

ជាមួយនឹងការជូនដំណឹងនេះ មន្ទីរសុខាភិបាល នៃរដ្ឋបាលរាជធានីភ្នំពេញ សង្ឃឹមយ៉ាងមុតមាំថា បុគ្គលក្លែងបន្លំនឹងបញ្ឈប់សកម្មភាពល្មើសច្បាប់នេះ៕

អត្ថបទ៖ ស្រីរ័ត្ន