លោក សាំ ពិសិដ្ឋ៖ ការបាក់ស្រុតផ្លូវបេតុងនៅសង្កាត់ស្ទឹងមានជ័យទី២ ដោយសារទឹកហូរច្រោះខាងក្រោមផ្លូវ

លោក សាំ ពិសិដ្ឋ ប្រធានមន្ទីរសាធារណការណ៍រាជធានីភ្នំពេញ បានបញ្ជាក់នៅរសៀលថ្ងៃទី២៣កញ្ញានេះថា ការបាក់ស្រុតផ្លូវបេតុងនៅប្រឡាយស្ទឹងមានជ័យ ដោយសារទឹកហូរច្រោះដីខាងក្រោមផ្លូវ ធ្វើអោយដីទន់ជ្រាយរអិលទាំងតួថ្នល់ និងបេតុង។ លោកបញ្ជាក់ថា ផ្លូវដែលត្រូវបាក់ស្រុតនេះមានប្រវែង ១៤៦ម៉ែត្រ និងទទឹង៥ម៉ែត្រ។

តាមការដឹងពីអ្នករស់នៅជាប់ផ្លូវបេតុងនេះបានប្រាប់អោយដឹងថា មុនមានករណីបាក់ស្រុតនេះ ពួកគាត់បានឮសំឡេងខ្លាំង ខណៈនោះគាត់បានចេញមកមើល ក៏ឃើញផ្លូវបេតុងមួយខ្សែនេះ បាក់ស្រុតចុះទៅក្រោម និងមានប្រវែងប្រមាណជាង ១០០ម៉ែត្រ។

ប្រភពដដែលបន្តថា ការបាក់ស្រុតផ្លូវបេតុងនេះ គឺកើតឡើងបន្ទាប់ពីមានការកាយស្តារប្រឡាយរយៈជាង១០ថ្ងៃមុន និងមានជម្រៅជ្រៅជាងឆ្នាំមុនៗ។ ទោះបីយ៉ាងណា បន្ទាប់ពីមានការបាក់ស្រុតផ្លូវបេតុងមួយខ្សែនេះ អាជ្ញាធរបានដាក់ស្លាកសញ្ញាហាមឃាត់ដើម្បីបញ្ចៀសការគ្រោះថ្នាក់ជាយថាហេតុ និងដាក់គ្រឿងចក្រដើម្បីពន្លឿនការជួសជុលផងដែរ។

សូមបញ្ជាក់ថា ករណីបាក់ស្រុតនេះដែរបង្កភ្ញាក់ផ្អើលកាលពីវេលាម៉ោង២រសៀល ថ្ងៃទី២៣ ខែកញ្ញា ឆ្នាំ២០២៤ នៅតាមបណ្តោយមាត់ប្រឡាយលូស្ទឹងមានជ័យ ក្នុងសង្កាត់ស្ទឹងមានជ័យទី០២ ខណ្ឌមានជ័យ រាជធានីភ្នំពេញ៕

អត្ថបទ៖ រដ្ឋា