សន្តិសុខសង្គម

Update ៖ អគ្គិភ័យឆាបឆេះផ្ទះ ០៨ ខ្នង និងរងរបួសក្រុមពន្លត់អគ្គិភ័យកាណូតម្នាក់ នៅខណ្ឌឫស្សីកែវ

បានផុស

៦ ខែ មុន

នៅ

ថ្ងៃអាទិត្យ ២៩ កញ្ញា ២០២៤

ដោយ

អគ្គិភ័យបានឆាបឆេះផ្ទះឈើប្រក់ស័ង្កសី ចំនួន ០៨ ខ្នង បណ្តាលឲ្យរងរបួសក្រុមពន្លត់អគ្គិភ័យកាណូតម្នាក់ នៅចំណុចទល់មុខនឹងវិហារឥស្លាម គីឡូម៉ែត្រលេខ ០៩ (ម្តុំយឿត្រី) ផ្អើលប្រជាពលរដ្ឋ និងសមត្ថកិច្ចជួយបាញ់ពន្លត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ១២ និង ១០ នាទី ថ្ងៃត្រង់ ថ្ងៃទី ២៩ ខែកញ្ញា ឆ្នាំ ២០២៤ នេះ ស្ថិតតាមបណ្ដោយផ្លូវជាតិលេខ ០៥ ក្នុងសង្កាត់ច្រាំងចំរេះទី ០១ ខណ្ឌឫស្សីកែវ រាជធានីភ្នំពេញ។

នៅក្នុងហេតុការណ៍នេះបណ្តាលឲ្យក្រុមពន្លត់អគ្គិភ័យកាណូតម្នាក់ ឈ្មោះ ស្មាស់ ការីម ភេទប្រុស អាយុ ៤៧ ឆ្នាំ រងរបួស។

ប្រភពពីប្រជាពលរដ្ឋខ្មែរឥស្លាមរស់នៅតំបន់នោះបានប្រាប់ឲ្យដឹងថា គេឃើញមានផ្សែងហុយខ្មួលខ្មាញ់យ៉ាងសន្ធោសន្ធៅចេញពីផ្ទះរបស់ពលរដ្ឋដែលត្រូវបានជន់លិចដោយជំនន់ទឹកទន្លេ ឆេះរាលដាលទៅផ្ទះក្បែរខាងចំនួន ០៧ ខ្នង បន្ថែមទៀត។ ភ្លាមៗ ប្រជាពលរដ្ឋបានរាយការណ៍ជូនសមត្ថកិច្ចចុះមកជួយអន្តរាគមន៍ ដើម្បីពន្លត់ឲ្យទាន់ពេលវេលា។

អគ្គិភ័យនេះបានឆាបឆេះផ្ទះចំនួន ០២ ខ្នង ទាំងស្រុង និងរាលដាលដល់ផ្ទះក្បែរខាងចំនួន ០៦ ខ្នងបន្ថែមទៀត ខូចខាតជាង ៣០ ភាគរយ ប្រើប្រាស់រថយន្តពន្លត់របស់ការិយាល័យចំនួន ០៥ គ្រឿង និងកាណូតអគ្គិភ័យចំនួន ០៣ គ្រឿង ទើបបាញ់រលត់។ ចំពោះមូលហេតុប្រជាពលរដ្ឋបានដាក់ការសង្ស័យថា ឆ្លងចរន្តអគ្គិសនីចេញពីផ្ទះលិចទឹក។

ជាមួយគ្នានេះដែរ លោកវរសេនីយ៍ឯក ព្រហ្ម យ៉ន នាយការិយាល័យបង្ការ និងពន្លត់អគ្គិភ័យ ក៏បានសំណូមពរ និងក្រើនរំលឹកទៅដល់ប្រជាពលរដ្ឋនាក្នុងឱកាសរដូវបុណ្យភ្ជុំនេះដែរ មេត្តាបង្កើននូវការប្រុងប្រយ័ត្នឲ្យបានខ្ពស់ ពាក់ព័ន្ធភ្លើងធូបទៀន ឬប្រអប់ភ្លើង ត្រូវពិនិត្យឲ្យបានជាក់លាក់ មុនចាកចេញពីផ្ទះទៅកាន់ស្រុកកំណើត ដើម្បីការពារទ្រព្យសម្បត្តិ ជៀសវាងមានការឆាបឆេះណាមួយកើតមានឡើង៕

អត្ថបទ ៖ រដ្ឋា