អគ្គិភ័យឆេះផ្ទះ១ខ្នងស្ទើរទាំងស្រុងនៅផ្លូវ២០០៤

ផ្ទះប្រជាពលរដ្ឋមួយខ្នងធ្វើអំពីថ្មប្រក់ស័ង្កសី ត្រូវបានអគ្គិភ័យឆាបឆេះបណ្តាលអោយខូចខាតស្ទើរទាំងស្រុង ផ្អើលសមត្ថកិច្ច និងពលរដ្ឋអន្តរាគមន៍។

ហេតុការណ៍នេះបង្កភ្ញាក់ផ្អើលកាលពីវេលាម៉ោង៦និង៤៦នាទី យប់ថ្ងៃទី៧ ខែវិច្ឆិកា ឆ្នាំ២០២៤ នៅចំក្បែរស្តុបណ័រប្រ៊ីត តាមបណ្តោយផ្លូវ២០០៤ ក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ។

តាមប្រភពព័ត៍មានពីពលរដ្ឋក្បែរផ្ទះកើតហេតុបានអោយដឹងថា មុនកើតហេតុ មានក្លិនឈ្ងៀមចេញពីផ្ទះកើតហេតុ ខណៈនោះប្រជាពលរដ្ឋបានស្រែកឆោរឡោរផ្អើលអ្នកនៅក្បែររត់ចេញមកមើលក៏ឃើញមានផ្សែងហ៊ុយ លាយអណ្តាតភ្លើងឆាបឆេះផ្ទះយ៉ាងសន្ធោសន្ធៅ។ ស្របពេលនោះប្រជាពលរដ្ឋបាននាំគ្នាព្យាយាមយកទុយោទឹកបាញ់ពន្លត់ដែរ តែស្ថានភាពឆាបឆេះកាន់តែធ្ងន់ធ្ងរ ទើបរាយការណ៍ជូនសមត្ថកិច្ចចុះមកអន្តរាគមន៍អោយទាន់ពេលវេលា ដើម្បីការពាររាលដាលដល់ផ្ទះក្បែរខាង។

អគ្គិភ័យនេះដែរបានឆាបឆេះផ្ទះថ្មប្រក់ស័ង្កសីចំនួន១ខ្នងស្ទើរទាំងស្រុង និងបានប្រើប្រាស់រថយន្តពន្លត់អគ្គិភ័យ របស់ស្នងការរាជធានីភ្នំពេញ ចំនួន០៥គ្រឿង បាញ់អោយរលត់ជាស្ថាពរ។ ចំពោះមូលហេតុ សមត្ថកិច្ចសង្ស័យថា អាចបណ្តាលមកពីឆ្លងចរន្តអគ្គិសនី៕

អត្ថបទ៖ រដ្ឋា