កម្លាំងនគរបាលព្រហ្មទណ្ឌកម្រិតស្រាល ខេត្តរតនគិរី ឃាត់ខ្លួនក្មេងទំនើងម្នាក់ ករណីបង្ហោះវីដេអូបង្ហាញដាវ

កម្លាំងនគរបាលព្រហ្មទណ្ឌកម្រិតស្រាល ខេត្តរតនគិរី ឃាត់ខ្លួនក្មេងទំនើង នៅស្រុកអណ្តូងមាស ពាក់ព័ន្ធករណីបង្ហោះវីដេអូ បង្ហាញដាវនៅបណ្តាញសង្គម។

កាលពីថ្ងៃទី២៦ ខែកុម្ភៈ ឆ្នាំ២០២៥ ក្មេងទំនើងបានបង្ហោះវីដេអូ ដែលមានរូបភាពដាវ ស្លាកលេខម៉ូតូ និងសម្លេងដែលខ្លួនធ្វើសកម្មភាពនៅលើបណ្តាញសង្គម ទើបនៅថ្ងៃទី២៧ ខែកុម្ភៈ ឆ្នាំ២០២៥ កម្លាំងការិយាល័យជំនាញបានសហការជាមួយអធិការដ្ឋាននគរបាលស្រុកអណ្ដូងមាស និងអធិការដ្ឋាននគរបាលស្រុកបរកែវ បានចុះស្រាវជ្រាវពាក់ព័ន្ធករណីខាងលើ ដោយឃាត់ខ្លួនជនសង្ស័យចំនួន ១នាក់ ឈ្មោះ សេវ លាក់ ភេទ ប្រុស អាយុ ១៨ឆ្នាំ ជនជាតិច្រាយ មានទីលំនៅបច្ចុប្បន្នភូមិ តូច ឃុំ កក់ ស្រុក បរកែវ ខេត្តរតនគិរី។

ការបង្ក្រាបខាងលើ ដោយមានការយកចិត្តទុកដាក់ពីលោកឧត្តមសេនីយ៍ស្នងការ និងលោកស្នងការរងទទួលដឹកនាំការងារការិយាល័យនគរបាលព្រហ្មទណ្ឌកម្រិតស្រាល និងដោយមានការបញ្ជាផ្ទាល់ពីលោកនាយការិយាល័យនគរបាលព្រហ្មទណ្ឌកម្រិតស្រាល សហការជាមួយកម្លាំងអធិការដ្ឋាននគរបាលស្រុកអណ្តូងមាស និងអធិការដ្ឋាននគរបាលស្រុកបរកែវ ព្រមទាំងមានការសម្របសម្រួលនីតិវិធីដោយលោកព្រះរាជអាជ្ញារង អមសាលាដំបូងខេត្តរតនគិរី ទើបឈានដល់ការបង្ក្រាបករណី រក្សាទុក និងប្រើប្រាស់អាវុធខុសច្បាប់ (ដាវប្រវែង ៦៦ ស,ម) នេះ។

ចំពោះវត្ថុតាងចាប់យកបាន រួមមាន ដាវមានប្រវែង ៦៦ ស,ម ទទឹង ៥ហ៊ុន ទូរស័ព្ទដៃម៉ាក IPhone 7 Plus ពណ៌ខ្មៅ (សភាពចាស់) និងស្លាកលេខម៉ូតូចំនួន១។ ការិយាល័យនគរបាលព្រហ្មទណ្ឌកម្រិតស្រាល សូមបញ្ជាក់ថា: វិឌីអូរសកម្មភាព និងរូបថត គឺពីរដាច់ដោយឡែកពីគ្នា (វិឌីអូរកាត់តសំលេង និងបញ្ចូលរូបភាព)។

បច្ចុប្បន្នជនសង្ស័យ ត្រូវបានឃាត់ខ្លួនជាបណ្តោះអាសន្ន រួមទាំងវត្ថុតាង ត្រូវបានដកហូតទុក នៅការិយាល័យជំនាញ ដើម្បីកសាងសំណុំរឿងបញ្ជូនទៅកាន់អយ្យការអមសាលាដំបូងខេត្តរតនគិរី តាមនីតិវិធី៕

ដោយ៖ ខៀវ ចាប