Update ៖ ដឹងមូលហេតុ ដែលអគ្គិភ័យឆាបឆេះបណ្ដាលឱ្យក្មេងប្រុសស្រី២នាក់ស្លាប់

ភ្នំពេញ ៖ ក្មេងប្រុសស្រី០២នាក់ ដែលត្រូវបានអគ្គិភ័យឆាបឆេះស្លាប់​នោះ គឺព្រោះតែ​បើក​ហ្គាសចំអិនអាហារទុកចោល ហើយឆ្លៀតទៅដងទឹកនៅមាត់ច្រាំងទន្លេ នេះបើតាមប្រភពព័ត៌មាន។

ហេតុការណ៍នេះ​ បានកើតឡើងនៅវេលាម៉ោង ០៤ល្ងាច ថ្ងៃទី២៨​ ខែកុម្ភៈ ឆ្នាំ២០២៥ ដែលមានទីតាំងស្ថិតនៅតាមបណ្តោយផ្លូវជាតិលេខ៥​ ភូមិផ្សារតូច​ សង្កាត់ទួលសង្កែទី១ ខណ្ឌឬស្សីកែវ រាជធានីភ្នំពេញ។

​ប្រភព​ព័ត៌មានពីស្រ្តីជាម្តាយបាន​ឱ្យដឹងថា មុនកើតហេតុ គាត់​បាន​បើក​ហ្គាសចំអិនអាហារទុកចោល នៅកន្លែងស្នាក់នៅ នឹងបានទុកកូនតូចៗ០២នាក់ ដោយកូនប្រុសវ័យជាង០១ខួប ម្នាក់ នឹង កូនស្រីវ័យ០៥ខែម្នាក់ ទុក​នៅ​ក្បែរ​នោះ​រួច​បបួល​កូនប្រុសច្បងវ័យ០៤ឆ្នាំដើរទៅជួយដងទឹកនៅមាត់ច្រាំង ដើម្បី​យក​ទឹក​មក​ប្រើប្រាស់។

ខណៈដើរទៅដល់មាត់ច្រាំងបានបន្តិច ក៏ស្រាប់តែឮសម្លេងផ្ទុះចេញពីកន្លែងស្នាក់នៅ បង្ក​ឱ្យមានផ្សែងហ៊ុយឃ្មួលឃ្មាញ់ លាយលំអណ្តាតភ្លើងតែម្តង បង្ក​ឱ្យមានការភ្ញាក់ផ្អើលដល់ប្រជាពលរដ្ឋរាយការណ៍ជូនសមត្ថកិច្ច ដើម្បី​កុំ​ឱ្យមានការរាលដាលផងដែរ។

បន្ទាប់ពីដំណឹងភ្លាមៗ លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានបញ្ជាដល់កងកម្លាំងសមត្ថកិច្ចជំនាញ ឱ្យចេញជួយអន្តរាគមន៍បាញ់ទឹកពន្លត់ឱ្យទាន់ពេលវេលា កុំ​ឱ្យ​មាន​ការ​ឆាបឆេះ​បន្ត​ដល់​រោងចក្រ​ដែល​នៅ​ក្បែរ​នោះ។

ក្នុង​នោះ​បាន​ប្រើប្រាស់រថយន្តពន្លត់អគ្គិភ័យរបស់ការិយាល័យរាជធានីភ្នំពេញ ចំនួន០៣គ្រឿង ប្រើប្រាស់ទឹក​អស់០១ឡាន ស្មើនឹង០៦ម៉ែត្រគូប, រថយន្តជំនួយមកពីសាលាខណ្ឌឬស្សីកែវ ចំនួន០១គ្រឿង ពុំបានប្រើប្រាស់ទឹក៕

អត្ថបទ ៖ រដ្ឋា