Update៖ ករណីឆេះនៅខណ្ឌកំបូល គឺជាឃ្លាំងសិប្បកម្មផលិតស្មាច់

ករណីអគ្គិភ័យដែលឆេះនៅសង្កាត់កំបូល ខណ្ឌកំបូល កាលពីព្រឹកថ្ងៃទី៨ឧសភាព្រឹកមិញនេះ ទីតាំងឆេះគឺជាឃ្លាំងសិប្បកម្មផលិតស៊ីទែនផ្ទុកទឹកសំណល់ ដែលបណ្ដាលឲ្យឆេះខូចខាតសម្ភារៈក្រណាត់ស្មាច់មួយចំនួនធំ។ តាមការអះអាងរបស់សមត្ថកិច្ច ករណីនេះកើតឡើងដោយសារឆ្លងចរន្ដអគ្គិសនី។

សមត្ថកិច្ចបានបន្ថែមថា​ ទីតាំងខាងលេីមានទំហំទទឹង​ ៤០​ម៉ែត្រ និងបណ្តោយ៥០ម៉ែត្រ ជាប្រភេទឃ្លាំងដែក ជញ្ជាំងនិងដំបូលស័ង្ហសី។ ម្ចាស់ទីតាំងមានឈ្មោះ chi ជនជាតិចិន ភេទប្រុស អាយុ៣៤ឆ្នាំ ស្នាក់នៅកន្លែងកើតហេតុខាងលើ​។

តាមប្រភពពីកន្លែងកេីតហេតុបានឱ្យដឹងថា មុនពេលកេីតហេតុទីតាំងខាងលេីមិនមានកម្មករធ្វេីការនោះទេ ដោយចាក់សោខាងក្រៅ​ទុកចោល លុះមកដល់វេលាកេីតហេតុស្រាប់តែមានផ្សែងហុយចេញពីខាងក្នុងយ៉ាងខ្មួរខ្មាញ់ទេីបវាយសោចូល និងរាយការណ៍ទៅសមត្ថកិច្ចទាក់ទងហៅរថយន្តពន្លត់អគ្គិភ័យភ្លាមៗ​។

ក្រោយពីទទួលបានព័ត៌មាន កម្លាំងសមត្ថកិច្ច រថយន្តពន្លត់អគ្គិភ័យ បុរីសង្ឃឹមថ្មី រថយន្តអង្គភាព៩១១ ដែលនៅក្បែរនោះចេញអន្តរាគមន៍បាញ់ទឹកពន្លត់ភ្លាមៗ។ ក្នុងរវង្វង់ប្រតិបត្តិការអន្តរាគមន៍​ រថយន្តពន្លត់អគ្គិភ័យបានមកជួយអន្តរាគមន៍ពន្លត់ចំនួន ៨គ្រឿង ប្រើប្រាស់ទឹកចំនួន៥គ្រឿង រថយន្តស្នងការដ្ឋាននគរបាលរាជធានីភ្នំពេញចំនួន ៣គ្រឿង
រថយន្តសាលាខណ្ឌកំបូលចំនួន១គ្រឿង រថយន្តបុរីសង្ឃឹមថ្មីចំនួន១គ្រឿង រថយន្តទ័ពពិសេស ៩១១ចំនួន៣ គ្រឿង
ហេីយគ្រប់គ្រង់បានទាំងស្រុងនៅម៉ោង១២​ ថ្ងៃខែដដែល​ ចំពោះមូលហេតុបណ្តាលមកពីឆ្លងចរន្តអគ្គិសនី។

សូមបញ្ជាក់ថា ករណីអគ្គិភ័យនេះ បានកើតឡើងកាលពីវេលាម៉ោង១១ព្រឹក ថ្ងៃទី០៨ ខែឧសភា ឆ្នាំ២០២៥ នៅតាមផ្លូវបេតុង ភូមិគល់ សង្កាត់កន្ទោក ខណ្ឌកំបូល រាជធានីភ្នំពេញ​៕

អត្ថបទ៖ សុខា