កីឡា

ចប់ដំណាក់កាលទី១ ព្រះខ័នរាជស្វាយរៀង ឈ្នះច្រើនជាងគេ ខណៈភ្នំពេញក្រោន ចាញ់តិចជាងគេ

បានផុស

៣ ខែ មុន

នៅ

ថ្ងៃចន្ទ ២៣ កុម្ភៈ ២០២៦

ដោយ

ព្រះខ័នរាជស្វាយរៀង ជាក្រុមធ្វើបានល្អជាងគេនៅលីគបាល់ទាត់កំពូលកម្ពុជា រដូវកាល ២០២៥-២៦ បន្ទាប់ពីចប់ដំណាក់កាលទី១ ដោយកាន់តែសង្ឃឹមខ្ពស់ក្នុងការឆ្ពោះទៅរកការឈ្នះជើងឯក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លងកាត់ ២០ ប្រកួត ព្រះខ័នរាជស្វាយរៀង រកបាន ៥១ ពិន្ទុ ឈរលើកំពូលតារាង តាមរយៈការឈ្នះ ១៧ ប្រកួត និង ចាញ់ ៣ ប្រកួត។ ពួកគេ នាំមុខ ៥ ពិន្ទុលើ ភ្នំពេញក្រោន ដែលមាន ៤៦ ពិន្ទុ ពីការឈ្នះ ១៤ ស្មើ ៤ និងចាញ់។ ព្រះខ័នរាជស្វាយរៀង ជាក្រុមទទួលបានជ័យជម្នះច្រើនជាងគេ គឺឈ្នះ ១៧ ប្រកួត ប៉ុន្តែមិនធ្លាប់ស្មើឡើយ ខណៈ ភ្នំពេញក្រោន ជាក្រុមចាញ់តិចជាងគេ គឺ ២ ប្រកួត។

ជាមួយគ្នានេះ អង្គរថាយហ្គឺរ ពិតជាគួរឲ្យចាប់អារម្មណ៍ដែរ បន្ទាប់ពីជើងទី១ធ្វើបានយ៉ាងល្អ ហើយដើមជើងទី២ ធ្វើមិនសូវបានល្អ ប៉ុន្តែចុងជើងទី២ ពួកគេធ្វើបានល្អវិញ។ ក្រុមដែលមានមូលដ្ឋាននៅខេត្តសៀមរាប ដណ្តើមបានចំណាត់ថ្នាក់លេខ ៣ ក្នុងតារាង បន្ទាប់ពីឈ្នះ ១១ ស្មើ ៣ និងចាញ់ ៦។

ណាហ្គាវើលដ៍ ស្ថិតនៅចំណាត់ថ្នាក់លេខ ៤ មាន ៣៥ ពិន្ទុ ពីការឈ្នះ ១០ ស្មើ ៥ និងចាញ់ ៥ ហើយ បឹងកេត ស្ថិតនៅលេខ ៥ ដោយមាន ៣២ ពិន្ទុ ពីការឈ្នះ ៩ ស្មើ ៥ និងចាញ់ ៦។ ជាមួយគ្នានេះ អឹមអូអាយ កំពង់ដេវ៉ា ដណ្តើមបានកៅលេខ ៦ ដើម្បីបន្តដំណើរឆ្ពោះទៅការប្រជែងងជើងឯកជុំទី២។ ពួកគេមាន ៣០ ពិន្ទុ តាមរយៈការឈ្នះ ៨ ស្មើ ៦ និងចាញ់ ៦។

ក្រុមខ្លាំងទាំង ៦ ត្រូវប្រកួតពីរជើងទៀតក្នុង ដំណាក់កាលទី២ ពោលគឺក្នុងដី ៥ ប្រកួត និង ក្រៅដៅ ៥ ប្រកួត ដូច្នេះក្រុមនីមួយៗមានការប្រកួតចំនួន ១០ ទៀតទើបរកឃើញជើងឯក នៅក្នុងរដូវកាលនេះ។

ចំណែកក្រុម វិសាខា កងយោធពលខេមរភូមិន្ទ គិរីវង់សុខសែនជ័យ ឡាយហ្វព្រះសីហនុ និង អាយអេសអាយ ដង្កោសែនជ័យ មិនបានឡើងទៅវគ្គ Top 6 ដែលជាដំណាក់កាលទី ២ ឡើយ ប៉ុន្តែក្រុមលំដាប់ទាបទាំង ៥ នេះក៏ត្រូវមានការប្រកួតក្នុងចំណោមក្រុមទាំង ៥ នេះទៀតដែរដើម្បីរកចំណាត់ថ្នាក់ល្អរៀងៗខ្លួន៕