ស៊ុត ៣ គ្រាប់យប់មិញ Kwame ឡើងមកឈរ Top Scorers ក្នុងពាន អាស៊ី ជាមួយ Moses

ខ្សែប្រយុទ្ធរបស់ក្រុម ព្រះខ័នរាជស្វាយរៀង កីឡាករ Kwame Peprah បានហក់មកឈរលើគេជាមួយខ្សែប្រយុទ្ធ ភ្នំពេញក្រោន កីឡាករ Moses Dyer ជាបេក្ខភាពប្រជែងស្បែកជើងមាសក្នុងពាន AFC Challenge League រដូវកាល ២០២៥-២០២៦ នេះ។

គិតត្រឹមពេលនេះ Kwame រកបាន ៦ គ្រាប់ហើយ ដែលជាចំនួនច្រើនជាងគេក្នុងពាន ACGL បន្ទាប់ពីស៊ុតបញ្ចូលទី ៣ គ្រាប់ (hat-trick) ជួយឱ្យ ព្រះខ័នរាជស្វាយរៀង យកឈ្នះលើក្រុម ភ្នំពេញក្រោន ដោយលទ្ធផល ៤-១ ក្នុងជើងទី ១ វគ្គ ៨ ក្រុមចុងក្រោយនៅ ពហុកីឡដ្ឋានជាតិ អូឡាំពិក ថ្ងៃ ព្រហស្បតិ៍ ទី ៥ ខែ មីនា យប់មិញ។

ចំណែក Moses វិញ ក៏មានគ្រាប់បាល់ចំនួន ៦ គ្រាប់នៅពានក្លិបទ្វីបអាស៊ីកម្រិតទី ៣ នេះដែរ បន្ទាប់ពីយប់មិញរកបាន ១ គ្រាប់បន្ថែមទៀត។ ក្រឡេកទៅមើលកីឡាករ ដែលកំពុងស្ថិតនៅលំដាប់លេខ ២ គឺកីឡាករ Ousman Gai របស់ក្រុម Manila Digger ដោយរកបាន ៤ គ្រាប់។ ដូច្នេះរូបគេចាញ់គ្រាប់បាល់ខ្សែប្រយុទ្ធរបស់លីគ កម្ពុជា ទាំង ២ រូបចំនួន ២ គ្រាប់។

តាមរយៈស្ថិតិរបស់ខ្សែប្រយុទ្ធទាំង ២ បានបង្ហាញយ៉ាងច្បាស់ ថា បច្ចុប្បន្នកីឡាករមកពីលីគកំពូល កម្ពុជា គឺមានកម្រិតប្រកួតប្រជែងខ្ពស់ខ្លាំង បើធៀបនឹងរដូវកាលមុនៗ។ រឿងដ៏អស្ចារ្យបំផុត គឺបច្ចុប្បន្នមានកីឡាករមកពីលីគ កម្ពុជា ដល់ទៅ ២ នាក់កំពុងនៅលើគេ។

ទោះបីជាយ៉ាងណា ការប្រកួតប្រជែងនៅសល់វែងឆ្ងាយទៀត។ ដូច្នេះស្ថិតិគ្រាប់បាល់អាចនឹងមានការប្រែប្រួនៅពេលក្រោយ៕

អត្ថបទ៖ សេម កុសល