លក្ខណៈ​ពិសេស ១០ យ៉ាង​ធ្វើ​ឲ្យ​ World Cup ឆ្នាំ​នេះខុស​ប្លែក​មិន​ធ្លាប់​មាន

ជើង​ឯក​បាល់ទាត់​ពិភព​លោក ឆ្នាំ ២០២៦ (FIFA World Cup) នឹងក្លាយ​ជា​ព្រឹត្តិការណ៍​ប្រកួត​ដែល​មាន​លក្ខណៈ​ពិសេស​ថ្មី​ច្រើន​ជាង​គេ​បំផុត​មិន​ធ្លាប់​មាន​នៅ​ក្នុង​ប្រវត្តិ​សាស្ត្រ​របស់​ខ្លួន។ ខាង​ក្រោម​ជា​លក្ខណៈ​ពិសេស​ថ្មីចំនួន ១០ យ៉ាង​។​

១- លើក​ដំបូង ៣ ប្រទេស​ធ្វើ​សហម្ចាស់​ផ្ទះ

ជើង​ឯក​ពិភព​លោក World Cup ឆ្នាំ ២០២៦ ជា​ព្រឹត្តិការណ៍​លើក​ដំបូង ដែល​មាន​ប្រទេស​ចំនួន ៣ រួម​គ្នា​រៀប​ចំ​ព្រឹត្តិការណ៍​ប្រកួត​ដែល​ហៅ​ថា សហម្ចាស់​ផ្ទះ គឺ​ សហរដ្ឋ​អាមេរិក កាណាដា និង ម៉ិកស៊ិក។

២– លើក​ដំបូង ​ពិធីបើក​ធ្វើ​នៅ​ ៣ ប្រទេស​ផ្សេង​គ្នា

ជើង​ឯក​ពិភព​លោក World Cup ឆ្នាំ ២០២៦ មាន​រៀបចំ​ពិធី​បើក​ផ្លូវ​ការ​ ៣ ​​ប្រទេស​ផ្សេង​គ្នា​​។ ប្រទេស​ម៉ិកស៊ិក នឹង​រៀបចំពិធី​​បើក​ដោយ​ការ​សម្តែងរយៈ​ពេល​ប្រមាណ ៩០​នាទី​ ​មុន​ពេល​ ចាប់​ផ្តើម​ការ​ប្រកួត​ រវាង​ជម្រើស​ជាតិ​របស់​ខ្លួន​ជា​មួយ​ ក្រុម​ជម្រើស​ជាតិ​​អាហ្វ្រិក​ខាងត្បូង​ នា​ថ្ងៃ​ទី​១១ ខែ​មិថុនា។ ចំណែក​ប្រទេស​ កាណាដា នឹង​រៀបចំ​ពិធី​បើកជា​ផ្លូវ​ការ នៅ​ថ្ងៃ​ទី​១២ ខែ​មិថុនា មុន​ពេល ក្រុម​ជម្រើស​ជាតិ​របស់​ខ្លួន ប្រកួត​ជា​មួយ ក្រុម​ជម្រើស​ជាតិ​បូស្នៀរ។ នៅ​ថ្ងៃ​ទី​១២ ខែ​មិថុនា​នេះ​​ដដែល​ សហរដ្ឋ​អាមេរិក ក៏​រៀបចំ​ពិធី​បើកយ៉ាង​អស្ចារ្យ​ ​មុន​ពេល​ក្រុម​ជម្រើស​ជាតិ​របស់​ខ្លួន​ប្រកួត​ជា​មួយ​ប៉ារ៉ាហ្គាយ។

ពិធី​បើក​ទាំង​ ៣ ប្រទេស សុទ្ធ​តែ​ប្រជុំ​ដោយ​តារាង​សម្តែង​ល្បី​ៗ​ទូទាំង​ពិភព​លោក មាន​ទាំង​តារា​ជើង​ចាស់ និង​តារា​ល្បី​ៗ​នា​ពេល​បច្ចុប្បន្ន។

៣– ការ​សម្តែង​ចប់​វគ្គ​ទី១ ក្នុង​វគ្គ​ផ្តាច់​ព្រ័ត្រ

សម្រាក ១៥ នាទី ក្រោយ​ចប់តង់​ទី១​ក្នុង​វគ្គ​ផ្តាច់​ព្រ័ត្រ នឹង​មាន​ការ​សម្តែង​សិល្បៈ​ពិសេស​ដោយ​ក្រុម​តារា​ចម្រៀង​អង់គ្លេស Coldplay។ នេះ​ជា​លើក​ដំបូង​ក្នុង​រយៈ​ពេល ៩៦ ឆ្នាំ​ដែល​ការ​ប្រកួត​វគ្គ​ផ្តាច់​ព្រ័ត្រ​មាន​ការ​សម្តែង​​សិល្បៈ ក្រោយ​ចប់​វគ្គ​ទី១។

៤- ក្រុម​ជុំ​ចុង​ក្រោយ​ច្រើន​បំផុត

World Cup ឆ្នាំ ២០២៦ ជា​​ព្រឹត្តិការណ៍​លើក​ដំបូង​ហើយ​ដែល​មាន​ក្រុម​ច្រើន​បំផុត​រហូត​ដល់ ៤៨ ក្រុម។ កន្លង​មក​មាន​ក្រុម​ជម្រើស​ជាតិ​តែ ៣២ ក្រុម​ប៉ុណ្ណោះ ប៉ុន្តែ​លើក​នេះ​បាន​កើន​ដល់​ ៤៨ ក្រុម។

៥– ចំនួន​ប្រកួត​​កើន​ដល់ ១០៤ ប្រកួត

ដោយសារ​ក្រុម​បាន​​កើន​ដល់ ៤៨ ក្រុម​ ដូច្នេះ​ការ​ប្រកួត​គិត​ចាប់​ពី​វគ្គ​សន្សំពិន្ទុ​ក្នុង​ពូល រហូត​ដល់​វគ្គ​ផ្តាច់​ព្រ័ត្រ​គឺមានចំនួន​ ១០៤ ប្រកួត ដែល​បាន​​ក្លាយ​ជា​ព្រឹត្តិការណ៍ World Cup ដែល​មាន​ការ​ប្រកួត​ច្រើន​បំផុត។

៦– ច្បាប់​​ពន្យារ​ពេល​ថ្មី

ការ​ដោះ​ដូរ​កីឡាករ​​ត្រូវ​បាន​កំណត់​ថ្មី។ ការ​ដូរ​ចូល​ត្រូវ​ធ្វើ​ក្នុង​រង្វង់ ១០ វិនាទី​ប៉ុណ្ណោះ។ ប្រសិន​បើ ១០ វិនាទី នៅតែ​ដោះ​ដូរ​មិន​រួច​រាល់​ គឺ​​​ឲ្យ​កីឡាករ​ដែល​ត្រូវ​​ដូរ​ចេញ ចេញ​ពី​ទី​លាន តែ​កីឡាករ​ដូច​ដូរ ​មិនត្រូវ​បាន​អនុញ្ញាត​ឲ្យ​ចូល​ទី​លាន​​បានទេ។ ត្រូវ​ដំណើរ​ការ​ប្រកួត​ ១ នាទី​សិន​ដោយ ១០ នាក់​ទល់​នឹង ១១​នាក់។ ១ នាទី​ក្រោយ​ទើប​កីឡាករ​ដូរ​ចូល អាច​ចូល​ទី​លាន​បាន។

ចំណុច​មួយ​ទៀត ការ​បោះ​បាល់ចូលទី​លាន ​ត្រូវ​ប្រើ​ពេល​ត្រឹម​តែ ៥ វិនាទី​ប៉ុណ្ណោះ។ បើ​ ៥ វិនាទី ក្រុមមិន​បោះ​បាល់ចូល​​លេងគឺ​ ត្រូវ​ផ្តល់​បាល់​នោះ​ឲ្យទៅ​ដៃ​គូ​ម្ខាងជា​អ្នក​បោះ។ មួយ​ទៀត ការ​ទាត់​បាល់​ជ្រុង ត្រូវ​ទាត់​ក្នុង​រង្វង់ ៥ វិនាទី​ដែរ​ តែ​បើ ៥ វិនាទី​ នៅ​តែ​មិន​ទាត់​បាល់​ជ្រុង​ចេញ បាល់នោះ​នឹង​ផ្តល់​ទៅ​អ្នក​ចាំ​ទីរបស់​ដៃ​គូ​វិញ។

៧– បច្ចេកវិទ្យាជំនួយ​អាជ្ញា​កណ្តាល (VAR)

បច្ចេកវិទ្យាជំនួយ​អាជ្ញា​កណ្តាល កាន់​តែ​លំអិត​សម្រាប់​ការ​ប្រើ​ប្រាស់។ កីឡាករ​ដែល​ទទួល​បាន​កាត​លឿង​ហើយ អាច​នឹង​ទទួល​បាន​ពិន័យ​កាត​លឿង​លើក​ទី​២ បើ​ពិនិត្យ VAR ឃើញ​ភស្តុតាង​ច្បាស់។ ផ្ទុយ​ទៅ​វិញ បើ​ទទួល​បាន​កាត​ក្រហម ក៏​អាច​ត្រូវ​ដក​វិញ និង​វិន័យ​កាត​លឿង បើ​ពិនិត្យ​ឃើញ​កំហុសមិន​ធ្ងន់ និង VAR ក៏​នឹង​ពិនិត្យ​មើល​ការ​ផ្តល់​បាល់​ជ្រុង​ ឬ​អ្នក​ចាំ​ទី​ខុស ព្រម​ទាំង​កំហុស​ឆ្គង​ផ្សេង​ៗ​ទៀត។

៨– ​​ជំហរ​ក្រៅ​ល្បែង ប្រើ​បច្ចេកវិទ្យា AI និង 3D

កាន់​តែ​បង្កើន​ភាពល្អ​ប្រសើរ FIFA  បាន​សម្រេច​បង្កើន​បច្ចេកវិទ្យា​ដើម្បី​ពិនិត្យ​ទៅ​បាល់​ក្រៅ​ល្បែង ឬ​ក្នុង​ល្បែង​ឲ្យ​កាន់​តែ​ច្បាស់​តាម​រយៈ​រូប​ភាព​អាវតា​ដែល ប្រើ​ដោយ​​បច្ចេកទេស AI និង 3D។

៩– សម្រាក​ផឹក​ទឹក រាល់​ការ​ប្រកួត

រាល់​ការ​ប្រកួត​ទាំង​អស់​ត្រូវ​តែ​សម្រាក​ ពិសា​ទឹកនៅ​ពាក់​កណ្តាល​វគ្គ​ទី១ និង​ពាក់​កណ្តាល​វគ្គ​ទី​២ ដើម្បី​ឲ្យ​កីឡាករ​មាន​ជាតិ​ទឹក និង​បង្កើនកម្លាំង​។

១០– អ្នក​គាំទ្រ​រំពឹង​បំបែក​កំណត់​ត្រា​ថ្មី

ជើង​ឯកពិភព​លោកឆ្នាំ​នេះ ដាក់​ក្តី​រំពឹង​ទទួល​បាន​អ្នក​ទស្សនា​ផ្ទាល់​ឲ្យ​បាន​ចំនួន ៧ លាន​នាក់​ដែល​​នឹង​ក្លាយ​ជា​កំណត់​ត្រា​ថ្មី​នៅ​ក្នុង​ប្រវត្តិ​សាស្ត្រ​បាល់ទាត់​ពិភព​លោក៕

អត្ថបទ៖ វិរបុត្រ