ប៉េតង់​កម្ពុជា​ដណ្តើម​បាន​មេដាយមាស​ និងជាមេដាយមាស​ទី ២ នៅស៊ីហ្គេម

ប៉េតង់កម្ពុជា បានរកមេដាយមាស សម្រាប់ព្រឹត្តិការណ៍កីឡាស៊ីហ្គេម លើកទី៣១ នៅប្រទេសវៀតណាម បន្ទាប់ពីបានឈ្នះនៅវគ្គផ្ដាច់ព្រ័ត្រ ក្នុងវិញ្ញាសាវាយគូចម្រុះបុរស-នារី។

អត្តពលិក ដែលជួយឱ្យកម្ពុជា ឈ្នះមេដាយមាសទី២ ក្នុងព្រឹត្តិការណ៍គឺធ្វើបានដោយ កីឡាករ ស៊ិន វង់ និងកីឡាការិនី វង ចន្ថា ក្នុងវិញ្ញាសាវាយគូចម្រុះបុរស-នារី នៃកីឡាប៊ូល និងប៉េតង់ បន្ទាប់ពីបានយកឈ្នះម្ចាស់ផ្ទះវៀតណាម ដោលទ្ធផល ១៣-៤។

នេះជាការប្រកួតដ៏ស្វិតស្វាញ ដោយកីឡាករ-កីឡាការិនី ទាំងពីរនាក់របស់កម្ពុជា ចំណាយពេលប្រកួត ២ថ្ងៃតាំងពីវគ្គវិលជុំសន្សំពិន្ទុ ដោយឈ្នះ៣ និងចាញ់១។ លុះដល់វគ្គពាក់កណ្ដាលផ្ដាច់ព្រ័ត្រ បានយកឈ្នះម៉ាឡេស៊ី ១៣-៨ ក្រោយត្រូវម៉ាឡេស៊ី នាំមុខមុនដល់ទៅ ៦គ្រាប់។ លុះចូលដល់វគ្គផ្ដាច់ព្រ័ត្រ កីឡាករ-កីឡាការិនី ទាំងពីរបានយកឈ្នះ វៀតណាម យ៉ាងតានតឹងចំណាយពេលជាង ១ម៉ោងទើបរកឃើញអ្នកឈ្នះ អ្នកចាញ់។

ដូច្នេះគិតត្រឹមថ្ងៃនេះកម្ពុជាឈ្នះមេដាយសរុប១៥គ្រឿងហើយក្នុងនោះមាស២គ្រឿងប្រាក់៤គ្រឿងនិងសំរឹទ្ធ៩គ្រឿង។

មេដាយមាស២លើប្រភេទកីឡាឃីកបុកស៊ីងនិងលើកីឡាប៊ូលនិងប៉េតង់, មេដាយប្រាក់៤លើកីឡាឃីកបុកស៊ីងនិងលើកីឡាប៊ូលនិងប៉េតង់និងមេដាយសំរឹទ្ធ៩លើកីឡាឃីកបុកស៊ីង១, កីឡាប្រណាំងទូក១, កីឡាប៊ូលនិងប៉េតង់៣, កីឡាជឺជីតស៊ូ ១ និងកីឡាវូស៊ូ ៣៕

អត្ថបទ៖មន្នីរ័ត្ន