កីឡា

ព្រះខ័នរាជស្វាយរៀងបន្តបេសកកម្ម CPL ជុំទី៣ជាមួយពិន្ទុដាច់ឆ្ងាយ

បានផុស

៤ years មុន

នៅ

ថ្ងៃសុក្រ ១២ សីហា ២០២២

ដោយ

ព្រះខ័នរាជស្វាយរៀងនៅតែនាំមុខពិន្ទុដាច់ឆ្ងាយលើក្រុមចំណាត់ថ្នាក់លេខ២នៃជម្រើសជើងឯកខេមបូឌានព្រីមៀរលីគរដូវកាល២០២២ បន្ទាប់ពីការប្រកួតជុំទី២បានបញ្ចប់ និងចាប់ផ្តើមជុំទី៣ នាថ្ងៃសៅរ៍ ទី១៣ ខែសីហា នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

១៤ប្រកួតកន្លងទៅ ព្រះខ័នរាជស្វាយរៀង បានភ្លាត់ចាញ់ការប្រកួតចុងក្រោយនៃជុំទី២ដែលធ្វើឲ្យកំណត់ត្រាមិនទាន់ស្គាល់បរាជ័យត្រូវបានបញ្ចប់ ដោយបានចាញ់វិសាខា ក្នុងលទ្ធផល ១-០ នៅក្នុងដីខ្លួនឯង។

ដូច្នេះការប្រកួត២ជុំដែលមាន១៤ប្រកួត ព្រះខ័នរាជស្វាយរៀង ឈ្នះ១១ ស្មើ២ និងចាញ់១ ដោយមាន៣៥ពិន្ទុ កំពុងឈរលើកំពូលតារាង។ ចំណែក បឹងកេត ឈរលេខ២មាន២៦ពិន្ទុ ពីការឈ្នះ៨ ស្មើ២ និងចាញ់៤ ខណៈ វិសាខា ឈរលេខ៣មាន២៥ពិន្ទុពីការឈ្នះ៨ ស្មើ១ និងចាញ់៥។

សម្រាប់ការប្រកួតជុំទី៣ ព្រះខ័នរាជស្វាយរៀង បើកទ្វារកីឡដ្ឋានរបស់ខ្លួននៅខេត្តស្វាយរៀងទទួលស្វាគមន៍ភ្ញៀវ គិរីវង់សុខសែនជ័យ វេលាម៉ោង៦:៣០នាទី ថ្ងៃសៅរ៍ ទី១៣ ខែសីហានេះ។ គិរីវង់សុខសែនជ័យ បានបង្កការភ្ញាក់ផ្អើលកាលពីសប្តាហ៍១៤កន្លងទៅ បន្ទាប់ពីក្រុមនេះបានយកឈ្នះ កងយោធពលខេមរភូមិន្ទ ដែលកំពុងឡើងជើងដោយលទ្ធផល ១-០។

នេះជាជ័យជម្នះលើកដំបូងសម្រាប់គិរីវង់សុខសែនជ័យ បន្ទាប់ពី១៣ប្រកួតគឺស្មើ២ និងចាញ់១១។ ពេលនេះ ក្រុមនេះមាន៥ពិន្ទុស្ថិតនៅបាតតារាង។ ក្នុងសប្តាហ៍ទី១៥ ក្រុមនេះអាចនឹងបង្កការភ្ញាក់ផ្អើលទៀតសម្រាប់អ្នកគាំទ្រព្រះខ័នរាជស្វាយរៀង។

ជុំវិញការប្រកួតលីគឈានចូលជុំទី៣នេះ លោក Conor Nestor គ្រូបង្វឹកព្រះខ័នរាជស្វាយរៀង បានលើកឡើងថា លោកមិនគិតអ្វីច្រើនពីរឿងឈរលើកំពូលតារាងទេ បន្ទាប់ពីចប់ជុំទី២ ពីព្រោះដឹងតាំងពីដំបូងហើយ ការប្រកួតនឹងមានជុំទី៣ ហើយនឹងមានការប្រកួតខ្វែងរវាងក្រុមកំពូលទាំង៤ទៀត ដូច្នេះជាលីគដ៏យូរមួយ។

លោកបានលើកឡើងថា ៖«ខ្ញុំគិតថា បញ្ហាដ៏ធំមួយគឺថា តើលីគ CPL ឈប់សម្រាកប៉ុន្មានដងទៅ? ក្នុងខែកញ្ញាខាងមុខនេះ យើងឈប់សម្រាកពេញមួយខែ ខណៈលីគរបស់ប្រទេសថៃ និងឥណ្ឌូនេស៊ីនឹងឈប់សម្រាកតែ២សប្តាហ៍ប៉ុណ្ណោះ»៕

អត្ថបទ៖ វីរបុត្រ

សេចក្ដីជូនដំណឹង៤ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា