កីឡា

សម្តេចតេជោ ហ៊ុន សែន ពិភាក្សាជាមួយប្រធានស្តីទី OCA «ហេតុអ្វីបាល់ទាត់អាស៊ីខ្សោយ»

បានផុស

៣ years មុន

នៅ

ថ្ងៃអង្គារ ៤ តុលា ២០២២

ដោយ

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានពិភាក្សាគ្នាជាមួយលោក Raja Randhir Singh ប្រធានស្តីទីក្រុមប្រឹក្សាអូឡាំពិកអាស៊ី (OCA) អំពីវិស័យបាល់ទាត់អាស៊ីខ្សោយជាងបាល់ទាត់នៅអឺរ៉ុប ឬអាមេរិកឡាទីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសជាអធិបតីនៃពិធីបើក«មហាសន្និបាតក្រុមប្រឹក្សាអូឡាំពិកអាស៊ី លើកទី៤១ នៅសណ្ឋាគារសុខានាព្រឹកថ្ងៃទី៤ ខែតុលានេះ សម្តេចតេជោ ហ៊ុន សែន មានប្រសាសន៍ថា ៖«ក្នុងឱកាសដែលខ្ញុំបានជួបជាមួយឯកឧត្តមប្រធានក្រុមប្រឹក្សា ខ្ញុំបានលើកឡើងទៅលើចំណុចពីរ។ ទី១អាស៊ីរបស់យើងគួរតែពិនិត្យថា តើហេតុអ្វីទៅបានជាកីឡាទ្វីបរបស់យើងនៅទន់ខ្សោយ? ជាពិសេស បើពិនិត្យទៅលើបាល់ទាត់ ឃើញថា ក្នុងតំបន់របស់យើង គ្រាន់តែចិន និងឥណ្ឌាមានប្រជាជនជិត៣ពាន់លាននាក់ បូកនឹងអាស៊ានប្រមាណជិត៣០០លាននាក់ និងបូកជាមួយបណ្តាប្រទេសនានា គឺមានប្រជាជនច្រើនណាស់ ប៉ុន្តែបើនិយាយពីបាល់ទាត់ សូម្បីតែវគ្គពាក់កណ្តាលផ្តាច់ព្រ័ត្រ (World Cup) យើងក៏ពិបាកចូលដល់។ ហើយក៏មានតែប្រទេសមួយចំនួនតូចប៉ុណ្ណោះដែលចូលក្នុងវគ្គជម្រុះ World Cup ជារៀងរាល់លើក»។

«ឆ្នាំនេះយើងពិតជាមានមោទនភាពដោយសារតំបន់របស់យើងត្រូវមានព្រឹត្តិការណ៍ World Cup (នៅប្រទេសកាតា)។ យើងនឹងទទួលបានផ្លែផ្កាពីការប្រកួតនៅទីនោះ។ ក៏ប៉ុន្តែអ្វីដែលគួរសិក្សាថា ហេតុអ្វី មានមូលហេតុអ្វីខ្លះ ដែលប្រជាជនដ៏ច្រើន តែបែរជាកីឡារបស់យើងទន់ខ្សោយជាងទ្វីបដទៃ? បើប្រៀបធៀបទ្វីបអឺរ៉ុប ទ្វីបអាមេរិកឡាទីន គឺទ្វីបរបស់យើងមានភាពទន់ខ្សោយជាង។ ជាចំណុចដែលយើងគួរសិក្សា តែខ្ញុំមិនដឹងថា ប្រធានបទនៅទីនេះលើកយកបញ្ហានេះមកពិភាក្សាដែរឬទេ»។ សម្តេចតេជោមានប្រសាសន៍។

សម្តេចតេជោ ហ៊ុន សែន បានបន្តថា ៖«ខ្ញុំធ្លាប់បាននិយាយជាមួយសមាជិកកីឡាករ កីឡាការិនីរបស់កម្ពុជាមុនពេលចេញទៅប្រកួត។ ខ្ញុំបាននិយាយថា ប្រជាជនច្រើនមិនប្រាកដថា កីឡាខ្លាំង ហើយប្រជាជនតិចមិនប្រាកដថាកីឡាខ្សោយនោះដែរ។ នេះជារឿងពិតដែលបានកើតឡើង»។

សូមបញ្ជាក់ថា មហាសន្និបាតក្រុមប្រឹក្សាអាស៊ីលើកទី៤១ ប្រារព្ធនៅរាជធានីភ្នំពេញពីថ្ងៃទី១ដល់ទី៥ ខែតុលា មានប្រតិភូផ្នែកកីឡាប្រមាណ ៣៣៦រូប មកពី ៥៥ប្រទេសជុំវិញពិភពលោក។ ក្នុងនោះមានប្រតិភូមកពីបណ្តាប្រទេសក្រុមប្រឹក្សាអូឡាំពិកអាស៊ី ចំនួន ៤៥ប្រទេស ព្រមទាំងប្រទេសចលនាអូឡាំពិកអន្តរជាតិ ចូលរួមសង្កេតការណ៍ប្រមាណ ១០ប្រទេសទៀត។ ក្រៅពីនោះ ក៏មានប្រតិភូថ្នាក់ដឹកនាំគណៈកម្មាធិការអូឡាំពិកអន្តរជាតិមួយចំនួនទៀតផងដែរ៕