កីឡា

ចូលរួមសាទរ ភ្នំពេញក្រោន ឈ្នះជើងឯកលីគកំពូលកម្ពុជា២០២២

បានផុស

២ ខែ មុន

នៅ

ថ្ងៃសៅរ៍ ៣ ធ្នូ ២០២២

ដោយ

ក្រុមបាល់ទាត់ភ្នំពេញក្រោនបានគ្រងជើងឯកខេមបូឌានព្រីមៀរលីគរដូវកាលឆ្នាំ២០២២ បន្ទាប់ពីបានយកឈ្នះលើបឹងកេតដោយលទ្ធផលតដៃមិនបាន ៥-០ ក្នុងការប្រកួតចុងក្រោយនាល្ងាចថ្ងៃសៅរ៍ ទី៣ ខែធ្នូនេះ។

ការប្រកួតនេះ ភ្នំពេញក្រោនពិតជាធ្វើបានល្អមែនទែន ទោះបីជាមានគ្រាប់បាល់នាំមុខហើយក៏នៅតែសម្រុកយ៉ាងខ្លាំងទាំងវគ្គទី១ និងវគ្គ២។ សម្រាប់៥គ្រាប់របស់ភ្នំពេញក្រោនរកបានដោយខ្សែបម្រើកណ្តាលសញ្ជាតិជប៉ុន Yudai Ogawa នៅនាទី១៦, ខ្សែប្រយុទ្ធសញ្ជាតិអាហ្វហ្គានីស្ថាន Fareed Sadat រកបាន២គ្រាប់នាទី១៨ និងនាទី៦៦, ខ្សែបម្រើប្រយុទ្ធវ័យក្មេងរបស់កម្ពុជា លឹម ពិសុទ្ធ រកបាន១គ្រាប់នៅនាទី៣២ និងគ្រាប់ទី៥រកបានដោយកីឡាករសញ្ជាតិអ៊ុយក្រែន Valeriy Hryshyn នៅនាទី៨៥។

ចំពោះលឹម ពិសុទ្ធ បានក្លាយជាកីឡាករកម្ពុជារកគ្រាប់បាល់បានច្រើនជាងគេគឺ១១គ្រាប់ ខណៈម្ចាស់ស្បែកជើងមាសបានទៅកីឡាករខ្សែប្រយុទ្ធសញ្ជាតិកាណាដារបស់ព្រះខ័នរាជស្វាយរៀង Marcus Haber រកបាន២៥គ្រាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្នំពេញក្រោនធ្វើបានយ៉ាងល្អឥតខ្ចោះក្នុងមួយរយៈពេលចុងក្រោយពោលគឺប្រហែលជា៩ប្រកួតចុងក្រោយមិនដែលចាញ់សោះ។ កាលពីដើមរដូវកាលក្រុមការពារតំណែងជើងឯកមួយនេះធ្វើមិនបានល្អទេដោយធ្លាក់ទៅចំណាត់ថ្នាក់លេខ៧ក្នុងចំណោម៨ក្រុម ប៉ុន្តែចាប់តាំងពីចូលពាក់កណ្តាលជុំទី២មក ភ្នំពេញក្រោន ធ្វើល្អជាបណ្តើរៗរហូតឈរលើកំពូលតារាង និងឈ្នះជើងឯកតែម្តង។

នេះជាការឈ្នះជើងឯកខេមបូឌាលីគលើកទី៨របស់ភ្នំពេញក្រោន និងការពារតំណែងជើងឯកឆ្នាំចាស់បានសម្រេច។ សម្រាប់៧លើកកន្លងមក ភ្នំពេញក្រោនបានឈ្នះនៅឆ្នាំ២០០២ ២០០៨ ២០១០ ២០១១ ២០១៤ ២០១៥ និង២០២១៕

អត្ថបទ៖ វីរបុត្រ