ចាំបានទេ World Cup ឆ្នាំណា ដែលក្រុមមកពីទ្វីបអាស៊ី ឡើងដល់វគ្គជ្រៅបំផុត?

ក្រុមមកពីទ្វីបអាស៊ីក្នុងពានរង្វាន់បាល់ទាត់ពិភពលោកឆ្នាំ២០២២ គឺបានធ្លាក់អស់ហើយត្រឹមវគ្គ១៦ក្រុមចុងក្រោយ បន្ទាប់ពីបរាជ័យរបស់ជប៉ុន និងកូរ៉េខាងត្បូងកាលពីយប់មិញ។

ជប៉ុន ចាញ់ ក្រូអាត ដោយបាល់ប៉េណាល់ទីកាត់សេចក្តី បន្ទាប់ពីលេង៩០នាទី ស្មើគ្នា១-១ រីឯកូរ៉េខាងត្បូង​ ចាញ់ប្រេស៊ីល ៤-១។

ថ្វីបើក្រុមអាស៊ីធ្លាក់អស់ហើយក៏ដោយ ប៉ុន្តែទម្រង់លេងរបស់ពួកគេ បានទទួលការកោតសរសើរ និងបានបង្កភាពភ្ញាក់ផ្អើលពេញពិភពលោក។

តួយ៉ាងដូចជាអារ៉ាប៊ីសាអូឌីត បានយកឈ្នះ អាហ្សង់ទីន ២-១, ជប៉ុន យកឈ្នះអាល្លឺម៉ង់ ២-១ និងឈ្នះអេស្ប៉ាញ ២-១ បានឡើងទៅវគ្គ១៦ចុងក្រោយ, អូស្រ្តាលី ឈ្នះទុយនីស៊ី ១-០ បានឡើងវគ្គ១៦ក្រុមចុងក្រោយ និងកូរ៉េខាងត្បូង ឈ្នះព័រទុយហ្គាល់ ២-១ បានឡើងវគ្គ១៦ក្រុងចុងក្រោយដូចគ្នា។

ដូចនេះ តើអ្នកដឹងទេថា តើព្រឹត្តិការណ៍បាល់ទាត់ដណ្តើមពានរង្វាន់ពិភពលោកឆ្នាំណា ដែលក្រុមមកពីទ្វីបអាស៊ីធ្វើបានល្អបំផុត?

ម្ភៃឆ្នាំមុន គឺជាឆ្នាំដែលប្រទេសជប៉ុន និងកូរ៉េខាងត្បូង សហការគ្នាធ្វើជាម្ចាស់ផ្ទះ World Cup។

២០០២គឺជាឆ្នាំ ដែលក្រុមមកពីទ្វីបអាស៊ី ធ្វើបានល្អបំផុតក្នុងប្រវត្តិសាស្រ្ត World Cup ដោយ កូរ៉េខាងត្បូង បានឈានដល់វគ្គដណ្តើមចំណាត់ថ្នាក់លេខ៣ ប៉ុន្តែត្រូវប្រកួតចាញ់ តួកគី ៣-២៕

អត្ថបទ៖ Vann Vann

ចុចអាន៖ ក្រោយក្រុមអាស៊ីធ្លាក់អស់ តើពេលនេះពានរង្វាន់ World Cup នៅសល់ក្រុមមកពីទ្វីបណាខ្លះ?