កីឡា

APSF ជឿជាក់ថា កម្ពុជានឹងរៀបចំកីឡាអាស៊ានប៉ារ៉ាហ្គេម២០២២បានល្អបំផុត

បានផុស

២ years មុន

នៅ

ថ្ងៃសុក្រ ១៦ ធ្នូ ២០២២

ដោយ

លោកស្រី Wandee Tosuwan អគ្គលេខាធិការសហព័ន្ធកីឡាជនពិការអាស៊ានជឿជាក់ថា កម្ពុជានឹងរៀបចំការប្រកួតកីឡាអាស៊ានប៉ារ៉ាហ្គេម ឆ្នាំ២០២៣ បើទោះជាទទួលរៀបចំធ្វើម្ចាស់ផ្ទះជាលើកដំបូងក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងបទសម្ភាសក្រោយពិធីចុះហត្ថលេខាធិការលើអនុស្សរណៈនៃការយោគយល់គ្នារវាង គណៈកម្មាធិការជាតិរៀបចំកីឡាអាស៊ានប៉ារ៉ាហ្គេម លើកទី១២ (CAMAPGOC) និងសហព័ន្ធកីឡាជនពិការអាស៊ីអាគ្នេយ៍ នៅព្រឹកថ្ងៃទី១៦ ខែធ្នូ ឆ្នាំ២០២២ លោកស្រី Wandee Tosuwan បានលើកឡើងថា ៖«យើងរៀបចំអាស៊ានប៉ារ៉ាហ្គេម លើកទី១១ នៅទីក្រុងសូឡូ ប្រទេសឥណ្ឌូនេស៊ី ក្នុងរយៈពេលខ្លី តែទទួលបានជោគជ័យ។ នៅទីនេះ (កម្ពុជា) ដោយមានការទទួលខុសត្រូវ មានសមត្ថភាព ទាំងរាជរដ្ឋាភិបាល ទាំងគណៈកម្មាធិការជាតិ CAMAPGOC និងមានគាំទ្រពីប្រជាជន យើងជឿជាក់ថា យើងអាចធ្វើបាន។ អាចនិយាយបានថា អាចល្អជាងតិចតួចកាលនៅឥណ្ឌូនេស៊ីផង»។

ចំណែកលោក Osoth Bhavilai ប្រធានសហព័ន្ធកីឡាជនពិការអាស៊ាន (APSF) បានប្តេជ្ញាជួយកម្ពុជាក្នុងការរៀបចំការប្រកួតកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ ឲ្យទទួលបានជោគជ័យ និងល្អបំផុត។ លោកសូមអរគុណដែលសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងអរគុណដល់សម្តេចពិជ័យសេនា ទៀ បាញ់ ដែលដែលបានគាំទ្រពេញទំហឹងឲ្យរៀបចំការប្រកួតកីឡាអាស៊ានប៉ារ៉ាហ្គេម នៅកម្ពុជា។ ជាមួយគ្នានេះលោកពិតជារីករាយដែលឃើញកម្ពុជាកំពុងត្រៀមខ្លួនបានយ៉ាងល្អ និងស្ទើរតែរួចរាល់១០០%ទៅហើយ។

លោកមានបញ្ជាក់ថា ការចុះអនុស្សរណៈយោគយល់គ្នាគឺជាកិច្ចសហប្រតិបត្តិការ CAMAPGOC និង APSF គឺសម្រួលដល់សមាជិកអាស៊ានទាំងអស់ពីរបៀបដែលពួកគាត់មកទៅនេះដើម្បីចូលរួមប្រកួត។

លោកថា ៖«ខ្ញុំទទួលខុសត្រូវមកទីនេះដើម្បីជួយ និងសម្របសម្រួលកម្ពុជាឲ្យទទួលបានជោគជ័យ។ ត្រូវធ្វើឲ្យប្រាកដច្បាស់ថា ការរៀបចំប្រកួតអាស៊ានប៉ារ៉ាហ្គេម នៅកម្ពុជាដំណើរការដោយរលូន និងជោគជ័យ។ ធ្វើការជាមួយ APSF យើងជឿជាក់ថា ការរៀបចំអាស៊ានប៉ារ៉ាហ្គេមនៅកម្ពុជាទទួលបានជោគជ័យ។ ជាថ្មីម្តងទៀត ខ្ញុំសូមអរគុណយ៉ាងជ្រាលជ្រៅចំពោះសម្តេចតេជោ ហ៊ុន សែន នាយករដ្ឋមន្ត្រីកម្ពុជា និងសម្តេច ទៀ បាញ់ ប្រធានគណៈកម្មាធិការជាតិ CAMAPGOC។ ជាពិសេសសូមអរគុណដល់ប្រជាជនកម្ពុជាដែលបានគាំទ្រ ហើយយើងជឿជាក់ថា យើងនឹងរៀបចំកីឡាអាស៊ានប៉ារ៉ាហ្គេមនៅកម្ពុជាបានល្អបំផុត»។

សូមបញ្ជាក់ថា ពិធីចុះហត្ថលេខាលើលិខិតអនុស្សរណៈនៃការយោគយល់គ្នារវាង គណៈកម្មាធិការជាតិរៀបចំកីឡាជនពិការអាស៊ីអាគ្នេយ៍ លើកទី១២ និងសហព័ន្ធកីឡាជនពិការអាស៊ីអាគ្នេយ៍ នៅព្រឹកថ្ងៃទី១៦ ខែធ្នូ ឆ្នាំ២០២២ នៅសណ្ឋាគារ Hyatt Phnom Penh ក្រោមអធិបតីភាពឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍គណៈកម្មាធិការជាតិ CAMAPGOC ដោយមានឯកឧត្តម វ៉ាត់ ចំរើន អគ្គលេខាធិការ CAMAPGOC និងលោកណ្ឌិត Osoth Bhavilai ប្រធាន APSF ជាភាគីហត្ថលេខី៕