Ronaldo ថាខ្លួនឈ្នះអ្វីៗគ្រប់យ៉ាងនៅអឺរ៉ុបហើយ ឥលូវដល់ពេលប្រកួតប្រជែងថ្មី

Cristiano Ronaldo បាននិយាយថា គេបានជ្រើសរើសយក Al Nassr ទោះបីជាមានសំណើរជាច្រើនទៀតនៅជុំវិញពិភពលោក ខណៈដែលអតីតខ្សែប្រយុទ្ធរបស់ក្រុម Manchester United ត្រូវបានបង្ហាញជាផ្លូវការដោយក្លិបអារ៉ាប៊ីសាអូឌីត នៅយប់ថ្ងៃអង្គារ (ម៉ោងនៅកម្ពុជា)។

Ronaldo ដែលចុះកុងត្រារយៈពេល២ឆ្នាំ ធ្វើឱ្យរូបគេក្លាយជាកីឡាករបាល់ទាត់ដែលមានប្រាក់ខែខ្ពស់បំផុតក្នុងពិភព លោក បានទៅដល់មជ្ឈឹមបូព៌ាកាលពីថ្ងៃចន្ទ ហើយបានបញ្ចប់ការពិនិត្យសុខភាពមុនការបង្ហាញជាផ្លូវការមួយថ្ងៃក្រោយ មក។

បុរសអាយុ ៣៧ឆ្នាំត្រូវបានស្វាគមន៍ដោយអ្នកគាំទ្រប្រមាណ ២៥,០០០នាក់ នៅកីឡដ្ឋាន Mrsool Park ក្នុងទីក្រុង Riyadh ខណៈដែលអ្នកគាំទ្ររំភើបរីករាយ នឹងការសម្តែងដ៏គួរឱ្យចាប់អារម្មណ៍មួយមុនពេលការបង្ហាញវត្តមានរបស់​Ronaldo។

ថ្លែងនៅក្នុងសន្និសីទសារព័ត៌មាន មុនពេលដើរចេញទៅកាន់ទីលាននៅចំពោះមុខអ្នកគាំទ្រ ដែលជាផ្ទះថ្មី Ronaldo​បាននិយាយថា “ខ្ញុំមានអារម្មណ៍ថា មានមោទនភាពណាស់ដែលបានធ្វើការសម្រេចចិត្តដ៏ធំនេះនៅក្នុងជីវិតរបស់ខ្ញុំ។ នៅអឺរ៉ុប ការងាររបស់ខ្ញុំរួចរាល់ហើយ។ ខ្ញុំបានឈ្នះអ្វីៗទាំងអស់ ហើយឥឡូវនេះ គឺជាការប្រកួតប្រជែងថ្មីមួយ”។ “ខ្ញុំអរគុណដែល Al Nassr បានផ្តល់ឱកាសនេះដល់ខ្ញុំ មិនត្រឹមតែសម្រាប់បាល់ទាត់ប៉ុណ្ណោះទេ ប៉ុន្តែសម្រាប់យុវជន ​និងយុវនារី។ សម្រាប់ខ្ញុំ នេះជាគឺជាការប្រកួតប្រជែងមួយ ប៉ុន្តែខ្ញុំមានអារម្មណ៍រីករាយ និងមោទនភាពខ្លាំងណាស់។” Ronaldo បានបន្ថែម។

កីឡាករវ័យ ៣៧ឆ្នាំរូបនេះបានបន្តទៀតថា៖ “ខ្ញុំមានឱកាសជាច្រើននៅអឺរ៉ុប នៅប្រេស៊ីល នៅអូស្ត្រាលី នៅអាមេរិក និងសូម្បីតែនៅព័រទុយហ្គាល់ មានក្លិបជាច្រើនបានព្យាយាមចុះហត្ថលេខាជាមួយខ្ញុំ ប៉ុន្តែខ្ញុំបានសម្រេចចិត្តជ្រើសរើសយកក្លិបនេះ។ នេះជាឱកាសល្អក្នុងការបង្កើនចំណុចសំខាន់ៗជាច្រើននៅទីនេះ ជាមួយនឹងចំណេះដឹង និងបទពិសោធន៍របស់ខ្ញុំ”។

Ronaldo ដែលមានប្រាក់ខែច្រើនជាង ១៦០លានផោនក្នុងមួយឆ្នាំ អាចបង្ហាញខ្លួនជាលើកដំបូងនៅថ្ងៃព្រហស្បតិ៍ទល់នឹងក្រុម Al Ta’ee នៃលីគអារ៉ាប៊ីសាអូឌីត (Saudi Pro-League) ឬថ្ងៃសៅរ៍ទល់នឹង Al Shabab ។ Ronaldo​បានបន្ថែមថា “ខ្ញុំជាកីឡាករពិសេស។ ខ្ញុំបានបំបែកកំណត់ត្រាទាំងអស់នៅអឺរ៉ុប។ ខ្ញុំចង់បំបែកកំណត់ត្រាមួយចំនួននៅទីនេះ។ កិច្ចសន្យានេះគឺពិសេស ប៉ុន្តែខ្ញុំជាកីឡាករពិសេស ដូច្នេះសម្រាប់ខ្ញុំ វាជារឿងធម្មតាទេ។ ខ្ញុំពិតជាមិនខ្វល់ពីអ្វីដែលមនុស្សនិយាយនោះទេ។ ខ្ញុំពិតជារីករាយណាស់ដែលបាននៅទីនេះ។ “ខ្ញុំដឹងថាលីគមានការប្រកួតប្រជែងខ្លាំង ខ្ញុំបានឃើញការប្រកួតជាច្រើន។ ខ្ញុំសង្ឃឹមថានឹងលេងបន្ទាប់ពី (ថ្ងៃពុធ) ប្រសិនបើគ្រូបង្វឹកគិតថាមានឱកាស។ ខ្ញុំត្រៀមខ្លួនរួចជាស្រេចដើម្បីបន្តលេងបាល់ទាត់”។ Ronaldo បានសង្កត់ធ្ងន់៕

ប្រភព៖ skysports.com

អត្ថបទ៖ មន្នីរ័ត្ន