ប្រវត្តិ​ខ្លះ​​ៗ​ពីពិធី​​​​រត់​​​ភ្លើង​​គប់​​​កីឡា​ស៊ីហ្គេម​

កម្ពុជា​ជា​ម្ចាស់​ផ្ទះ​​គ្រោង​រៀបចំ​​​ពិធី​រត់​ភ្លើង​​​គប់​ឆ្លង​កាត់​ប្រទេស​អាស៊ាន​ទាំង​១០​ មុន​ពេល​ពិធី​បើក​ជា​ផ្លូវ​ការ​ឈាន​ចូល​មក​ដល់​នា​ថ្ងៃ​ទី​៥ ខែ​ឧសភា ខាង​មុខ​នេះ។

តាម​ការ​ស្រាវ​ជ្រាវ ប្រទេស​​ដែល​​ជា​​ម្ចាស់​ផ្ទះ​កីឡា​ស៊ីហ្គេម ភាគ​ច្រើន​រៀបចំ​ពិធី​រត់​ដង្ហែភ្លើង​គប់​តែ​នៅ​ក្នុង​ប្រទេស​របស់​ខ្លួន​ប៉ុណ្ណោះ ហើយ​ក៏​មិន​សូវ​មាន​ព័ត៌មាន​លំអិតអំពី​ប្រវត្តិ​នៃ​ភ្លើង​គប់​នីមួយ​ៗ​ឡើយ។ ចាប់​ពី​ស៊ីហ្គេម លើក​ទី​១ ឆ្នាំ​១៩៥៩ ដល់​លើក​ទី​​២០ ឆ្នាំ​១៩៩៩ មាន​ការ​អុជ​ភ្លើង​គប់ ប៉ុន្តែ​​មិន​មាន​ព័ត៌មាន​ជាក់​លាក់​ពី​ការ​រត់​ភ្លើង​គប់​ឡើយ។

ស៊ីហ្គេម លើក​ទី​២១ ឆ្នាំ​២០០១ ធ្វើ​នៅ​ប្រទេសម៉ាឡេស៊ី។ ភ្លើងគប់​​ត្រូវ​បាន​​រៀបចំ​ពិធី​រត់​ដង្ហែ​នៅ​ក្នុង​ប្រទេស​​ចម្ងាយ​៧,៨៨៤​គីឡូម៉ែត្រ​ពី​ថ្ងៃ​ទី​១០ ខែ​មីនា ដល់​ថ្ងៃ​ទី​៨​ ខែ​កញ្ញា។ ការ​រត់​ចាប់​ពី​​តំបន់​ Labuan បន្ទាប់​មក​ចូល​​ទី​ក្រុង​ Sabah, Sarawak និង​ឆ្នេរសមុទ្រ​ដែល​ឆ្លង​កាត់​រដ្ឋ​១២ មុន​ពេល​បញ្ចប់​នៅ​ទី​ក្រុង​កូឡាឡាំពួរ។

ស៊ីហ្គេម លើក​ទី​២២ ឆ្នាំ​២០០៣ ធ្វើ​នៅ​ប្រទេស​វៀតណាម។ ពិធី​រត់​ដង្ហែ​ភ្លើង​គប់​​​ចាប់​ផ្តើម​ពី​ទី​ក្រុង​ហូជីមិញ និង​ឆ្លង​កាត់​ទី​ក្រុង​ជា​ច្រើន​ទៀត​មុន​ពេលបញ្ចប់​នៅ​ទី​ក្រុង​ហាណូយ។

ស៊ីហ្គេម លើក​ទី២៣ ឆ្នាំ២០០៥ ធ្វើ​នៅ​ហ្វីលីពីន។ ពិធី​ទទួល​ភ្លើង​គប់​នៅ​​​​វៀតណាម​​ដែល​បាន​ផ្តល់​​ឲ្យ​​​​ហ្វីលីពីន​​​ជា​​ម្ចាស់​ផ្ទះ​​បន្ត។ ​ពិធី​រត់​ភ្លើង​គប់​ក៏​ធ្វើ​តែ​ក្នុង​ប្រទេស​​ឆ្លង​កាត់​រដ្ឋ​ជា​ច្រើន​មុន​ពេល​បញ្ចប់​នៅទី​ក្រុង​ម៉ានីល​ ថ្ងៃ​ទី​២៧ ខែ​វិច្ឆិកា។

ស៊ីហ្គេម លើក​ទី​២៤ ឆ្នាំ​២០០៧ ធ្វើ​នៅ​ប្រទេស​ថៃ។ ថ្ងៃ​ទី​៨ វិច្ឆិកា ព្រះ​អង្គ​ម្ចាស់ Vajiralongkorn ព្រះ​រាជ​តំណាងព្រះបិតា Bhumibol Adulyadej ប្រទាន​ភ្លើង​ទៅ​លោក Suvit Yodmani ប្រធាន​គណៈកម្មាធិការ​រៀបចំ​ការ​ប្រកួត​ថៃ។ ​ការ​រត់​​ចេញ​ពី​ក្រុង​បាងកក​ទៅ​ខេត្ត​ជា​ច្រើន​មុន​ពេល​បញ្ចប់​នា​ថ្ងៃ​​ទី​២៦ វិច្ឆិកា នៅ​ខេត្ត​ Nakhon Ratchasima ជា​កន្លែង​ប្រារព្ធ​ពិធី​បើក។

ស៊ីហ្គេម លើក​ទី​២៥ ឆ្នាំ២០១១ នៅ​ឥណ្ឌូនេស៊ី។ ភ្លើង​​យក​ចេញ​ពី Desa Mrapen ខេត្ត​ជ្វាកណ្តាល ជា​កន្លែង​ដែល​ធ្លាប់​យក​​ភ្លើង​​សម្រាប់​​កីឡា​ឆ្នេរខ្សាច់​អាស៊ី​ឆ្នាំ​២០០៨​​ និង​កីឡាស៊ីហ្គេម ឆ្នាំ​១៩៩៧​។ ការ​រត់​ភ្លើង​គប់​ចាប់​ផ្តើម​ពីទីក្រុង Purwodadi និង​បាន​ទៅ​ដល់ Palembang ថ្ងៃ​ទី​១១ ខែវិច្ឆិកា ឆ្នាំ​២០១១។ ភ្លើង​គប់​បាន​​ឆ្លង​កាត់​ខេត្ត​របស់​ឥណ្ឌូនេស៊ី​ជា​ច្រើនមុន​ពេល​ប្រារព្ធ​កីឡា​ស៊ីហ្គេម លើកទី​២៦ ចាប់​ពី​ថ្ងៃ​ទី​១១ ដល់​ទី​២២ ខែ​វិច្ឆិកា។

ស៊ីហ្គេម លើក​ទី​២៧ ឆ្នាំ​២០១៣ ប្រារព្ធ​នៅ​​​មីយ៉ាន់ម៉ា។ ភ្លើង​គប់​​​រត់​បាន​ចម្ងាយ​ប្រមាណ​៣២០​គីឡូម៉ែត្រ​ចាប់​ផ្តើម​រត់​ចេញ​ពី​កីឡដ្ឋាន Thuwunna ក្នុង​ទី​ក្រុងយ៉ាំងហ្គោន និង​បញ្ចប់​នៅ​ទី​ក្រុង Nay Pyi Taw ជា​កន្លែង​ប្រារព្ធ​ពិធី​បើក​ពី​ថ្ងៃ​ទី​១១ ដល់​ទី​២២ ខែវិច្ឆិកា។

ស៊ីហ្គេម លើក​ទី​២៨ ឆ្នាំ​២០១៥ ប្រារព្ធ​នៅ​សិង្ហបុរី។ រត់​ភ្លើង​គប់​ចាប់​ពី​ថ្ងៃ​ទី​៤ ខែ​មិថុនា ដោយ​ឆ្លង​កាត់​តំបន់ Marina Bay ឆ្លង​​ទៅ​ Clifford Square, Merlion Park, Esplanade Plaza, Art Science Museum និង​បញ្ចប់​នៅ Marina Bay Sand ជា​កន្លែង​ដែល​ប្រារព្ធ​ពិធី​បើក​ថ្ងៃ​ទី​៥ ខែ​មិថុនា។

ស៊ីហ្គេម លើក​ទី២៩ ឆ្នាំ២០១៧ ធ្វើ​នៅម៉ាឡេស៊ី។ ការ​រត់​ភ្លើង​គប់​នេះ​​ត្រូវ​បាន​ដាក់​ឈ្មោះ​ថា Rising Together Baton ដែល​ជា​លើក​ដំបូង​ក្នុង​ប្រវត្តិ​សាស្ត្រ​ស៊ីហ្គេម។ ភ្លើង​គប់​បាន​ឆ្លង​កាត់​​ទី​ក្រុង​១០​​នៅ​​ក្នុង​ប្រទេស​អាស៊ាន។ ចូល​ព្រុយណេ ថ្ងៃ​ទី៥ មីនា, ចូលហ្វីលីពីន​ ថ្ងៃ​ទី​១២ មីនា, ចូល​ឡាវ ថ្ងៃ​ទី​១៨ មីនា, ចូល​មីយ៉ាន់ម៉ា ថ្ងៃ​ទី​២៥ មីនា, ចូល​ថៃ ថ្ងៃ​ទី១ មេសា, ចូល​វៀតណាម ថ្ងៃ​ទី​៩ មេសា, ទី​ម័រ​ខាង​កើត ទី​១៧ មេសា, ចូល​កម្ពុជា ថ្ងៃ​ទី​២២ មេសា និង​ចូល​ឥណ្ឌូនេស៊ី ទី​៣០ មេសា មុន​ពេល​បញ្ចប់​នៅ​សិង្ហបុរី ថ្ងៃ​ទី​១៣ ឧសភា។

ស៊ីហ្គេម លើក​ទី៣០ ឆ្នាំ​២០១៩ ធ្វើ​នៅ​ហ្វីលីពីន។ ភ្លើង​គប់​ត្រូវ​បាន​រចនា​ដ៏​ល្អ​វិចិត្រ​មាន​ទម្ងន់១.៥​គីឡូក្រាម។ យោង​តាម​អ្នក​រៀបចំ​ថា ភ្លើង​គប់​នេះ​មាន​និម្មិត​សញ្ញាតំណាង«សាមគ្គីភាព អធិបតេយ្យភាព សមធម៌​សង្គម និងឯករាជ្យភាព» ព្រម​ដោយ​មានទង់​ជាតិ​ហ្វីលីពីន។ គប់​នេះ​បង្ហាញ​ជា​ផ្លូវ​ការ​ថ្ងៃ​ទី​២៣ ខែសីហា ​ក្នុង​ពិធី​រាប់​ថយ​ក្រោយ​១០០​​ថ្ងៃ។ ការ​អុជ​​ភ្លើង​គប់​នៅ​សារមន្ទីរជាតិ Bukit Jalil ក្នុង​ទី​ក្រុង​កូឡាឡាំពួរ ថ្ងៃ​ទី​៣ តុលា ​ហើយ​ក៏​បាន​រត់​ឆ្លង​កាត់​ទូទាំង​ប្រទេស។

ការ​​រត់​​លើក​ទី​២ ចេញ​ពីទី​ក្រុង​ Davao ​នៅ​​ថ្ងៃ​ទី​៣០ ខែ​តុលា ដោយ​​មាន​អ្នក​ចូល​រួម​រត់​ប្រមាណ​៦៥០០​នាក់ និង​ការ​រត់​ចុង​ក្រោយ​ថ្ងៃ​ទី​២៣ វិច្ឆិកា ​ដើម្បី​យក​ទៅ​តម្កល់នៅឧទ្យាន Bayanihan រហូត​ដល់​ថ្ងៃ​បើក​ទី​៣០ ខែ​វិច្ឆិកា។

ស៊ីហ្គេម លើក​ទី​​៣១ ឆ្នាំ​២០២១ (លើក​មក​ឆ្នាំ​២០២២)​ ធ្វើ​នៅ​វៀតណាម។ ពិធី​រត់​​ធ្វើ​មុន​៣១​ថ្ងៃ​ដែល​ចាប់​ផ្តើម​ចេញ​ពី​ព្រះ​វិហារ Hùng Temple ក្នុង​ខេត្ត Phú Thọ នា​ថ្ងៃ​ទី​១១ ខែ​មេសា ដោយ​ឆ្លង​កាត់​ខេត្ត​​​ទាំង​អស់​ដែល​​ទទួល​រៀបចំ​ការ​ប្រកួត មុន​ពេល​​​ទៅ​ដល់កីឡដ្ឋាន​ជាតិ​ Mỹ Đình ​ទី​ក្រុង​ហាណូយ ជា​កន្លែង​ប្រារព្ធ​ពិធី​បើក​ថ្ងៃ​ទី​១២ ខែ​ឧសភា។

ស៊ីហ្គេម លើក​ទី​៣២ ឆ្នាំ​២០២៣ ធ្វើ​នៅ​កម្ពុជា។ ព្រះ​រាជ​ពិធី​សុំ​ព្រះ​អគ្គីកីឡា​គ្រោង​ធ្វើ​នៅ​ថ្ងៃទី​​២១ ខែ​មីនា ​​ក្រោម​ព្រះ​រាជាធិបតីភាព​ដ៏​ខ្ពង់​ខ្ពស់​របស់​ព្រះ​មហា​ក្សត្រ​នៃ​ព្រះ​រាជាណា​ចក្រ​កម្ពុជា។ បន្ទាប់​មក​ ​ថ្ងៃ​ទី​២២ ខែ​មីនា ភ្លើង​គប់​នឹង​ត្រូវ​បាន​ដង្ហែ​រត់​ទៅ​កាន់​គ្រប់​ប្រទេស​អាស៊ាន​ទាំង​១០​ផ្សេង​ទៀត​មុន​ពេល​ត្រឡប់​ចូល​មក​កម្ពុជា​វិញ​នៅ​ថ្ងៃ២៧ ខែ មេសា ឆ្នាំ២០២៣៕

អត្ថបទ៖ វីរបុត្រ