បញ្ចប់​​កីឡាទូកក្តោងស៊ីហ្គេម​​នៅ​ខេត្ត​ព្រះសីហនុ​ កម្ពុជា​ដណ្តើម​បានមេដាយ​ប្រាក់​ ១ និង​សំរឹទ្ធ ២ គ្រឿង

ពីតំបន់ឆ្នេរសមុទ្រដ៏ស្រស់ស្អាតនៃខេត្តព្រះសីហនុ ការប្រកួតប្រភេទកីឡាទូកក្ដោង សម្រាប់ព្រឹត្តិការណ៍កីឡាអាស៊ីអាគ្នេយ៍ លើកទី៣២ ឆ្នាំ២០២៣ ដែលមាន ៩ វិញ្ញាសា បាន​បញ្ចប់ទៅដោយជោគជ័យ។

ជាលទ្ធផលអត្តពលិកមកពីប្រទេសថៃ ប្រមូលមេដាយមាសបានច្រើនជាងគេ ពោលគឺមេដាយមាស ៤ គ្រឿង ប្រាក់ ២ គ្រឿង និង​សំរឹទ្ធ ១ គ្រឿង តាមពីក្រោយដោយសិង្ហបុរី មានមេដាយមាស ៣ គ្រឿង ប្រាក់ ០៤ គ្រឿង និងម៉ាឡេស៊ី រកបានមេដាយមាស ២ គ្រឿង ប្រាក់​ ១ គ្រឿង និង​សំរឹទ្ធ ៤ គ្រឿង។

ដោយឡែកម្ចាស់ផ្ទះកម្ពុជាជាមួយហ្វីលីពីន ទទួលបានមេដាយប្រាក់ ១ គ្រឿង និងសំរឹទ្ធ ២ គ្រឿងដូចគ្នា៕

ការ​ប្រកួតកីឡាស៊ីហ្គេម​ប្រភេទកីឡាទូកក្តោង រៀបចំ​ឡើង​នៅពយតាមូង (ទីលានតេជោ) ស្ថិតនៅសង្កាត់លេខ៣ ក្រុងព្រះសីហនុ ដោយមានការចូលរួមពីកីឡាករ កីឡាការិនីចំនួន ៦ ប្រទេសមាន កម្ពុជា ម៉ាឡេស៊ី សឹង្ហបុរី ហ្វីលីពីន ថៃ និងវៀតណាម ដោយបែងចែកជា ៩ ប្រភេទវិញ្ញាសារួមមាន៖

១.វិញ្ញាសា Windsurfing RS:One មាន ៥ប្រទេស (កម្ពុជា, ថៃ, សឹង្ហបុរី, ម៉ាឡេស៊ី និងហ្វីលីពីន)

២.វិញ្ញាសា windsurfing RS:X មាន ៤ប្រទេស (កម្ពុជា, ថៃ, សឹង្ហហបុរី និងម៉ាឡេស៊ី)

៣.វិញ្ញាសា WindFoil IQ:Foil Open មាន ៤ប្រទេស (កម្ពុជា, ថៃ និងហ្វីលីពីន)

៤.វិញ្ញាសា WindFoil IQ:Foil Youth មាន ៣ ប្រទេស (កម្ពុជា, ថៃ និងហ្វីលីពីន)

៥.វិញ្ញាសា ILCA7 មាន ៦ ប្រទេស (កម្ពុជា, ថៃ,សឹង្ហបុរី,ម៉ាឡេស៊ី, វៀតណាម និងហ្វីលីពីន)

៦.វិញ្ញាសា ILCA6 មាន ៥ប្រទេស (កម្ពុជា, ថៃ,សឹង្ហបុរី, ម៉ាឡេស៊ី និងវៀតណាម)

៧.វិញ្ញាសា ILCA4 មាន ៦ ប្រទេស (កម្ពុជា, ថៃ,សឹង្ហបុរី, ម៉ាឡេស៊ី, វៀតណាម និងហ្វីលីពីន)

៨.វិញ្ញាសា Optimist Mix មាន ៥ ប្រទេស (កម្ពុជា, ថៃ,សឹង្ហបុរី, ម៉ាឡេស៊ី និងហ្វីលីពីន)

៩.វិញ្ញាសា 29er Open មាន ៥ ប្រទេស (កម្ពុជា, ថៃ, សឹង្ហបុរី, ម៉ាឡេស៊ី និងវៀតណាម)