កីឡា

ភ្នំពេញក្រោននាំចូលប្រេស៊ីល Denilson ជំនួសខ្សែបម្រើល្អ Valeriy

បានផុស

២ years មុន

នៅ

ថ្ងៃពុធ ២ សីហា ២០២៣

ដោយ

ក្លិបបាល់ទាត់ភ្នំពេញក្រោនបាននាំចូលខ្សែបម្រើកណ្តាលសញ្ជាតិប្រេស៊ីល Denilson Rodriguez Roldão ដើម្បីត្រៀមប្រកួតខេមបូឌានព្រីមៀរលីគរដូវកាលថ្មីដែលនឹងចាប់ផ្តើមនៅថ្ងៃទី៥ ខែសីហា ឆ្នាំ២០២៣នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការនាំចូលសមាជិកថ្មីនេះ ស្របពេលខ្សែបម្រើប្រយុទ្ធសញ្ជាតិអ៊ុយក្រែន Valeriy Gryshyn បានបាត់មុខពីបញ្ជីឈ្មោះមួយរយៈពេលចុងក្រោយ ជាពិសេសក្នុងពានរង្វាន់ ខេមបូឌានស៊ុបភើខាប់កាលពីចុងសប្តាហ៍កន្លងទៅ។

Valeriy Gryshyn បានក្លាយជាសមាជិកដ៏សំខាន់របស់ក្លិបបាល់ទាត់ភ្នំពេញក្រោនក្នុងពីរដូវកាលចុងក្រោយ បន្ទាប់ពីរូបគេបានចូលរួមកាលពីឆ្នាំ២០២១។ កីឡាករដែលមានបច្ចេកទេសល្អ និងពូកែហ្វ្រីឃីកបានជួយភ្នំពេញក្រោនឈ្នះជើងឯកលីគកំពូលកម្ពុជាពីរដូវកាលជាប់គ្នា ឈ្នះជើងឯកខេមបូឌានលីគខាប់២លើកជាប់គ្នា និងបានឈ្នះជើងឯកខេមបូឌានស៊ុបភើខាប់១លើក។

នៅល្ងាចថ្ងៃអង្គារ៍ ទី១ ខែសីហា ភ្នំពេញក្រោនបានប្រកាសនាំចូលខ្សែបម្រើកណ្តាលសញ្ជាតិប្រេស៊ីល Denilson Rodriguez ដើម្បីត្រៀមខេមឌានព្រីមៀរលីគរដូវកាលថ្មីដែលចាប់ផ្តើមចុងសប្តាហ៍នេះ ប៉ុន្តែភ្នំពេញក្រោនមិនទាន់ប្រកាសពីការចែកផ្លូវជាមួយកីឡាករ Valeriy ទេ។

ទោះបីជាយ៉ាងណា តាមបញ្ជីឈ្មោះផ្លូវការដែលសហព័ន្ធកីឡាបាល់ទាត់កម្ពុជាផ្តល់ឲ្យអ្នកសារព័ត៌មានបង្ហាញថា កីឡាករបរទេសទាំង៦រូបរបស់ភ្នំពេញក្រោនគឺ៖

ខ្សែការពារមីយ៉ាន់ម៉ា Soe Moe Kyaw
ខ្សែការពារជប៉ុន Takaki Ose
ខ្សែបម្រើជប៉ុន Yudai Ogaw
ខ្សែប្រយុទ្ធជប៉ុន Simizu Shintaro
ខ្សែប្រយុទ្ធកូឡំប៊ី Rafael Neito
ខ្សែបម្រើប្រេស៊ីល Rodgrigues Denilson

កីឡាករ Rodgrigues Denilson អាយុ២៣ឆ្នាំ កម្ពស់១.៧៩ម៉ែត្រជាអតីតយុវជនអាយុក្រោម២០ឆ្នាំរបស់ក្លិប Fluminense នៅប្រទេសប្រេស៊ីល និងក្លិប Bangladesh Police FC របស់ប្រទេសបង់ក្លាដែស ហើយចុងក្រោយលេងឲ្យក្លិប Sertanense FC របស់ប្រទេសព័រទុយហ្គាល់ មុនពេលចូលរួមជាមួយភ្នំពេញក្រោន៕

អត្ថបទ៖ វីរបុត្រ