កីឡា

ព្រះខ័នរាជស្វាយរៀងឡើងលើកំពូលតារាង ក្រោយវិសាខាចាញ់បឹងកេត ៤-២

បានផុស

៣ years មុន

នៅ

ថ្ងៃអាទិត្យ ២៧ សីហា ២០២៣

ដោយ

ក្រុមព្រះខ័នរាជស្វាយរៀងបានឡើងទៅឈរលើកំពូលតារាងពិន្ទុក្នុងសប្តាហ៍ទី៤នៃខេមបូឌានព្រីមៀរលីគ២០២៣-២៤ បន្ទាប់ពីក្រុមកំពូលតារាងវិសាខាបានចាញ់ បឹងកេត ដោយលទ្ធផល ៤-២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិសាខា មិនអាចរកបានពិន្ទុទេសម្រាប់ការប្រកួតក្នុងសប្តាហ៍ទី៤នេះ បន្ទាប់ពីចាញ់ក្រុមម្ចាស់ផ្ទះបឹងកេតនៅពហុកីឡដ្ឋានជាតិអូឡាំពិកនៅល្ងាចថ្ងៃអាទិត្យ ទី២៧ ខែសីហា ឆ្នាំ២០២៣។

ក្រុមភ្ញៀវបើកការនាំមុខ ០-១ តាមរយៈការស៊ុតពិន័យ១១ម៉ែត្រដោយកីឡាករ Janata នៅនាទី៣០ ប៉ុន្តែបឹងកេតបានស្មើ ១-១ ដោយខ្សែការពារ Anderson នៅនាទី៤២។ សម្រាប់ការប្រកួតនៅវគ្គទី២ ឈានដល់នាទី ៥០ ខ្សែប្រយុទ្ធ Pedro Junior បើកការនាំមុខ ១-២ ជាថ្មី ប៉ុន្តែតារានាំសំណាង ចន្ថា ចន្ធាកា រកបានតាមស្មើ ២-២ នៅ៦៧។

ការប្រកួតឈានដល់វគ្គ៩០+៥ ចន្ថា ចន្ធាកា បានជាបុរសនាំសំណាងជាថ្មីដោយស៊ុតបានគ្រាប់បាល់ទី២ដើម្បីឲ្យបឹងកេតនាំមុខវិញម្តង ៣-២។ ស្ទើរតែបញ្ចប់ទៅហើយបឹងកេតរកបាន១គ្រាប់ដោយកីឡាករ Golubovic នៅចុងម៉ោងបន្ថែម។

តាមរយៈលទ្ធផលនេះ វិសាខា ស្គាល់បរាជ័យជាលើកដំបូងសម្រាប់ការប្រកួតលីគកំពូលកម្ពុជាដែលបានដំណើរការ៤សប្តាហ៍ ធ្លាក់មកត្រឹមចំណាត់ថ្នាក់លេខ២ដោយមាន៩ពិន្ទុ ខណៈព្រះខ័នរាជស្វាយរៀងបានឡើងទៅកាន់កំពូលតារាងដោយមាន១២ពិន្ទុពេញ បន្ទាប់ពីឈ្នះ៤ប្រកួតជាប់គ្នា។

សម្រាប់ការប្រកួតនៅថ្ងៃអាទិត្យនេះដែរ ភ្នំពេញក្រោនរកបាន៣ពិន្ទុពីជ័យជម្នះលើម្ចាស់ផ្ទះណាហ្គាវើលដ៍ ដោយលទ្ធផល ២-៣ ខណៈក្រសួងការពារជាតិបានឈ្នះលើអង្គរថាយហ្គឺរ ៣-០ ហើយក្រុមខេត្តព្រៃវែងបានឈ្នះគិរីវង់សុខសែនជ័យ ១-២៕