ប្រជាជនប៉ាឡេស្ទីនលើកទង់ជាតិរបស់ខ្លួនក្នុងជម្រុះ World Cup ដ៏រំជួលចិត្ត

ទង់ជាតិពណ៌ក្រហម ស បៃតង និងខ្មៅ របស់ប្រទេសប៉ាឡេស្ទីន មាននៅគ្រប់ទីកន្លែងនៅក្នុងការប្រកួត ដែលត្រូវបានផ្លាស់ប្តូរពីតំបន់ West Bank ទៅប្រទេសគុយវ៉ែត ដោយសារសង្រ្គាមអ៉ីស្រាអែល និងក្រុមហាម៉ាស់។

ទង់ជាតិប៉ាឡេស្ទីន​ដែល​មាន​ពណ៌​​ក្រហម ខ្មៅ និងស បានបកយ៉ាងខ្ពស់នៅកីឡដ្ឋាន Jaber Al-Ahmad International Stadium របស់ប្រទេសគុយវ៉ែត ខណៈ​ប៉ាឡេស្ទីនបានប្រកួតជាមួយ អូស្ត្រាលី ក្នុងការប្រកួតជម្រុះ World Cup 2026។

ប្រជាជនប៉ាឡេស្ទីនរាប់ពាន់នាក់ និងអ្នកគាំទ្ររបស់ពួកគេបានមកចូលរួមទស្សនា កាលពីថ្ងៃអង្គារ៍​ម្សិលមិញ នៅ​កីឡដ្ឋានដែលមានផ្ទុកមនុស្សបានចំនួន ៦០,០០០នាក់ សម្រាប់ការប្រកួតបាល់ទាត់ ដែលជាការប្រកួតលើកដំបូងរបស់ប៉ាឡេស្ទីន នៅចំពោះមុខអ្នកគាំទ្រចាប់តាំងពីការចាប់ផ្តើមសង្រ្គាមអ៉ីស្រាអែល និងហាម៉ាស់។

គ្រាប់បាល់ស៊ុតបញ្ចូលទីរបស់ខ្សែការពារ Harry Souttar នៅនាទី១៨ គឺជាគ្រាប់បាល់​​តែ​១​គត់​ផ្តល់​ឲ្យ​អូស្ត្រាលី​ទទួល​បាន​ជ័យជម្នះ​ក្នុង​លទ្ធផល ១-០។

ការ​ប្រកួតនេះត្រូវបានលេង បន្ទាប់ពីជាង៦សប្តាហ៍ ក្រោយក្រុមអ្នកប្រយុទ្ធហាម៉ាស់ប៉ាឡេស្ទីនបានសម្លាប់មនុស្ស ១,២០០នាក់ និងបានចាប់ចំណាប់ខ្មាំងប្រហែល ២៤០នាក់នៅភាគខាងត្បូងប្រទេសអ៉ីស្រាអែល ក្នុងការវាយប្រហារមួយដែលបានចាប់ផ្តើមចេញពីតំបន់ហ្គាហ្សាស្ទ្រីប កាលពីថ្ងៃទី៧ ខែតុលា។

អ៉ីស្រាអែល ដែលសន្យាថានឹងកម្ទេចក្រុមហាម៉ាស់ បានបញ្ចេញការវាយប្រហារតាមផ្លូវអាកាស និងលើគោកយ៉ាងសាហាវទៅលើតំបន់ហ្គាហ្សាជាការឆ្លើយតប ដោយបានសម្លាប់មនុស្សជាង ១៤.១០០នាក់ រួមទាំងកុមារ ៥.៦០០នាក់ នេះបើយោងតាមមន្ត្រីប៉ាឡេស្ទីន។

អ្នកគាំទ្រម្នាក់ដែលចូលរួមទស្សនានេះបាននិយាយថា ៖«យើងមិនខ្វល់ពីការប្រកួតនោះទេ។ យើងមកដើម្បីថ្លែងសារមួយ។ យើងជាប្រជាជនប៉ាឡេស្ទីន តែងតែមានវត្តមានជាមួយទង់ជាតិយើង»។

អ្នកផ្សេងទៀតបានលើកបដា “Free Gaza” និងរូបភាពនៃកូនសោ ដែលតំណាងឱ្យផ្ទះដែលបាត់បង់ដោយជនជាតិប៉ាឡេស្ទីន ឬគ្រោះមហន្តរាយ នៅពេលជនជាតិប៉ាឡេស្ទីនជាង ៧០០,០០០នាក់ត្រូវបានផ្លាស់ទីលំនៅដោយបង្ខំជុំវិញការបង្កើតអ៊ីស្រាអែល នៅឆ្នាំ១៩៤៨៕

ប្រែសម្រួល៖ មន្នីរ័ត្ន
ប្រភព៖ Aljazeera