កីឡា

អតីតប្រធានបាល់ទាត់ចិន លោក Xuyuan ត្រូវកាត់ទោសពីបទសូកប៉ាន់

បានផុស

១ year មុន

នៅ

ថ្ងៃអង្គារ ៣០ មករា ២០២៤

ដោយ

តុលាការប្រជាជនកម្រិតមធ្យម Huangshi ក្នុងខេត្ត Hubei ភាគកណ្តាលប្រទេសចិននៅថ្ងៃទី៣០ ខែមករានេះ កាត់ទោសអតីតប្រធានសមាគមបាល់ទាត់ចិន លោក Chen Xuyuan ពីបទស៊ីសំណូក។

បុរសជនជាតិចិនវ័យ ៦៧ឆ្នាំមកពីទីក្រុងស៊ាងហៃ ត្រូវបានដាក់ឱ្យស្ថិតក្រោមការស៊ើបអង្កេតកាលពីខែកុម្ភៈ ឆ្នាំ២០២៣ សម្រាប់ “ការរំលោភយ៉ាងធ្ងន់ធ្ងរនៃវិន័យនិងច្បាប់” ទោះបីជាការប្តេជ្ញាចិត្តពីមុនរបស់លោកក្នុងការដោះស្រាយរឿងអាស្រូវពុករលួយនៅក្នុងសមាគមបាល់ទាត់ចិនក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីខែកញ្ញា ឆ្នាំ២០២៣ លោកត្រូវបានចោទប្រកាន់ពីបទពុករលួយ បន្ទាប់ពីបានសារភាពតាមទូរទស្សន៍ថា លោកបានយកប្រាក់យ៉ាងច្រើនពីអ្នកស្វែងរកតួនាទីណាមួយ។ លោក Chen ដែលត្រូវបានជ្រើសរើសជាប្រធានសមាគមកាលពីខែសីហា ឆ្នាំ២០១៩ បានបង្ហាញខ្លួននៅក្នុងភាពយន្តឯកសារទូរទស្សន៍ដែលអតីតគ្រូបង្វឹកក្រុមបាល់ទាត់ជម្រើសជាតិចិន Li Tie បានអះអាងថា បានបង់ប្រាក់សំណូកដល់លោក Chen ចំនួនពីរលានយ័ន (ប្រហែល ២៨ម៉ឺនដុល្លារ) ដើម្បីទទួលបានតំណែងកំពូល។

លោក Chen បានសារភាពតាមកញ្ចក់ទូរទស្សន៍ចិន ដោយឆ្លៀតឱកាសសុំទោសចំពោះទង្វើរបស់ខ្លួនថា “អ្នកគាំទ្រអាចទទួលយកការពិតដែលស្ថានភាពបាល់ទាត់របស់ចិនមិនល្អ ប៉ុន្តែពួកគេមិនអាចអត់ទោសអំពើពុករលួយបានទេ”។ វានៅតែត្រូវមើលថាតើលោកនឹងសារភាពកំហុសក្នុងអំឡុងពេលសវនាការដែរឬទេ ដោយសារតែងតែធ្វើសេចក្តីថ្លែងការណ៍ផ្សេងៗគ្នានៅលើកញ្ចក់ទូរទស្សន៍ និងក្នុងដំណើរការតុលាការ។

ភាពយន្តឯកសារដែលជាការឃោសនារបស់រដ្ឋ ដើម្បីបង្ហាញពីការឆ្លើយតបដ៏រឹងមាំរបស់រដ្ឋាភិបាលចិនចំពោះអំពើខុសឆ្គង គឺជាកម្មវិធីដែលមានអ្នកមើលច្រើនបំផុតនៅលើកញ្ចក់ទូរទស្សន៍ចិនពេញមួយខែមករា។ ទោះជាយ៉ាងណា មានការចោទប្រកាន់ដែលមនុស្សជាច្រើនត្រូវបានបង្ខំឱ្យសារភាព។

ភាពយន្តឯកសារចំនួន៤វគ្គនេះ ផ្តោតលើយុទ្ធនាការប្រឆាំងអំពើពុករលួយរបស់រដ្ឋាភិបាល និងមានការចូលរួមពីមន្ត្រីជាន់ខ្ពស់ សមាជិកសភា អ្នកជំនួញ ធនាគារិក និងអតីតប្រធានបាល់ទាត់របស់ចិន ដែលបានចូលកាន់តំណែងក្នុងឆ្នាំ២០១៩។

វគ្គមួយផ្តោតជាពិសេសលើអំពើពុករលួយនៅក្នុងបាល់ទាត់ចិន ដោយពណ៌នាថា វាជាការសម្អាតដ៏ធំបំផុតក្នុងប្រវត្តិសាស្ត្រ។ ទាំងលោក Chen Xuyuan និងលោក Li Tie អតីតគ្រូបង្វឹកក្រុមជម្រើសជាតិបុរសចិន បានសារភាពថា ពួកគេជាប់ពាក់ព័ន្ធក្នុងគម្រោងសូកប៉ាន់។ គួរកត់សម្គាល់ថា មន្ត្រី និងនាយកប្រតិបត្តិជាន់ខ្ពស់សមាគមបាល់ទាត់ចិន ប្រហែល ១០នាក់ រួមទាំងប្រធាន Chen ត្រូវបានដកចេញពីតំណែង។

ថ្វីបើមានការព្យាយាមជាបណ្តើរៗដើម្បីបង្កើតលីគអាជីពដែលមានការប្រកួតប្រជែងយ៉ាងពិតប្រាកដក៏ដោយ បាល់ទាត់ចិននៅតែឆ្ងាយពីគូប្រជែង។ ទម្រង់លេងរបស់ក្រុមជម្រើសជាតិបានខកចិត្ត ដោយបានឈានដល់ដំណាក់កាលដ៏អាក្រក់បំផុតមិនធ្លាប់មាន។ ពួកគេបានបញ្ចប់នៅចំណាត់ថ្នាក់លេខ៣ ក្នុងពូល ដោយមិនអាចស៊ុតបញ្ចូលទីគូប្រកួតបានឡើយពោលគឺ ស្មើ ០-០ ជាមួយតាហ្ស៊ីគីស្ថាន និងលីបង់ ហើយបានចាញ់ កាតារ ១-០ នៅប្រកួតចុងក្រោយជើងឯកអាស៊ី AFC Asian Cup ឆ្នាំ២០២៣៕

ប្រែសម្រួល៖ មន្នីរ័ត្ន
ប្រភព៖ Xinhua