កីឡា

សភាឡាតវីហាមអត្តពលិករបស់ខ្លួនប្រកួតជាមួយរុស្ស៊ី និងបេឡារុស្ស

បានផុស

៥ ខែ មុន

នៅ

ថ្ងៃអង្គារ ៦ កុម្ភៈ ២០២៤

ដោយ

សភារបស់សាធារណរដ្ឋឡាតវី បានធ្វើវិសោធនកម្មដោយបានហាមឃាត់ក្រុមអត្តពលិកជម្រើសជាតិរបស់ខ្លួនគ្របប្រភេទទាំងអស់ប្រកួតជាមួយអត្តពលិករុស្ស៊ី និងបេឡារុស្ស ដើម្បីជាការបង្ហាញសាមគ្គីភាពជាមួយប្រទេសអ៊ុយក្រែនដែលមានជម្លោះជាមួយរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិសោធនកម្មច្បាប់កីឡា បានហាមប្រាមកីឡាហុកគីលើទឹកកក បាល់ទាត់ បាល់បោះ និងកីឡាផ្សេងៗទៀតមិនឱ្យប្រកួតជាមួយអត្តពលិករុស្ស៊ី និងសម្ព័ន្ធមិត្តបេឡារុស្ស ដោយមិនគិតពីថាតើពួកគេប្រើប្រាស់ទង់ជាតិប្រទេស ឬទង់អព្យាក្រឹតឡើយ។

សមាជិកសភាក៏បានធ្វើវិសោធនកម្មមួយទៀតដោយហាមឃាត់អ្នករៀបចំព្រឹត្តិការណ៍កីឡានៅក្នុងប្រទេសឡាតវី ពីការអញ្ជើញក្រុមជម្រើសជាតិរុស្ស៊ី និងបេឡារុស្ស។ វិធានការនេះបានឆ្លងផុតសភាដែលមានសមាជិកទាំង១០០រូបដោយសំឡេងគាំទ្រ៧៤សំឡេង និងប្រឆាំង១១សំឡេង។

សមាជិកសភា លោក Davis Martins Daugavietis ប្រធានអនុគណៈកម្មាធិការកីឡារបស់សភាបាននិយាយមុនការបោះឆ្នោតថា ៖«គោលបំណងសំខាន់នៃវិសោធនកម្មនេះគឺដើម្បីបញ្ជាក់ឡើងវិញនូវសាមគ្គីភាពរបស់ប្រទេសឡាតវី ជាមួយ អ៊ុយក្រែន និងទប់ស្កាត់រាល់ការប៉ុនប៉ងរបស់រុស្ស៊ីក្នុងការធ្វើឱ្យឧក្រិដ្ឋកម្មសង្គ្រាមស្របច្បាប់របស់ខ្លួនតាមរយៈមធ្យោបាយសន្តិភាពដូចជាព្រឹត្តិការណ៍កីឡា»។

ជាឧទាហរណ៍ ប្រសិនបើក្រុមរបស់ឡាតវី ប្រកួតប្រជែងជាមួយរុស្ស៊ី ឬបេឡារុស្សក្នុងព្រឹត្តិការណ៍កីឡាអូឡាំពិក ប៉ារីសឆ្នាំ២០២៤ ពួកគេនឹងត្រូវបានហាមឃាត់។

ម្ចាស់ការពារមេដាយមាសអូឡាំពិកសម្រាប់កីឡាបាល់បោះ វិញ្ញាសា ៣ទល់៣ របស់ប្រទេសឡាតវីបាននិយាយថា ពួកគេនឹងអង្គុយនៅខាងក្រៅការប្រកួតអូឡាំពិករដូវក្តៅ ប្រសិនបើអត្តពលិករុស្ស៊ីចូលរួម៕

ប្រែសម្រួល៖ មន្នីរ័ត្ន
ប្រភព៖ AFP