កីឡា

ពីក្មេងត្រូវគេមើលងាយ Brandun Lee តស៊ូក្លាយជាអ្នកប្រដាល់វ័យក្មេងកំពុងលេចធ្លោ

បានផុស

២ years មុន

នៅ

ថ្ងៃសៅរ៍ ៦ មេសា ២០២៤

ដោយ

កីឡាករប្រដាល់សកលវ័យក្មេង Brandun Lee ធ្លាប់ទទួលរងការរើសអើងពូជសាសន៍តាំងពីក្មេង ជាពិសេសត្រូវបានគេចំអកថាមិនអាចក្លាយជាអ្នកប្រដាល់បានទេដែលជាហេតុជំរុញរូបគេចាប់យកអាជីពប្រដាល់។

Brandun Lee កើតថ្ងៃទី២៥ ខែមេសា ឆ្នាំ១៩៩៩ ជាអ្នកប្រដាល់អាជីពអាមេរិក ដែលបានឈ្នះខ្សែក្រវាត់ទម្ងន់ស្រាល IBO Inter-Continental នៅថ្ងៃទី១០ ខែមីនា ឆ្នាំ២០២១ ក្រោយផ្តួលកីឡាករ Samuel Teah ក្នុងទឹកទី៣ នៅសង្វៀន Mohegan Sun Arena។

ស្ថិតក្នុងវ័យ២៤ឆ្នាំ Brandun Lee កំពុងកាន់កាប់កំណត់ត្រាមិនទាញ់ចាញ់សោះ ក្រោយចាប់ផ្តើមប្រកួតអាជីពតាំងពីឆ្នាំ២០១៧ បន្ទាប់ពីប្រកួត២៨លើក មិនដែលចាញ់ ឬស្មើ។ ជាពិសេសរូបគេផ្ដួលដៃគូឲ្យបោះបង់ការប្រកួត២៣លើក។ Lee ធំធាត់នៅទីក្រុង Yuba រដ្ឋកាលីហ្វញ៉ា មានឪពុកជនជាតិកូរ៉េខាងជើង និងម្តាយជនជាតិម៉ិកស៊ិក។ រូបគេបានរស់នៅទីនោះប្រហែល១២ឆ្នាំ បន្ទាប់មកបានផ្លាស់ទៅតំបន់ Coachella ។ រូបគេបានប្រឈមមុខនឹងការរើសអើងពូជសាសន៍ ពេលធំដឹងក្ដីដោយសារឈាមជ័រជាជនជាតិកូរ៉េខាងជើង។

Brandun Lee បាននិយាយថា៖«មនុស្សភាគច្រើនមើលមុខខ្ញុំហើយឃើញភ្នែកខ្ញុំ គិតថាជាជនជាតិចិន ហើយពួកគេគិតថា ខ្ញុំជាជនជាតិអាស៊ី ដូចេ្នះខ្ញុំមិនអាចប្រកួតប្រដាល់បានទេ»។

Lee បានចាប់ផ្តើមហាត់ប្រដាល់នៅអាយុប្រហែល៦ឆ្នាំ និងបានប្រកួតប្រដាល់ស្ម័គ្រចិត្ដលើកដំបូងនៅអាយុ៨ឆ្នាំ។ រូបគេបានឈ្នះពានរង្វាន់ Junior Golden Gloves ចំនួន៤លើក ស្រោមដៃប្រាក់ Junior ចំនួន៣ដង និងឈ្នះពានរ Junior PAL ចំនួន៥ដង។ Brandun Lee ត្រូវប្រកួតតំណាងឲ្យសហរដ្ឋអាមេរិកនៅទីក្រុង Saint Petersburg ប្រទេសរុស្ស៊ី ប៉ុន្តែឪពុកម្តាយរបស់រូបគេ បានបដិសេធ ពីព្រោះត្រូវសម្រាកដើម្បីផ្តោតលើការសិក្សា។

Lee បានចុះកិច្ចសន្យាប្រកួតប្រដាល់អាជីពជាមួយលោក Cameron Dunkin កាលពីឆ្នាំ២០១៦ ហើយបានបង្ហាញខ្លួនភ្លាមៗក្នុងការប្រកួតអាជីពដំបូងនៅអាយុ១៧ឆ្នាំ អំឡុងពេលកំពុងនៅរៀននៅវិទ្យាល័យ ។ រូបគេត្រូវបានបណ្តុះបណ្តាលដោយលោក Bobby Lee ដែលត្រូវជាឪពុក។ កីឡាករ Brandun Lee កំពុងដើរឆ្ពោះទៅវិថីជោគជ័យ ក្នុងអាជីពឈឺសាច់មួយនេះ។ ប្រសិនបើរូបគេបន្តធ្វើបានល្អនោះរូបគេនឹងទទួលបានឱកាសប្រកួតដណ្ដើមខ្សែក្រវាត់កម្រិតពិភពលោក៕