កីឡា

ក្រុមបាល់ទះជប៉ុនបុរស-នារីសម្រេចបានសមិទ្ធផលធំដូចគ្នាក្នុងឆ្នាំនេះ

បានផុស

២ years មុន

នៅ

ថ្ងៃអង្គារ ២ កក្កដា ២០២៤

ដោយ

ក្រុមបាល់ទះជម្រើសជាតិជប៉ុន ទាំងបុរស និងនារី ទទួលបានជោគជ័យដូចគ្នាក្នុងឆ្នាំ២០២៤ បន្ទាប់ពីពួកគេបានក្លាយជាជើងឯករងក្នុងពានរង្វាន់លំដាប់ពិភពលោកដូចគ្នា។

ក្រុមបាល់ទះនារីជប៉ុន

ក្រុមបាល់ទះនារីជប៉ុន បានឈ្នះជើងឯករងពីការប្រកួតបាល់ទះនារីពិភពលោក FIVB Women’s Volleyball Nations League ឆ្នាំ២០២៤ ដែលបានបញ្ចប់ទៅកាលពីថ្ងៃទី២៣ ខែមិថុនា កន្លងទៅថ្មីៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វគ្គសន្សំពិន្ទុ ក្រុមនារីជប៉ុន ទទួលបានជ័យជម្នះ៨លើក និងចាញ់៤លើក ស្ថិតនៅចំណាត់ថ្នាក់លេខ៥ ក្នុងចំណោមក្រុមជម្រើសជាតិចំនួន១៦ និងបានឡើងទៅកាន់វគ្គ៨ក្រុមចុងក្រោយ។ ក្រុមនារីជប៉ុន បានយកឈ្នះ ចិន ដោយលទ្ធផល ៣-០ ក្នុងវគ្គ៨ក្រុមចុងក្រោយ និងបានយកឈ្នះ ប្រេស៊ីល ដោយលទ្ធផល ៣-២ នៅវគ្គពាក់កណ្តាលផ្តាច់ព្រ័ត្រ។ ការប្រកួតវគ្គផ្តាច់ព្រ័ត្រ ជប៉ុន បានចាញ់ អ៉ីតាលី ដោយលទ្ធផល១-៣ ដើម្បីទទួលបានមេដាយប្រាក់។

នេះជាលើកដំបូងក្នុងប្រវត្តិសាស្ត្ររបស់ក្រុមបាល់ទះជម្រើសជាតិនារីជប៉ុន ដែលបានឡើងដល់វគ្គផ្តាច់ព្រ័ត្រ និងទទួលបានចំណាត់ថ្នាក់លេខ២ បន្ទាប់ពីឆ្នាំ២០២១ទទួលបានចំណាត់ថ្នាក់លេខ៤។

ក្រុមបាល់ទះបុរសជប៉ុន

ក្រុមបាល់ទះជម្រើសជាតិបុរសជប៉ុនទទួលបានចំណាត់ថ្នាក់លេខ២ក្នុងការប្រកួតបាល់ទះជើងឯកពិភពលោក Men’s Volleyball Nations League ឆ្នាំ២០២៤ បន្ទាប់ពីចាញ់បារាំងដោយលទ្ធផល ១-៣ កាលពីថ្ងៃទី១ ខែកក្កដា។

នៅវគ្គសន្សំពិន្ទុ ជប៉ុន បានឈ្នះ៩លើក និងចាញ់៣លើក រកបាន២៥ពិន្ទុ ស្ថិតនៅលេខ៤ក្នុងតារាងដែលមាន១៦ក្រុម និងបានឡើងទៅកាន់វគ្គ៨ក្រុមចុងក្រោយ។ ពួកគេបានយកឈ្នះ កាណាដា ដោយលទ្ធផល ៣-០ ក្នុងវគ្គ៨ក្រុមចុងក្រោយ និងបន្តឈ្នះ ស្លូវេនី ដោយលទ្ធផល ៣-០ នៅវគ្គពាក់កណ្តាលផ្តាច់ព្រ័ត្រ។ នៅវគ្គផ្តាច់ព្រ័ត្រ ជប៉ុន បានចាញ់ បារាំង ដោយលទ្ធផល ១-៣ ដើម្បីទទួលបានមេដាយប្រាក់។

នេះជាលើកដំបូងក្នុងប្រវត្តិសាស្ត្រ៤៧ឆ្នាំចុងក្រោយដែលក្រុមបាល់ទះជម្រើសជាតិជប៉ុនផ្នែកបុរសបានឡើងដល់វគ្គផ្តាច់ព្រ័ត្រ ក្នុងព្រឹត្តិការណ៍ពិភពលោក និងទទួលបានចំណាត់ថ្នាក់លេខ២។ កាលពីឆ្នាំ២០២៣ ពួកគេទទួលបានមេដាយសំរិទ្ធ ហើយឆ្នាំ២០២៤ទទួលបានមេដាយប្រាក់។