កីឡា

ក្មេងប្រុស-ស្រី កំព្រាឪពុកឯខេត្តពោធិ៍សាត់បានជាប់ជាយុវជនថ្នាលកីឡាគុនចម្រុះសង្ឃឹមបានជួយជីវភាពគ្រួសារ

បានផុស

៣ ខែ មុន

នៅ

ថ្ងៃសុក្រ ៣ មេសា ២០២៦

ដោយ

កុមារ សឿន ឃុនតាវ៉ាន់ និង សឿន សាវីន ដែលជាក្មេងកំព្រាឪពុកនៅស្រុកកណ្ដៀង ខេត្តពោធិ៍សាត់ រស់នៅជាមួយម្ដាយមានជីវភាពក្រលំបាក ឥលូវបានជាប់ជាកីឡាករ កីឡាការិនីថ្នាលកីឡាគុនចម្រុះសង្ឃឹមអាចជួយក្រុមគ្រួសារឲ្យមានជីវភាពល្អប្រសើរ និងអាចបង្កើតស្នាដៃជូនជាតិផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សឿន សាវីន កុមារមកពីពោធិ៍សាត់

នេះបើតាមការឲ្យដឹងពីកីឡាករ ហេង វុទ្ធី ថាក្មេងប្រុស-ស្រី ពីរដែលលោកបានជួយឲ្យបានជាប់ជម្រើសជាតិថ្នាលផ្នែកកីឡាគុនចម្រុះនេះមានឈ្មោះ សឿន ឃុនតាវ៉ាន់ និង សឿន សាវីន ជាអ្នករស់នៅស្រុកកណ្ដៀង ខេត្តពោធិ៍សាត់ ហ្វឹកហកាត់នៅក្លឹបចំបាប់ព្រះធាតុ។

អ្នកចំបាប់ចាស់វស្សារូបនេះបន្ថែមទៀតថា តាមដែលលោកបានដឹងនោះក្មេងទាំងពីរនាក់ខាងលើគឺជាកូនកំព្រាឪពុក និងកំពុងរស់នៅជាមួយម្ដាយ។ ក្រុមគ្រួសាររបស់គេមានជីវភាពក្រលំបាកជាខ្លាំងដោយម្ដាយដើរលាងចានឲ្យគេដើម្បីបានថវិកាចិញ្ចឹមកូន។ ក្រុមគ្រួសាររបស់គេគឺលំបាកខ្លាំងរហូតរកតែថវិកាជិះឡានមកភ្នំពេញមិនបានផង និងបានការជួយពីគ្រូៗ និងមន្ទីរអប់រំខេត្តប៉ុណ្ណោះ។

ទិដ្ឋភាពមកបង្ហាញមុខ

កីឡាករចំបាប់ជម្រើសជាតិខាងលើបន្ថែមទៀតថា លោកពិតជាមានចិត្តសប្បាយរីករាយជាខ្លាំងដោយអាចជួយស្វះស្វែង និងវែកផ្លូវដល់ក្មេងៗទាំងពីរខាងលើ។ ការមកហ្វឹកហាត់ថ្នាលនេះពួកគេនឹងទទួលបានប្រាក់ឧបត្ថម្ភពីក្រសួង ដូច្នេះសង្ឃឹមថាអាចជួយដល់ជីវភាពគ្រួសារបានប្រសើរមួយកម្រិតចាប់ពីពេលនេះតទៅ។

ក្មេងៗជាប់ថ្នាលគុនចម្រុះ

ជាមួយគ្នានេះដែរលោកបានឲ្យដំបូងន្មានដល់អ្នកទាំងពីរឲ្យខំប្រឹងប្រែងហ្វឹកហាត់ដើម្បីខ្លួនឯង ក្រុមគ្រួសារ ប្រទេសជាតិនៅថ្ងៃខាងមុខ។ លោកជួយបានត្រឹមវែកផ្លូវនោះទេការខំប្រឹងប្រែងហ្វឹកហាត់ និងជម្នះឧបសគ្គគឺមានតែខ្លួនឯងនោះឡើយ។

បញ្ជាក់ដែរថា ថ្មីៗនេះលោក ហេង វុទ្ធី ដែលជាកីឡាករចំបាប់ជម្រើសជាតិបានជួយក្មេងៗចំនួន ២នាក់មកពីក្លឹបព្រះធាតុ ខេត្តពោធិ៍សាត់ និងក្មេងស្រី ១រូបទៀតមកពីក្លឹបចំបាប់ឯវិហារសួគ៍ឲ្យជាប់ជម្រើសជាតិថ្នាលគុនចម្រុះចូលហ្វឹកហាត់ពង្រឹងអភិវឌ្ឍន៍ដើម្បីស្នងពីរៀមច្បងចាស់ៗ។ ការប្រមូលផ្ដុំហ្វឹកហាត់ក្រុមជម្រើសជាតិ និងថ្នាលតាមបណ្ដាសហព័ន្ធកីឡាជាតិនោះបានចាប់ផ្ដើមហើយតាំងពីថ្ងៃទី១ ខែមេសា ឆ្នាំ២០២៦៕