កីឡា

កីឡាករចំបាប់ជម្រើសជាតិ ចំណូលពីកីឡាក៏មិនចាញ់ការងារខាងក្រៅប៉ុន្មានដែរឲ្យតែខំប្រឹងពិតប្រាកដ

បានផុស

៣ ខែ មុន

នៅ

ថ្ងៃពុធ ១ មេសា ២០២៦

ដោយ

ម្ចាស់មេដាយមាសស៊ីហ្គេម ឆ្នាំ២០២៣ កីឡាករ ហេង វុទ្ធី ថាចំណូលពីវិស័យកីឡានេះក៏មិនចាញ់ការងារខាងក្រៅប៉ុន្មានទេ ពោលឲ្យតែម្នាក់ៗខំប្រឹងប្រែងពិតប្រាកដនោះនឹងទទួលបានផលប្រយោជន៍ជាច្រើនមកដល់ខ្លួនវិញផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ ហេង វុទ្ធី ពេលទទួលប្រាក់រង្វាន់

កីឡាករ ហេង វុទ្ធី បានឲ្យដឹងថា ពីមុនចូលកីឡាចំបាប់នេះរូបគេមានជីវភាពលំបាកសូម្បីម៉ូតូចាស់មួយគ្រឿងក៏គ្មានជិះហ្នឹងគេនោះដែរ។ ប៉ុន្តែក្រោយសម្រេចចិត្ត និងដាក់គោលដៅច្បាស់ជាមួយវិស័យកីឡានេះបានធ្វើឲ្យខ្លួនមានជីវភាពល្អសមរម្យក្នុងសង្គម។

ម្ចាស់មេដាយមាសស៊ីហ្គេម ២០២៣ រូបនេះបន្ថែមទៀតថា អ្នកជំនាន់ក្រោយប្រសិនបើចាប់យកកីឡាហើយសូមខំប្រឹងប្រែងពិកប្រាកដនោះនឹងទទួលបានផ្លែផ្កាដូចជាខ្លួននៅពេលនេះជាដើម។ បច្ចុប្បន្នជីវភាពរបស់ខ្លួនគឺសមរម្យហើយ ពោលមានកេរ្តិ៍ឈ្មោះក្នុងសង្គម មានថវិកាទិញដី មានថវិកាទិញឡាន ទទួលបានក្របខ័ណ្ឌ និងមានប្រាក់ចំណូលជាប្រចាំផងដែរ។ ដូច្នេះអ្នកដែលខំប្រឹងប្រែងពិតប្រាកដប្រាក់ចំណូលមិនចាញ់របរការងារនៅខាងក្រៅមួយចំនួននោះឡើយ។

ហេង វុទ្ធី និងសម្ដេច ក្រឡាហោម

បញ្ជាក់ដែរថា កីឡាករ ហេង វុទ្ធី ជាអ្នកកីឡាផ្នែកចំបាប់ និងជាជម្រើសជាតិផងដែរ។ រូបគេនៅជាមួយកីឡាចំបាប់នេះប្រហែលជាង ១០ឆ្នាំមកហើយ។ កីឡាកររូបនេះហាក់មានជីវភាពធូរធាបន្ទាប់ពីចាប់កីឡាមួយនេះរយៈពេលជាង ១០ឆ្នាំនេះតាមរយៈការទទួលបានសមិទ្ធផលមេដាយជាច្រើនគ្រឿងកន្លងមក។ ថ្មីៗនេះរូបគេទើបបង្កើតក្លឹបចំបាប់បែបស្ដង់ដាមួយនៅឯខេត្តពោធិសាតិ៍ទៀតផង៕

អត្ថបទដោយ៖ នួន ស៊ីណា