កីឡា

ក្រុមចំបាប់កម្ពុជា ៦រូបនឹងចេញទៅប្រទេសចិននៅថ្ងៃទី២៥ មេសា ដើម្បីចូលរួមការប្រកួតកីឡាឆ្នេរខ្សាច់ លើកទី៦

បានផុស

៣ ថ្ងៃ មុន

នៅ

ថ្ងៃចន្ទ ២០ មេសា ២០២៦

ដោយ

ក្រុមកីឡាចំបាប់របស់កម្ពុជាចំនួន ៦រូបនឹងត្រូវចេញដំណើរទៅប្រទេសចិន នៅថ្ងៃទី២៥ ខែមេសា ឆ្នាំ២០២៦ ខាងមុខនេះដើម្បីចូលរួមប្រកួតប្រជែងមេដាយក្នុងព្រឹត្តិការណ៍កីឡាឆ្នេរខ្សាច់លើកទី៦ នៅទីក្រុង Sanya ខណៈកម្ពុជាបញ្ចូន ៤ប្រភេទកីឡាចូលរួម។

ក្រុមកីឡាចំបាប់កម្ពុជា

ប្រតិភូ គ្រូបង្វឹកចំនួន ២ប្រភេទកីឡាគឺទ្រីយ៉ាត្លុង និងជឺជីតស៊ូ បានចេញដំណើរទៅប្រទេសចិនហើយកាលពីព្រឹកថ្ងៃទី២០ ខែមេសា ឆ្នាំ២០២៦ ទៅតាមកាលវិភាពប្រកួតរៀងៗខ្លួន។ ចំណែកលោក កាង ដែនពិសិដ្ឋ គ្រូបង្វឹកផ្នែកកីឡាចំបាប់របស់ក្រសួងមហាផ្ទៃបានលើកឡើងថា ក្រុមកម្ពុជាបានហ្វឹកហាត់ត្រៀមព្រឹត្តិការណ៍ឆ្នេរខ្សាច់នេះរយៈពេល ៣-៤ខែមកហើយ។ ការហ្វឹកហាត់នៅលើឆ្នេរខ្សាច់នេះមានរយៈពេល ៣ថ្ងៃក្នុងមួយសប្ដាហ៍ផងដែរ។

គ្រូបង្វឹកខាងលើបន្ថែមទៀតថា ការប្រកួតកម្រិតអាស៊ីគឺមានប្រទេសដែលជាជើងខ្លាំងចូលរួមច្រើន។ ហេតុដូចនេះការឈ្នះ-ចាញ់ មានកម្រិតប្រកួតប្រជែងខ្ពស់ទម្រាំអាចឈ្នះមេដាយទៅបាន។ ចំពោះក្រុមកម្ពុជាក៏ធ្លាប់បានជោគជ័យ និងដណ្ដើមបានមេដាយរួចមកហើយដែរលើផ្នែកឆ្នេរខ្សាច់កន្លងទៅ។

ក្រុមកីឡាចំបាប់កម្ពុជា

បញ្ជាក់ដែរថា ព្រឹត្តិការណ៍កីឡាឆ្នេរខ្សាច់អាស៊ី លើកទី៦ នេះនឹងធ្វើឡើងចាប់ពីថ្ងៃទី២២ ដល់ ៣០ ខែមេសា ឆ្នាំ២០២៦ នៅទីក្រុង Sanya ប្រទេសចិន។ កម្ពុជាបញ្ចូន ៤ប្រភេទកីឡារួមមាន ទ្រីយ៉ាត្លុង ជឺជីតស៊ូ បាល់ទាត់លើតុ និងកីឡាចំបាប់។ ក្រុមចំបាប់នឹងចាក់ចេញពីកម្ពុជានៅថ្ងៃទី២៥ មេសាហើយត្រូវប្រកួតជម្រុះថ្ងៃទី២៨ បន្ទាប់មកថ្ងៃទី២៩ ប្រកួតផ្ដាច់ព្រ័ត្រ និងវិលត្រឡប់មកកម្ពុជាវិញថ្ងៃទី៣០ មេសា ២០២៦ ៕