កាណាដាបង្កើតមនុស្សយន្តសម្រាប់ជួយសម្រួលបន្ទុកអ្នកជំងឺវង្វេង

អ្នកស្រាវជ្រាវនៅសាកលវិទ្យាល័យ Waterloo នៃប្រទេសកាណាដា បានបង្ហាញកម្មវិធីថ្មីសម្រាប់ដាក់បញ្ចូលមនុស្សយន្តដើម្បីធ្វើជាជំនួយការផ្ទាល់ខ្លួនរបស់អ្នកជំងឺវង្វេង ។

ក្នុងកម្មវិធីមនុស្សយន្តអាចជួយបង្ហាញទីតាំងវត្ថុដែលអ្នកវង្វេងរកមិនឃើញបានយ៉ាងងាយ មួយវិញទៀតពួកគេក៏សង្ឃឹមថាអាចដាក់បញ្ចូលកម្មវិធីទៅក្នុងទូរស័ព្ទរបស់យើងឆាប់ៗផងដែរ ។

តាមការសិក្សាបានឲ្យដឹងថា ជំងឺវង្វេងមានឥទ្ធិពលលើមនុស្សចាស់ជនជាតិអាមេរិកចាប់ពីវ័យ ៦៥ ឆ្នាំឡើងទៅ ចំនួនម្នាក់ក្នុងចំណោម ១០ នាក់ ខណៈ ២២ ភាគរយទៀតនៃចំនួនដូចគ្នាកំពុងបង្ហាញសញ្ញាប្រឈមនឹងជំងឺកម្រិតស្រាល ។

អាស្រ័យហេតុនេះហើយ ក្រុមមនុស្ស ៤ នាក់នៅសាកលវិទ្យាល័យ Waterloo បានប្រើជាកម្មវិធីពិសេសបូករួមជាមួយកាមេរ៉ាសម្រាប់ដាក់ក្នុងមនុស្សយន្ត ដូច្នេះវានឹងកត់ចំណាំទីកន្លែង និងម៉ោងដើម្បីផ្ដល់ព័ត៌មានឲ្យម្ចាស់ដែលមានបញ្ហាវង្វេងពីវត្ថុដែលចង់រក ។

គួរបន្ថែមថា ថ្មីៗនេះអ្នកស្រាវជ្រាវនៅវិទ្យាស្ថាន Munich នៃមនុស្សយន្ត និងម៉ាស៊ីនវៃឆ្លាតក៏បានប្រកាសដែរអំពីមនុស្សយន្តអាល្លឺម៉ង់ឈ្មោះ Garmi ដែលជាជំនួយការផ្ទាល់ខ្លួនត្រូវបានរចនាឡើងដើម្បីជួយមនុស្សចាស់ក្នុងការណាត់ជួបពេទ្យ និងបញ្ហាតូចៗដូចជា ការបើកដប និងបម្រើអាហារជាដើម ៕

ប្រភព ៖ popsci

ចុចអាន ៖ ឆ្នាំ២០៣០ អង់គ្លេស នឹងបញ្ជូនមនុស្សយន្តទៅប្រយុទ្ធនៅលើសមរភូមិ (មានវីដេអូ)