រុស្ស៊ី បង្ហាញមនុស្សយន្តបម្រើការលើយន្តហោះដំបូងគេបង្អស់របស់ពិភពលោក

យោងតាមការចេញផ្សាយរបស់សារព័ត៌មាន VN Express នៅថ្ងៃទី២០ខែតុលា ក្រុមហ៊ុនអាកាសចរណ៍រុស្ស៊ីមួយឈ្មោះ Pobeda បានក្លាយជាក្រុមហ៊ុនដំបូងគេបង្អស់នៅលើពិភពលោកដែលកំពុងសាកល្បងប្រើប្រាស់មនុស្សយន្តបម្រើការលើយន្តហោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មនុស្សយន្តនេះមានឈ្មោះថា Volodya បានធ្វើការលើជើងហោះហើរពី Ulyanovsk ទៅកាន់ទីក្រុងមូស្គូ មានតួននាទីស្វាគមន៍អ្នកដំណើរ ផ្តល់ការណែនាំសុវត្ថិភាព និងនិយាយជាមួយអ្នកដំណើរក្នុងអំឡុងពេលហោះហើរ។

Volodya ប្រើប្រាស់បច្ចេកវិទ្យាទំនើប ដូចនេះវាមើលទៅដូចជាមនុស្សតូចមួយ ចេះធ្វើត្រាប់តាមចលនា និងឥរិយាបថរបស់មនុស្ស។ ទោះបីជាមនុស្សយន្តនេះមិនបានបម្រើអាហារ ឬភេសជ្ជៈក៏ដោយ អ្នកដំណើរមានការរំភើបក្នុងការថតរូប និងនិយាយជាមួយវា។

វីដេអូរបស់មនុស្សយន្តនេះបានបង្កឱ្យមានការជជែកវែកញែកតាមអ៊ីនធឺណិត។ មនុស្សមួយចំនួនព្រួយបារម្ភថាមនុស្សយន្តអាចជំនួសមនុស្សបម្រើការលើយន្តហោះ ឬអាចដំណើរការខុសប្រក្រតីនិងបង្កហានិភ័យសុវត្ថិភាព។ អ្នកផ្សេងទៀតយល់ថាបច្ចេកវិទ្យានេះគួរឲ្យចាប់អារម្មណ៍។

មនុស្សយន្តនេះមើលទៅដូចជាមនុស្សយន្ត G1 ដែលផលិតដោយ Unitree Robotics មានកម្ពស់ ១.២ ម៉ែត្រ ហើយអាចធ្វើចលនាបានយ៉ាងរលូន ស្ទើរតែដូចមនុស្ស។ ទោះជាយ៉ាងណាក៏ដោយ ក្រុមហ៊ុនអាកាសចរណ៍មិនទាន់បានបញ្ជាក់ថាតើ Volodya ពិតជាមនុស្សយន្តម៉ូដែលនេះឬអត់នោះទេ។

ក្រុមហ៊ុនអាកាសចរណ៍ផ្សេងទៀតក៏កំពុងប្រើប្រាស់បច្ចេកវិទ្យាថ្មីផងដែរ។ ក្រុមហ៊ុនអាកាសចរណ៍ Qatar Airways នឹងដាក់ឱ្យដំណើរការក្រុមហោះហើរឌីជីថល AI ដែលអាចឆ្លើយសំណួររបស់អ្នកដំណើរ ខណៈពេលដែលក្រុមហ៊ុនអាកាសចរណ៍ Korean Air កំពុងសាកល្បងប្រើមនុស្សយន្តដើម្បីជួយកម្មករលើកវត្ថុធ្ងន់ៗ។

គួរបញ្ជាក់ថាការបង្ហាញខ្លួនលើកដំបូងរបស់ Volodya គឺជាជំហានថ្មីមួយនៅក្នុងការប្រើប្រាស់បច្ចេកវិទ្យាមនុស្សយន្ត និងបញ្ញាសិប្បនិម្មិត (AI) ដែលកំពុងកើនឡើងក្នុងឧស្សាហកម្មអាកាសចរណ៍៕

អត្ថបទ៖ ប៊ុន សុភាព