បុរស ចិន ម្នាក់ ហេតុតែជាអ្នកមាន សុខចិត្តចាយលុយដុល្លារ ជួលមនុស្សយន្តជាមេផ្ទះ

អ្នកមានឥទ្ធិពលលើប្រព័ន្ធផ្សព្វផ្សាយសង្គមរបស់ចិន មានឈ្មោះថា Zhang Genyuan បានទាក់ទាញការចាប់អារម្មណ៍លើបណ្តាញអ៊ីនធឺណែត បន្ទាប់ពីរូបលោកជួលមនុស្សយន្តតម្លៃ ១០ ០០០ យ៉េន (១ ៤០០ ដុល្លារ) ក្នុងមួយថ្ងៃ ដើម្បីចម្អិនអាហារ សម្អាតផ្ទះ និងណាត់ជួបជាមួយគាត់ពេលចេញក្រៅ។

ប្រព័ន្ធផ្សព្វផ្សាយ SCMP បានរាយការណ៍ថា Zhang Genyuan អាយុ ២៥ ឆ្នាំជានិស្សិតបញ្ចប់ការសិក្សាផ្នែកសេដ្ឋកិច្ចពីសាកលវិទ្យាល័យញូវយ៉ក ដែលមានអ្នកតាមដានប្រព័ន្ធផ្សព្វផ្សាយសង្គមជាង ១.៤ លាននាក់ បានចែករំលែកបទពិសោធន៍របស់គាត់ នៅក្នុងវីដេអូដែលបានបង្ហោះនៅថ្ងៃទី១៣ ខែមីនា។ មនុស្សយន្តនេះមានឈ្មោះថា G1 ត្រូវបានបង្កើតឡើងដោយក្រុមហ៊ុនមនុស្សយន្តរបស់ចិន Unitree Robotics និងលក់រាយក្នុងតម្លៃ ៩៩ ០០០ យ៉េន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មនុស្សយន្តមួយនេះមានទម្ងន់ ៣៥ គីឡូក្រាម បង្ហាញពីភាពរហ័សរហួន និងអាចអនុវត្តមុខងារដ៏គួរឲ្យចាប់អារម្មណ៍ដូចជាចលនាក្បាច់គុន។ G1 មានប្រជាប្រិយភាពរួចហើយនៅក្នុងប្រទេសចិន ជាមួយនឹងតម្លៃជួលប្រចាំថ្ងៃឈានដល់ ២,២០០ ដុល្លារ។

នៅក្នុងវីដេអូរបស់លោក Zhang មនុស្សយន្តបានជំរាបសួរគាត់ ព្យាយាមធ្វើម្ហូបដោយគោះបំបែកស៊ុត និងចាក់ទឹកដោះគោ ជាមួយនឹងលទ្ធផលចម្រុះ និងសម្អាតផ្ទះ ទោះបីជាមិនល្អឥតខ្ចោះក៏ដោយ។ កាសែត Hindustan Times បានរាយការណ៍ថា ក្រោយមកលោកបានយកមនុស្សយន្តដើរលេងជុំវិញទីក្រុង ដោយបង្កឲ្យមានការភ្ញាក់ផ្អើលជាខ្លាំងពីអ្នកដំណើរ។ វីដេអូនេះបានប្រមូលអ្នកចូលចិត្តជាង ៤០,០០០ យ៉ាងឆាប់រហ័ស ដោយអ្នកទស្សនាសរសើរមនុស្សយន្តថា ជាអ្នកស្តាប់ និងដៃគូដ៏ល្អ។

ការកើនឡើងនៃការចាប់អារម្មណ៍លើមនុស្សយន្តបានពង្រីកលើសពី Unitree Robotics ។ ក្រុមហ៊ុនដូចជា EngineAI, Pudu Robotics និង RobotEra កំពុងវិនិយោគយ៉ាងសំខាន់ក្នុងការអភិវឌ្ឍន៍មនុស្សយន្តកម្រិតខ្ពស់។

កាលពីពេលថ្មីៗនេះក្រុមហ៊ុន Zhangjiang Group បានចាប់ដៃគូជាមួយមជ្ឈមណ្ឌលច្នៃប្រឌិតមនុស្សយន្តជាតិ និងក្នុងស្រុករបស់សៀងហៃ ដើម្បីបង្កើតមជ្ឈមណ្ឌលមនុស្សយន្តទំហំ ៥ពាន់ម៉ែត្រការ៉េ។ ដំបូងឡើយ មជ្ឈមណ្ឌលនេះនឹងបណ្តុះបណ្តាលមនុស្សយន្តជាង ១០០ នាក់ក្នុងពេលដំណាលគ្នា ក្នុងគោលបំណងពង្រីកសមត្ថភាពរបស់ខ្លួនដល់ ១ពាន់ នាក់នៅឆ្នាំ ២០២៧ ។

មិនតែប៉ុណ្ណោះ ក្រុមហ៊ុន Goldman Sachs Research ព្យាករណ៍ថា ទីផ្សារពិភពលោកសម្រាប់មនុស្សយន្តនឹងឈានដល់ប្រមាណ ៣៨ ពាន់លានដុល្លារត្រឹមឆ្នាំ ២០៣៥ ដែលជំរុញដោយការរីកចម្រើនយ៉ាងឆាប់រហ័សនៃបញ្ញាសិប្បនិម្មិត៕

អត្ថបទ៖ សាង ស្រីល័ក្ខ

ចុចអាន៖រង់ចាំ​ប្តី​អស់​ជាង​៨០​ឆ្នាំ ទីបំផុតស្ត្រី​ចិនវ័យ​១០៣​ឆ្នាំ​ម្នាក់ ទទួលមរណភាពទាំងមិនអស់អាល័យ