Connect with us

បច្ចេកវិទ្យា

ធ្វើម៉េច ទើបធ្វើឱ្យទូរស័ព្ទដៃ នៅតែកាន់ថ្មបានល្អ ទោះប្រើយូរក៏ដោយ?

បានផុស

នៅ

ជាទូទៅ អ្នកប្រើទូរស័ព្ទដៃ តែងជួបបញ្ហាទូរស័ព្ទមិនកាន់ថ្ម ពេលប្រើលើសពី ១ឆ្នាំ បើទោះបីជាជ្រើសរើសផលិតផល របស់ក្រុមហ៊ុនម៉ាកល្បីៗយ៉ាងណាក៏ដោយ ហើយភាគច្រើននៃអ្នកប្រើប្រាស់ តែងដាក់បន្ទុកលើឧបករណ៍ទូរស័ព្ទទៅវិញ។ នៅពេលនេះ កម្ពុជាថ្មី សូម្បីណែនាំគន្លឹះខ្លះៗ ធ្វើយ៉ាងណា ដើម្បីឱ្យទូរស័ព្ទដៃនៅតែកាន់ថ្មបានល្អ ទោះប្រើយូរខែហើយ ក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

១. ស្វែងយល់ពីរបៀបសាកថ្មដ៏ត្រឹមត្រូវ
អ្នកប្រើប្រាស់ទូរស័ព្ទដៃមួយចំនួន នៅតែមានទម្លាប់ទុកថ្មទូរស័ព្ទទាល់តែ ០% ទើបសាក និងខ្លះទៀត សាកដល់ ១០០% ហើយក៏មិនដកចេញដែរ គឺដោតចោលតែម្តង។ ទម្លាប់សាកថ្មរបៀបនេះ ងាយធ្វើឱ្យខូចថ្មណាស់។
បើតាមគេហទំព័រ uniserveit បញ្ជាក់ថា ល្អបំផុតសម្រាប់ការសាកថ្ម កុំទុកថ្មឱ្យអស់ក្រោម ២០% ទើបសាក និង គួរសាកត្រឹម ៨០% កុំសាកដល់ពេញពេក ទើបធ្វើឱ្យថ្មទូរស័ព្ទដៃមានអាយុកាលវែង។

២. ជ្រៀសវាងប្រើប្រាស់ឆ្នាំងសាក ដែលមិនមែនជាផលិតផលដើម (Original)
បច្ចុប្បន្ន មានក្រុមហ៊ុនជាច្រើន បាននាំចូលផលិតផលអេឡិចត្រូនិក គ្រឿងបន្លាស់ទូរស័ព្ទដៃ ជាពិសេសឧបករណ៍​សាកថ្ម មានទាំងឧបករណ៍សាកថ្ម Grade A; Grade B ដែលធានាថា ល្អប្រើដូចឧបករណ៍សាកថ្ម original ។ តាមការគូសបញ្ជាក់ ឧបករណ៍សាកថ្មដែលមិនចេញពីក្រុមហ៊ុនដើមរបស់ផលិតផលទូរស័ព្ទ ច្រើនតែធ្វើចេញពីវត្ថុធាតុ មិនសូវល្អ ជាហេតុធ្វើឱ្យចរន្តថាមពល ចម្លងមិនបានល្អ ម្តងខ្លាំងម្តងខ្សោយ ធ្វើឱ្យថ្មឆាប់ខូច ហើយបើធ្ងន់ធ្ងរ អាចផ្ទុះ ឬឆេះថ្មតែម្តង ដូចករណីដែលកើតមានកន្លងមក។

៣. កម្តៅធ្វើឱ្យប៉ះពាល់ដល់ថ្មទូរស័ព្ទ (Li-on batteries)
មានកត្តាមួយចំនួន ដែលបង្កឱ្យទូរស័ព្ទដៃក្តៅ និងប៉ះពាល់ដល់អាយុកាលថ្ម ដោយរួមមានការទុកដាក់ និងប្រើប្រាស់។ ហេតុនេះ ចាំបាច់ត្រូវធ្វើរឿងរ៉ាវមួយចំនួនខាងក្រោម៖
បិទកម្មវិធីចោល
ថ្វីបើទូរស័ព្ទដៃចាក់សោរ ប៉ុន្តែកម្មវិធីដូចជា ហ្វេសប៊ុក តេឡេក្រាម អ៉ីនស្តាក្រាមជាដើម-ល- នៅបើកចោលព្រោងព្រាត និងបើកអ៉ីនធឺណិតចោលទៀត។ កត្តានេះ ក៏ជាមូលហេតុដែលធ្វើឱ្យទូរស័ព្ទដៃ ឆាប់អស់ថ្ម និងខូចថ្មផងដែរ។
ចៀសវាងប្រើទូរស័ព្ទបណ្តើរសាកថ្មបណ្តើរ
ការសាកថ្មបណ្តើរ ចុចបណ្តើរ ធ្វើឱ្យទូរស័ព្ទឡើងកម្តៅ ជាហេតុប៉ះពាល់ដល់ថ្មទូរស័ព្ទ។ ដូចដែលបានលើកឡើងខាងលើ កម្តៅ គឺជះឥទ្ធិពលដល់ថ្មទូរស័ព្ទ។
កុំទុកទូរស័ព្ទដៃចោលហាលថ្ងៃ
តើលោកអ្នក ធ្លាប់កត់ចំណាំដែរទេ នៅពេលដែលទុកទូរស័ព្ទដៃចោលមុខកញ្ចក់ឡាន ឬហាលថ្ងៃ ទូរស័ព្ទដៃនោះ នឹងក្តៅខ្លាំង ហើយមានទូរស័ព្ទខ្លះ លោតសញ្ញាព្រមានពីការកើនកម្តៅថែមទៀតផង។

ក្រៅពីនេះ គន្លឹះមួយទៀត គួរធ្វើដើម្បីរក្សាថ្មបានយូរ គឺមើលលើមុខងារពន្លឺអេក្រង់ “Screen Brightness” ព្រោះតែវា ទាញយកថាមពលថ្មខ្លាំង ល្អបំផុត គួរកំណត់ Auto លើមុខងារពន្លឺ ដើម្បីកាត់បន្ថយការចំណាយថាមពលថ្ម៕

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម