ព័ត៌មានអន្ដរជាតិ

ត្រាំ៖ Apple បន្ថែមការវិនិយោគ ១០០ ប៊ីលានដុល្លារនៅអាមេរិក

បានផុស

៩ ខែ មុន

នៅ

ថ្ងៃព្រហស្បតិ៍ ៧ សីហា ២០២៥

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសថា ក្រុមហ៊ុនបច្ចេកវិទ្យា Apple គ្រោងនឹងបន្ថែមការវិនិយោគ ១០០ ប៊ីលានដុល្លារ ពីលើការប្ដេជ្ញាចិត្ត ៥០០ ប៊ីលានដុល្លារ កាលពីដើមឆ្នាំ។ នេះបើតាមការចុះផ្សាយរបស់សារព័ត៌មាន Al Jazeera ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងពីការិយាល័យពងក្រពើកាលពីថ្ងៃពុធ លោក ត្រាំ ដែលឈរនៅក្បែរនាយកប្រតិបត្តិក្រុមហ៊ុន Apple លោក Tim Cook បានសរសើរថា ការបង្កើនការវិនិយោគរបស់ Apple គឺដោយសារតែផែនការ «អាមេរិកទី១» របស់លោក។

លោក ត្រាំ បានបញ្ជាក់ថា ឥឡូវនេះការប្ដេជ្ញាវិនិយោគសរុបរបស់ Apple មានទំហំដល់ ៦០០ ប៊ីលានដុល្លារ។ លោកបន្តថា៖ «នេះគឺជាការវិនិយោគដ៏ធំបំផុតដែល Apple មិនធ្លាប់មាននៅសហរដ្ឋអាមេរិក និងប្រទេសផ្សេងទៀត»។

គេមើលឃើញថា លោក ត្រាំ បានជំរុញឱ្យមានការផលិតក្នុងស្រុកកាន់តែច្រើនក្នុងវិស័យបច្ចេកវិទ្យា និងឧស្សាហកម្មផ្សេងទៀត ហើយបានគំរាមកំហែងដាក់ពន្ធលើក្រុមហ៊ុននានា ប្រសិនបើគេដាក់រោងចក្រផលិតកម្មនៅបរទេស។

ជាផ្នែកមួយនៃការប្រកាសនេះ លោក ត្រាំ កាលពីថ្ងៃពុធដដែល បាននិយាយថា លោកនឹងដាក់ពន្ធ ១០០ ភាគរយ លើបន្ទះឈីបនាំចូលសហរដ្ឋអាមេរិក។

កន្លងមក អ្នកជំនាញបានលើកឡើងពីកង្វល់ដែលថា គោលនយោបាយការពារនិយមរបស់ ត្រាំ អាចធ្វើឱ្យពាណិជ្ជកម្មអាមេរិកធ្លាក់ចុះ និងបង្កើនតម្លៃសម្រាប់អ្នកប្រើប្រាស់អាមេរិក។ យ៉ាងណាមិញ កាលពីថ្ងៃពុធ លោកបានច្រានចោលការព្រួយបារម្ភបែបនេះ ដោយហៅការផ្សាយពីក្ដីកង្វល់ដដែលថាជាការលម្អៀងប្រឆាំងនឹងរដ្ឋបាលរបស់លោក។

គួររំឭកថា កាលពីខែកុម្ភៈ ក្រុមហ៊ុន Apple បានប្រកាសពីការវិនិយោគចំនួន ៥០០ ប៊ីលានដុល្លារ ដែលរួមបញ្ចូលទាំងគម្រោងបើករោងចក្រនៅរដ្ឋតិចសាស់ ដើម្បីផលិតម៉ាស៊ីនមេបញ្ញាសិប្បនិម្មិត (AI)។ ក្រុមហ៊ុនក៏បានវិនិយោគសម្រាប់ការងារស្រាវជ្រាវ និងអភិវឌ្ឍន៍(R&D) បន្ថែល ប្រហែល ២០ ០០០ កន្លែង នៅទូទាំងប្រទេសផងដែរ។ យ៉ាងណាមិញ គួររំឭកថា Apple តែងតែសន្យាវិនិយោគក្នុងទំហំទឹកប្រាក់រាប់ពាន់លានដុល្លារក្នុងទសវត្សរ៍ចុងក្រោយនេះ មិនមែនតែនៅក្នុងអាណត្តិរបស់លោក ត្រាំ នោះទេ៕