រថយន្ដដឹកត្រីគេចពីរថយន្ដដឹកដី បុក​បង្គោល​​ភ្លើង​ក្រឡាប់ស្លាប់ពីរនាក់ នៅក្រុងតាខ្មៅ

បុរសជនជាតិវៀតណាម២នាក់បានស្លាប់នៅកន្លែង ចំណែក២នាក់ទៀតរងរបួសធ្ងន់ត្រូវសមត្ថកិច្ច និងប្រជាពលរដ្ឋជួយគាស់ចេញពីកាប៊ីនរថយន្ដដឹកយកទៅសង្គ្រោះនៅមន្ទីរពេទ្យ។

ហេតុការណ៌នេះបានកើតឡើងកាលពីវេលាម៉ោង១៦និង៣០នាទីរសៀល ថ្ងៃទី២៥ ខែមេសា ឆ្នាំ២០២២ នៅលើផ្លូវជាតិលេខ២១បេ ត្រង់ចំណុចច្រកចូលបុរីទីក្រុងរណបសិរីមង្គល ស្ថិតក្នុងភូមិទួលក្រសាំង សង្កាត់រកាខ្ពស់ ក្រុងតាខ្មៅ។

សាក្សីនៅក្បែរកន្លែងកើតហេតុបានប្រាប់អោយដឹងថា រថយន្តដែលបុកបង្គោលភ្លើងម៉ាក ហ៊ីយ៉ាន់ដាយ ពណ៌ស ពាក់ស្លាក់លេខ ភ្នំពេញ 3B.9278 ដឹកត្រីពេញ ធ្វើដំណើរក្នុងទិសដៅពីត្បូងទៅជើង បើកបរដោយ ឈ្មោះ ង្វៀង អាយុ៥០​ឆ្នាំ រួមដំណើរដោយមនុស្សប្រុស៣នាក់ ទី១ ឈ្មោះ យ៉ យ៉ាំងឡិន អាយុ២០ឆ្នាំ ( អ្នកទាំង២រងរបួសធ្ងន់ត្រូវបានរថយន្តសាមុយ ដឹកយកទៅសង្គ្រោះនៅគ្លីនិកម្លិះដង្កោ នៅខណ្ឌដង្កោ រាជធានីភ្នំពេញ និងទី២ ឈ្មោះ លី យ៉ាំងបាំង អាយុ៥០​ឆ្នាំ ព្រមទាំង ឈ្មោះ ង្វៀង យ៉ាំងឡើយ អាយុ៤៦ឆ្នាំ ( អ្នកទាំង២បានស្លាប់នៅហ្នឹងកន្លែង ដោយម្នាក់គៀបជាប់ក្នុងកាប៊ីនរថយន្ត និងម្នាក់ទៀតដាច់ខ្លួនជា២កំណាត់ ) ហើយពួកគេទាំង៤នាក់ ស្នាក់នៅក្នុងភូមិក្បាលកោះ ឃុំកោះទាវ ស្រុកកោះធំ ខេត្តកណ្តល។

នៅមុនពេលកើតហេតុ រថយន្តខាងលើបើកបរមានទិសដៅពីត្បូង ទៅជើងមកដល់ចំណុចកើតហេតុខាងលើក៏បានរេចង្កូតមកស្ដាំ បុកបង្គោលភ្លើងបណ្ដាលឲ្យក្រឡាប់ចូលប្រឡាយតែម្ដង ហើយក្រោយពេលបញ្ជូនអ្នករបួសទៅកាន់មន្ទីរពេទ្យ សពជនរងគ្រោះត្រូវបានវេចខ្ចប់ប្រគល់ជូនក្រុមគ្រួសារនាំយកទៅធ្វើបុណ្យតាមប្រពៃណី។

សាក្សីបានបន្ថែមទៀតថា នៅមុនពេលកើតហេតុ មានរថយន្តដឹកដី១គ្រឿង បើចេញតាមចក្រចូលបុរីទីក្រុងរណបសិរីមង្គល ឆ្លងកាត់ផ្លូវជាតិលេខ២១បេ។ រំពេចនោះរថយន្តដឹកត្រី បើកតាមផ្លូវ២១បេ ក្នុងល្បឿនលឿន ក្នុងទិសដៅពីត្បូងទៅជើង មកដល់ខំទាញចង្កូតគេចពីឡានដឹកដី ដែលបើកឆ្លងផ្លូវ បណ្តាលឱ្យរេចង្កូតបុកបង្គោលភ្លើងធ្វើឱ្យក្រឡាប់តែម្តងទៅចំណែកឯឡានដឹកដី ដែលបើកឆ្លងផ្លូវនោះ ក៏បន្ថែមល្បឿនរត់គេចបាត់ស្រមោលទៅ៕

អត្ថបទ៖​ ឆៃ យ៉ា