អ្នកកាន់ផេកអធិការដ្ឋានក្រុងតាខ្មៅ ត្រូវរងវិន័យកងកម្លាំង ក្រោយបង្ហោះសារបែបលេង​សើចពីការធ្វើសំបុត្រមរណៈភាព

ស្នងការដ្ឋាននគរបាលខេត្តកណ្ដាលបានប្រកាសចាត់វិធានការអនុវត្តវិន័យចំពោះកងកម្លាំងដែលកាន់ផេកអធិការដ្ឋាននគរបាលក្រុងតាខ្មៅ ក្រោយបង្ហោះសារនៅលើទំព័រហ្វេសប៊ុកផេកផ្លូវការរបស់អធិការដ្ឋាននគរបាលក្រុងតាខ្មៅ ពាក់ព័ន្ធការធ្វើសំបុត្រមរណៈភាព ដែលធ្វើឲ្យមហាជនបញ្ចេញមតិរិះគន់យ៉ាងចាស់ដៃ។ ស្នងការដ្ឋាននគរបាលខេត្តកណ្ដាល ចាត់ទុកខ្លឹមសារបង្ហោះក្នុងផេកផ្លូវការរបស់អធិការដ្ឋានក្រុងតាខ្មៅ បានធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូរមរណៈភាពបុគ្គលនៃសព។

ស្នងការដ្ឋាននគរបាលខេត្តកណ្ដាល បានសម្ដែងការសោកស្តាយចំពោះកំហុសកើតឡើងដែលមន្ត្រីកាន់ផេកនេះ បង្ហោះខ្លឹមសារខុសក្រមសីលធម៌វិជ្ជាជីវៈ ដោយខ្វះការត្រិះរិះពិចារណាឱ្យបានគ្រប់ជ្រុងជ្រោយ។

សូមជម្រាបថា កាលពីពេលថ្មីៗនេះ នៅលើទំព័រហ្វេសប៊ុករបស់អធិការដ្ឋាននគរបាលក្រុងតាខ្មៅ បានបង្ហោះសារពីការធ្វើសំបុត្រមរណៈភាពដោយលើកឡើងថា «ការធ្វើសំបុត្រមរណៈភាព គឺធ្វើនៅសាលាឃុំ សង្កាត់ សាមីខ្លួនមិនបាច់ទៅធ្វើដោយផ្ទាល់ទេ អាចឲ្យក្រុមគ្រួសារទៅធ្វើជំនួសបាន» ដែលធ្វើឲ្យមហាជន និងអ្នកលេងបណ្ដាញសង្គមនាំគ្នាបញ្ចេញមតិរិះគន់យ៉ាងចាស់ដៃ។ មតិមហាជនយល់ឃើញថា ខ្លឹមសារដែលសរសេរបង្ហោះរបស់ផេកផ្លូវការអធិការដ្ឋានក្រុងតាខ្មៅ គឺជារឿងលេងសើច៕