ព័ត៌មានអន្ដរជាតិ

ការវាយប្រហារដោយដ្រូន សម្លាប់ទាហានរក្សាសន្តិភាព UN ៦នាក់នៅស៊ូដង់

បានផុស

៦ ខែ មុន

នៅ

ថ្ងៃអាទិត្យ ១៤ ធ្នូ ២០២៥

ដោយ

Chheang

អគ្គលេខាធិការអង្គការសហប្រជាជាតិ លោក António Guterres បាននិយាយថា ការវាយប្រហារដោយដ្រូនលើទីតាំងរក្សាសន្តិភាពរបស់អង្គការសហប្រជាជាតិនៅក្នុងប្រទេសស៊ូដង់កាលពីថ្ងៃសៅរ៍ទី១៣ខែធ្នូឆ្នាំ២០២៥ បានសម្លាប់ទាហានរក្សាសន្តិភាព៦នាក់ និងរបួស៨នាក់ផ្សេងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារព័ត៌មាន AP លោក Guterres បានប្រាប់នៅក្នុងសេចក្តីថ្លែងការណ៍មួយថា ការវាយប្រហារនេះបានកើតឡើងលើមូលដ្ឋានភស្តុភាររក្សាសន្តិភាពរបស់អង្គការសហប្រជាជាតិ នៅទីក្រុង Kadugli ក្នុងតំបន់ Kordofan នៃប្រទេសស៊ូដង់។ ជនរងគ្រោះទាំងអស់ជាជនជាតិបង់ក្លាដែស ដែលបម្រើការងារជាមួយបេសកកម្មសន្តិសុខបណ្ដោះអាសន្នរបស់អង្គការសហប្រជាជាតិសម្រាប់តំបន់ Abyei (UNISFA)។

លោក Guterres បានថ្លែងថា «ការវាយប្រហារដែលកំណត់គោលដៅលើទាហានរក្សាសន្តិភាពរបស់អង្គការសហប្រជាជាតិ អាចជាឧក្រិដ្ឋកម្មសង្រ្គាមក្រោមច្បាប់អន្តរជាតិ» ដោយហៅការវាយប្រហារនេះថា «មិនអាចលើកលែងឲ្យបាន» និងជំរុញឲ្យជនបង្កត្រូវតែទទួលទោស។

កងទ័ពស៊ូដង់បានបន្ទោសការវាយប្រហារនេះទៅលើកងកម្លាំង RSF ដែលជាក្រុមប៉ារ៉ាយោធាដែលបានប្រយុទ្ធជាមួយកងទ័ព ដើម្បីគ្រប់គ្រងប្រទេសអស់រយៈពេលជាង២ឆ្នាំមកហើយ។ ក្រុម RSF មិនទាន់ធ្វើការអត្ថាធិប្បាយភ្លាមៗនោះទេ។

នៅក្នុងសេចក្តីថ្លែងការណ៍ កងទ័ពបានអះអាងថា ការវាយប្រហារនេះ «បង្ហាញយ៉ាងច្បាស់ពីវិធីសាស្ត្របំផ្លិចបំផ្លាញរបស់ក្រុមកងជីវពលបះបោរ» និងបានបង្ហោះវីដេអូដែលបង្ហាញពីផ្សែងខ្មៅក្រាស់ហុយចេញពីអ្វីដែលខ្លួននិយាយថាជាទីតាំងរបស់អង្គការសហប្រជាជាតិ។

បេសកកម្មអង្គការសហប្រជាជាតិត្រូវបានដាក់ពង្រាយនៅក្នុងតំបន់ Abyei ដែលសម្បូរប្រេងចាប់តាំងពីឆ្នាំ២០១១ នៅពេលដែលប្រទេសស៊ូដង់ខាងត្បូងបានទទួលឯករាជ្យពីប្រទេសស៊ូដង់ ដោយបន្សល់ទុកតំបន់នោះជាតំបន់ជម្លោះរវាងប្រទេសទាំងពីរ។

ប្រទេសស៊ូដង់បានធ្លាក់ចូលទៅក្នុងសង្រ្គាមក្នុងខែមេសាឆ្នាំ២០២៣ បន្ទាប់ពីការតស៊ូអំណាចរវាងយោធា និងក្រុម RSF បានផ្ទុះឡើងទៅជាការប្រយុទ្ធគ្នានៅទីក្រុង Khartoum និងបានរីករាលដាលទូទាំងប្រទេស។ ជម្លោះនេះបានសម្លាប់មនុស្សជាង ៤០ ០០០នាក់ ដែលជាតួលេខដែលត្រូវបានគេជឿយ៉ាងទូលំទូលាយថាជាការរាប់ក្រោមការពិត ហើយបានបង្កឲ្យមានអ្វីដែលអង្គការសហប្រជាជាតិហៅថាជាវិបត្តិមនុស្សធម៌ដ៏អាក្រក់បំផុតរបស់ពិភពលោក។

ការប្រយុទ្ធគ្នាថ្មីៗនេះ បានកើនឡើងនៅក្នុងតំបន់ Kordofan ជាពិសេសបន្ទាប់ពីក្រុម RSF បានដណ្តើមយកទីក្រុង el-Fasher ដែលជាទីតាំងដ៏សំខាន់ចុងក្រោយរបស់កងទ័ពនៅតំបន់ Darfur។ សង្រ្គាមនេះបានបណ្ដាលឲ្យមានការផ្លាស់ទីលំនៅទ្រង់ទ្រាយធំ ទុរ្ភិក្ស និងអំពើឃោរឃៅរួមទាំងការរំលោភបំពានផ្លូវភេទទ្រង់ទ្រាយធំ ដែលអ្នកស៊ើបអង្កេតអង្គការសហប្រជាជាតិនិយាយថា អាចចាត់ទុកជាឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ៕

ប្រែសម្រួល៖ ឈាង

Related Topics:ប្រទេសស៊ូដង់ប្រទេសស៊ូដង់ខាងត្បូង

ព័ត៌មានអន្ដរជាតិ១៤ ម៉ោង ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេដ្ឋកិច្ច៣ ថ្ងៃ ago

ធនាគារ ARDB ចាក់បញ្ចូលទុនលើស្វាយចន្ទី និងដំឡូងមី

ព័ត៌មានជាតិ១ សប្តាហ៍ ago

រដ្ឋបាលខណ្ឌកំបូល សហការជាមួយក្រុមហ៊ុនមីនេបៀ ប្រើប្រាស់កម្លាំងជាង ៨០០នាក់ សម្អាតអនាម័យនៅតាមដងផ្លូវ

កីឡា៤ ថ្ងៃ ago

មូលហេតុកីឡាករអាមេរិ Penrose ធ្វើមិនបានល្អជាមួយក្រុមស្នងការខេត្តស្វាយរៀង

ព័ត៌មានអន្ដរជាតិ៦ ថ្ងៃ ago

អ៊ីរ៉ង់ បើកច្រកចូលរូងភ្នំ ផ្ទុកមីស៊ីលសម្ងាត់របស់ខ្លួនឡើងវិញ ទោះរងការវាយប្រហារយ៉ាងដំណំ

សេចក្ដីជូនដំណឹង២ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា