​ជប៉ុន​ដាក់​ទិសដៅ​ទាក់ទាញ​រោង​ចក្រកែច្នៃ​ស្វាយចន្ទី​មក​កម្ពុជា​

អង្គការជំរុញពាណិជ្ជកម្មក្រៅប្រទេសរបស់ជប៉ុន (JETRO)​ នៅថ្ងៃទី ​១៥ ខែធ្នូ ​ឆ្នាំ ២០២៥ ​បាន​ជួប​ពិភាក្សាការងារ​ជាមួយ​សមាគមស្វាយចន្ទីកម្ពុជា ​ដើម្បីស្នើសុំកិច្ចសហប្រតិបត្តិការ​ក្នុងការរៀប​ចំ​ដំណើរ​ទស្សនកិច្ចសិក្សា​ទៅកាន់ចម្ការស្វាយចន្ទី ​និង​ទីតាំងពាក់ព័ន្ធនានា សម្រាប់​គណៈប្រតិភូវិនិ​យោគ​ជប៉ុន ក្នុងគោលបំណងលើកកម្ពស់វិស័យស្វាយចន្ទីកម្ពុជា ​និង​ទាក់ទាញការវិនិយោគ​បរទេស​នៅ​ខែមីនា ឆ្នាំ ២០២៦។ ​

​សមាគមស្វាយចន្ទីកម្ពុជា​បានណែនាំ សហគមន៍កសិកម្ម​ និងកសិករខ្នាត​ធំ ដែល​មាន​សមត្ថភាព​​ផលិតកម្មរឹងមាំ ​ជាដៃគូអាជីវកម្មសក្តានុពលសម្រាប់ក្រុមហ៊ុនជប៉ុន។​

​ការណែនាំទាំងនេះមានបំណងគាំទ្រដល់កិច្ចប្រជុំធុរកិច្ចនាពេលខាងមុខ ​រវាងភាគីពាក់ព័ន្ធកម្ពុជា និងក្រុមហ៊ុនជប៉ុនដែលចូលរួមក្នុងបេសកកម្មវិនិយោគ។ ​

​កម្ពុជាត្រូវបានទទួលស្គាល់ថាជាប្រទេសផលិតកសិកម្មដ៏សំខាន់ ជាពិសេសគ្រាប់ស្វាយ​ចន្ទី​ដែល​មានគុណភាពខ្ពស់។JETRO មានគោលបំណងនាំយកក្រុមហ៊ុនជប៉ុនដែលមានបទពិសោធន៍ ឬចំណាប់អារម្មណ៍លើការកែច្នៃកសិផលនៅបរទេសមកកាន់កម្ពុជា។

​គណៈប្រតិភូជប៉ុនត្រូវបានរំពឹងថានឹងទៅទស្សនា ចំម្ការស្វាយចន្ទី រោងចក្រកែច្នៃ និងសួន​ឧស្សា​ហកម្មស្វាយចន្ទី (CIP) នៅក្នុងខេត្តកំពង់ធំ ដើម្បីវាយតម្លៃសមត្ថភាពផលិតកម្ម និងសក្តា​នុពល​វិនិយោគរបស់កម្ពុជា។ ​

​JETRO គ្រោងនឹងរៀបចំ វគ្គផ្គូរផ្គងធុរកិច្ច រវាងសហគ្រាសកសិកម្មកម្ពុជាដែលមានសមត្ថភាពសម្របសម្រួលកសិករ និងសកម្មភាពកសិកម្ម ជាមួយក្រុមហ៊ុនជប៉ុន ដោយមានគោលដៅ​បង្កើនឱកាស​សម្រាប់​ការវិនិយោគនាពេលអនាគត។

​លោក Wakabayashi Kohei នាយកប្រចាំប្រទេសនៃ JETRO ប្រចាំកម្ពុជា បានថ្លែងថា៖ «គោល​ដៅរបស់យើងគឺទាក់ទាញរោងចក្រកែច្នៃចំណីអាហារជប៉ុនមកកាន់កម្ពុជា ចាប់ផ្តើមពីខេត្តកំពង់ធំ ដោយធានាការផ្គត់ផ្គង់ផ្លែឈើ និងបន្លែប្រកបដោយស្ថិរភាព និងធានានូវអត្ថប្រយោជន៍​ថ្លៃដើម​តាមរយៈ​ការលើកទឹកចិត្តពន្ធដារដូចជាគម្រោងវិនិយោគមានលក្ខណៈសម្បត្តិគ្រប់គ្រាន់ (QIP)»។

លោកបានបន្ថែមថា JETRO សង្ឃឹមថានឹងពង្រីកគំរូជោគជ័យ ដូចជារោងចក្រស្វាយ​ចន្ទីរបស់​ក្រុម​ហ៊ុន MIRARTH Agri Tech ដែលកំពុងប្រតិបត្តិការនៅក្នុងប្រទេសកម្ពុជា។

​អ្នកស្រី Kikuchi Fumiko អ្នកគ្រប់គ្រងផ្នែកស្រាវជ្រាវនៃផ្នែកស្រាវជ្រាវ និងវិភាគប្រចាំអាស៊ី និងអូ​សេអានីរបស់ ​JETRO បានលើកឡើងពីកង្វល់អំពីការផ្គត់ផ្គង់ គ្រាប់ស្វាយចន្ទីឆៅ ជាពិសេសនៅចំពេលមានការប្រកួតប្រជែងខ្លាំងពីឈ្មួញវៀតណាមក្នុងរដូវប្រមូលផល។​

​ឆ្លើយតបនឹងបញ្ហានេះ ​លោក ស៊ុយ កុកធាន អនុប្រធាន សមាគមស្វាយចន្ទីកម្ពុជា បានថ្លែងថា សមាគម បានរៀបចំព្រឹត្តិការណ៍ផ្គូរផ្គងធុរកិច្ច ក្នុងរយៈពេលបីឆ្នាំកន្លងមកនេះ ដើម្បីភ្ជាប់អ្នកទិញ​ដោយផ្ទាល់ជាមួយអ្នកផលិត កសិករខ្នាតធំ និងសហគមន៍កសិកម្ម។

​លោកបានពន្យល់ថា កិច្ចការទាំងនេះជួយភាគីពាក់ព័ន្ធឱ្យយល់ដឹងគ្នាកាន់តែច្បាស់ និងសម្រួល​កិច្ចព្រមព្រៀង កសិកម្មតាមកិច្ចសន្យា ក្រោមការត្រួតពិនិត្យរបស់នាយកដ្ឋានកសិ-ឧស្សាហកម្ម (DAI) នៃក្រសួងកសិកម្ម។

​លោកបានកត់សម្គាល់ថា យន្តការបែបនេះគឺចាំបាច់សម្រាប់ការកសាងទំនុកចិត្ត និងធានាការ​ផ្គត់ផ្គង់​គ្រាប់ស្វាយចន្ទីឆៅប្រកបដោយស្ថិរភាពសម្រាប់រោងចក្រកែច្នៃ។

គំនិតផ្តួចផ្តើមនេះក៏ស្របតាម «គោលនយោបាយជាតិស្តីពីស្វាយចន្ទី ២០២២-២០២៧» របស់ រដ្ឋា ភិបាល ដែលមានគោលបំណងបង្កើនអត្រាកែច្នៃកសិផលរបស់កម្ពុជា និងបន្ថែម​តម្លៃកាន់តែ ច្រើន ដល់ឧស្សាហកម្មស្វាយចន្ទីរបស់ប្រទេស។

​យោងតាមសមាគមស្វាយចន្ទីកម្ពុជា ​គិតត្រឹមរយៈពេល ៨ ខែ ឆ្នាំ ២០២៥ ​កម្ពុជា​នាំចេញគ្រាប់​ស្វាយចន្ទីឆៅ ចំនួន ​៩៦៤៩៥៧ តោន ​គិត​ជាទឹក​ប្រាក់ ១,៤ ពាន់លានដុល្លារ កើនឡើង ២៥% ធៀបនឹងរយៈពេលដូចគ្នា ក្នុងឆ្នាំ ២០២៤៕